ટેક્નોલોજી / કોઇપણ ચાર્જરથી Smartphone ચાર્જ કરતા પહેલા રહેજો સાવધાન, ચોરાઇ શકે તમારો ડેટા

આપણી આ નાની બેદરકારી બહુ મોટું જોખમ નોતરી શકે છે. હવે એક હેકરે આ ચાર્જિંગ કેબલની સુરક્ષા સામે સવાલો ઉઠાવ્યા છે. તેનું કહેવું છે કે, ચાર્જિંગ કેબલ દ્વારા પણ યુઝરનો કિંમતી ડેટા ચોરી શકાય છે. આથી કોઈના પણ ચાર્જરથી ફોન ચાર્જ કરવો નુકસાનકારક સાબિત થઈ શકે છે.

એમજી તરીકે જાણીતા આ હેકરે જણાવ્યું છે કે, કેટલાક લોકો પેનડ્રાઈવ અને મેમરી કાર્ડના ઉપયોગ વખતે બહુ સાવચેત રહે છે, પરંતુ યુએસબી કેબલને ખતરો માનતા નથી. એમજીએ જ એપલના યુએસબી પોર્ટમાં લગાવવામાં આવતા ચાર્જિંગ કેબલનો નકલી નમૂનો તૈયાર કર્યો છે. ઓએમજી નામનો આ નકલી કેબલ બહારથી તો કોઈ અન્ય ચાર્જિંગ કેબલ જેવો જ દેખાય છે, પરંતુ આ કેબલ દ્વારા હેકર કોઈપણ ડિવાઈસમાં વાયરસ ટ્રાન્સમિટ કરી શકે છે. આ માટે તે ડિવાઈસ વાઈ-ફાઈ નેટવર્કમાં આવે એટલું જ જરૂરી હોય છે.

હેકર ઈચ્છે તો એ ડિવાઈસમાં નકલી કેબલનો ઉપયોગ કર્યાની માહિતી પણ ડિલીટ કરી શકે છે. આ કેબલ દ્વારા કમ્પ્યુટર કે સ્માર્ટફોનની સ્ક્રીનને લૉક કરીને તેનો પાસવર્ડ પણ જાણી શકાય છે. એમજીએ એપલના કેબલમાં જ કેટલાક ફેરફારો કરીને આ નકલી કેબલ બનાવ્યો છે. તેનું કહેવું છે કે, આ કેબલને અન્ય યુએસબી પોર્ટ માટે પણ બનાવી શકાય છે. જોકે તે આ કેબલને ફક્ત સિક્યોરિટી ટૂલ તરીકે જ ઉપયોગમાં લેવા ઈચ્છે છે. 

DSLR કેમેરા પર પણ થઈ શકે છે માલવેર એટેક

કમ્પ્યુટર અને સ્માર્ટફોન બાદ હવે હેકર્સની નજર તમારા કેમેરા પર છે. સાયબર સિક્યોરિટી એક્સપર્ટે ચેતવણી આપી છે કે, ડીએસએલઆર (DSLR) કેમેરા પર પણ રેન્સમવેર કે માલવેર (એક પ્રકારના વાયરસ) એટેક થઈ શકે છે. સાયબર સુરક્ષા કંપની ચેકપોઈન્ટ સોફ્ટવેર ટેક્નોલોજીના નિષ્ણાતોએ જણાવ્યું છે કે, આધુનિક કેમેરા USB અને Wi-Fi સાથે જોડાયેલા હોય છે. આવા સંજોગોમાં હેકર્સ તેના ડેટા પર કબજો કરી શકે છે. 

કંપનીના સંશોધક ઈયાલ ઈટકિને જણાવ્યું કે, કોઈ પણ સ્માર્ટ ડિવાઈસ, જેમાં ડીએસએલઆર કેમેરા પણ સામેલ છે, હેકર્સના હુમલાઓ માટે અતિસંવેદનશીલ હોય છે. કેમેરા હવે ફક્ત યુએસબી નહીં, પણ વાઈ-ફાઈ નેટવર્ક સાથે પણ કનેક્ટ થાય તેવા આવે છે. આ કારણે જ કેમેરા પણ હવે હેકર્સની પહોંચમાં આવી ગયા છે.