અમદાવાદની સામાન્ય સભામાં ડ્રગ્સનો મુદ્દો ઉછળ્યો હતો.જેમાં વિપક્ષે ડ્રગ્સ મામલે શાશક પક્ષ પર બરાબરની તડાપીટ બોલાવી હતી અને ઘેરાવ કરતા બોર્ડ સમેટી લેવાની નોબત આવી હતી.
અમદાવાદની સામાન્ય સભામાં ડ્રગ્સનો મુદ્દો ઉછળ્યો
સામાન્ય સભામાં ડ્રગ્સ મામલે વિપક્ષ બન્યુ આક્રમક
રિવરફ્રન્ટ પર યુવાનો ડ્રગ્સનું સેવન કરતા હોવાનો વિપક્ષનો દાવો
વિધાનસભાની ચૂંટણી બાદ મળેલી અમદાવાદ મહાનગરપાલિકાની સામાન્ય સભા તોફાની બની હતી. જેમાં શહેના પ્રાથમિક સુવિધા કે ભ્રષ્ટાચારના મુદ્દે નહીં પણ ડ્રગ્સનાં મુદ્દે સામન્ય સભામાં હોબાળો થયો હતો. સામન્ય સભામાં હોબાળો થતા સભા બરખાસ્ત કરવામાં આવી હતી અને પ્રજાના કામો માટે ક્યાંય ચર્ચા જ કરવામાં આવી ન હતી.
વિપક્ષના સભ્યોએ મેયરનો સમગ્ર મામલે કર્યો ઘેરાવો
સામાન્ય સભામાં ડ્રગ્સ મામલે વિપક્ષ આક્રમક બન્યું હતું. વિપક્ષ દ્વારા આક્ષેપો કરાયા હતા કે અમદાવાદ સાબરમતી રિવરફ્રન્ટ પર યુવાનો ડ્રગ્સ લે છે. કૉર્પોરેશનનાં સિક્યુરિટી હોવા છતાં આ પ્રકારની પ્રવૃતિ થઈ રહી છે. વિપક્ષના નેતા શહેજાદખાન પઠાણ સભામાં ડ્રગ્સ લેવાની પાઇપ બોર્ડમાં સાથે લાવીને શહેરમાં પાનના ગલ્લાઓ પર મળતી હોવાની વાત કરી હતી. બીજી બાજુ આ પ્રકારની રજૂઆતનો ભાજપનાં સભ્યોએ વિરોધ કર્યો હતો. અને યુવાનો ડ્રગ્સ લેતા હતા તો પોલીસ ને કેમ ના જાણ કરી તેવા સવાલો કર્યા હતા. વિપક્ષનાં નેતા પાઇપમાં ડ્રગ લાવ્યા છે કે કેમ તે ચકાસવા તે પાઇપ લેબ ટેસ્ટ માટે મોકલવાની વાત ભાજપનાં સભ્યો દ્વારા કરવામાં આવી હતી. આ મુદ્દે પક્ષ વિપક્ષ સામ સામે આવતા બોર્ડ એક કલાકમાં સમેટાઈ ગયું હતું. કોર્પોરેશનની સામાન્ય સભામાં પ્રજાના પ્રશ્નોની રજૂઆતને બદલે મોટેભાગે હોબાળો થતો હોય છે બહુ ઓછા બોર્ડ હશે કે જેમાં પ્રજાના પ્રશ્નોની રજૂઆત થઈ હોય તેવો ઘાટ સર્જાયો હતો.
પક્ષ અને વિપક્ષની બોલાચાલીને કારણે સભામાં ગરમાવો
આ મુદ્દે મેયરે જણાવ્યું હતું કે ડ્રગ્સ મુદ્દે રિવરફ્રન્ટ પર ચેકિંગ કરવામાં આવશે. ભાજપની જીત કોંગ્રેસ પચાવી શક્યું નથી અને આથી જ આ પ્રકારની વાત વિપક્ષ કરી રહ્યું હોવાનો દાવો કર્યો હતો.અમદાવાદ મહાનગરપાલિકામાં સામાન્ય સભામાં હોબાળા બાદ મેયર કિરીટ પરમારે જણાવ્યું હતું કે, વિપક્ષ નેતાએ તંત્ર સામે પાયાવિહોણા આક્ષેપો કર્યા છે. વિપક્ષનેતા બોર્ડને ગેરમાર્ગે દોરી રહ્યા છે. વિધાનસભાની હાર કોંગ્રેસ હજુ સુધી પચાવી નથી શકી. તેમજ બોર્ડ ચાલવા દેવામાં કોંગ્રેસને કોઈ રસ નથી. વધુમાં જણાવ્યું હતું કે, કોર્પોરેશન પરિસરમાં આવી ઘટના થતી હશે તો કાર્યવાહી કરીશુ. વિપક્ષ નેતાએ રાજકીય સ્ટંટ કર્યા વગર પોલીસને જાણ કરવી હતી. તેવું પણ જણાવ્યું હતું.