અમેરિકી સેનેટે બેમાંથી એક બિલને બ્લોક કરી દીધું છે જેમાં અલગ અલગ દેશો માટે જારી કરાયેલા ગ્રીનકાર્ડની સીમા હટાવી દેવાઇ હતી. આ નિર્ણયથી ઘણા ભારતીય પરિવારોની આશાને ઝટકો લાગ્યો છે. જેમના બાળકો ર૧ વર્ષની સીમા પાર કરી ચૂકયા છે અથવા કરવા જઇ રહ્યા છે, તેમના માટે આ માઠા સમાચાર છે.
બાળકો જ્યારે ર૧ વર્ષનાં થઇ જશે ત્યારે તેઓ એચ-૪ વિઝાના હકદાર નહીં રહે, જે ડિપેન્ડેન્ટને મળતા હોય છે. આ એચવન-બી વિઝાધારકોના બાળકોને આપવામાં આવે છે. અત્યારે તેઓ આ ઉંમર સુધી અભ્યાસ કરતા હોય છે.
તેમની પાસે આંતરરાષ્ટ્રીય સ્ટુડન્ટસ માટે અપાતા એફ-૧ વિઝાને મેળવવાની કોશિશ સિવાય બીજું કાંઇ બચતું નથી. તેઓ અમેરિકામાં અભ્યાસ જારી રાખી શકે છે અથવા તેમને ભારત પરત મોકલી દેવાય છે.
એ વાતની પણ કોઇ ગેરંટી નથી કે તેમને એફ-૧ વિઝા મળી જ જશે. આ કારણે લોકોની બેચેની વધી ગઇ છે. જો તેઓ ભારત પરત ફરવાનો વિચાર કરે છે તો તેમને એકદમ નવા માહોલમાં ખુદને ઢાળવામાં તકલીફ થઇ શકે છે. કેમ કે તેમાંથી ઘણા નાની ઉંમરમાં અમેરિકામાં વધી ગયા હતા.
તેમની સમસ્યાનું મૂળ ગ્રીનકાર્ડ માટે રાહ જોવી તે છે. દર વર્ષે અમેરિકા નોકરિયાતો માટે ૧.૪૦ લાખ ગ્રીનકાર્ડ જારી કરે છે અને દરેક દેશને સાત ટકા આપે છે. અમેરિકામાં ભારતીયોની મોટી સંખ્યાને જોતાં આ પ્રતિબંધાત્મક નીતિએ પડકાર ઊભો કર્યો છે.
ન્યૂયોર્કમાં એક ઇમિગ્રેશન લો ફર્મ ચલાવનાર સાયરસ મહેતા કહે છે કે બીજા દેશોમાં જન્મનારની અપેક્ષાએ જેનો જન્મ ભારતમાં થયો છે તે દાયકાઓ જૂના બેકલોગને સહન કરી રહ્યા છે. અન્ય દેશોના લોકોને એચ વન-બી વિઝાની ટર્મ સમાપ્ત થતાં તરત જ ગ્રીનકાર્ડ મળી જાય છે, પરંતુ ભારતીયો સાથે આમ થતું નથી.