વેક્સિનેશન માટે ઘરથી દસ-બાર કિ.મી. દૂર વેક્સિન સેન્ટર
તાજેતરની કોરોનાની સેકન્ડ વેવમાં મ્યુનિ. તંત્રમાં પણ ખાસ કરીને હેલ્થ વિભાગ સાવ નિષ્ફળ પુરવાર થયો છે. હેલ્થ વિભાગની ઘોર બેદરકારીના કારણે તંત્ર સેકન્ડ વેવ વખતે ઊંઘતું ઝડપાતાં હજારો અમદાવાદીઓ કોરોનાની ઝાળમાં દાઝી ઊઠ્યા હતા. હવે સંભવિત થર્ડ વેવનો મુકાબલો કરવા સત્તાવાળાઓએ હાલના અધિકારીઓને જ જવાબદારી સોંપી હોઈ નવો વિવાદ ઊભો થયો છે.
પોલિંગ બૂથ વેક્સિનેશન ઝુંબેશ માટે પૂરતો સ્ટાફ નથી
પોતાની ફરજ નિભાવવામાં અસફળ નીવડેલા આ અધિકારીઓ કોરોના નવી આફતનો કેવી રીતે મુકાબલો કરી શકશે તેવી ચર્ચાએ વેગ પકડ્યો છે. એટલે તંત્રની બલિહારીથી જો થર્ડ વેવ ન કરે નારાયણ અને આવે તો પાછા નાગરિકોને કોરોનાથી સહન કરવાનો જ વારો આવશે તેમ લાગે છે. દરમિયાન આગામી સોમવારથી અમદાવાદમાં ૧૮થી ૪૪ વયજૂથના લોકોને ઓનલાઇન રજિસ્ટ્રેશન ફરજિયાત નહીં રહે તેમ લાગે છે, એટલે આ વયજૂથ પણ અન્ય વયજૂથની જેમ 'વોક ઇન વેક્સિનેશન' કરી શકશે, પરંતુ પોલિંગ બૂથમાં વેક્સિનેશન ઝુંબેશ હાથ ધરવા તંત્ર ઓછા સ્ટાફના કારણે સક્ષમ ન હોઈ શહેરીજનોને 'જ્યાં વોટ ત્યાં વેક્સિન'નો લાભ મળશે નહીં. આ માટે તંત્રની બલિહારી જ વધુ જવાબદાર છે.
બંને વયજૂથમાં સ્પોટ રજિસ્ટ્રેશનની છૂટ અપાઈ
અમદાવાદમાં ગત તા. ૧ મેથી વેક્સિનેશનના મામલે સોનાનો સૂરજ ઊગ્યો હતો. તે દિવસથી ૧૮થી ૪૪ વયજૂથના લોકો માટે ફ્રી વેક્સિનેશન શરૂ કરાયું હતું એટલે કોરોનાને નિયંત્રણમાં લાવવા માટેના એકમાત્ર અસરકારક હથિયાર વેક્સિનેશન અભિયાન ઓપન ફોર ઓલના મહત્ત્વના તબક્કે પહોંચી ગયું હતું. આની પહેલાં ૪૫થી ૫૯ વર્ષ અને સિનિયર સિટીઝનનું વેક્સિનેશન ગોકળગાય ગતિએ ચાલતું હતું. આ બંને વયજૂથમાં સ્પોટ રજિસ્ટ્રેશનની છૂટ અપાઈ હોવા છતાં સત્તાધીશો ક્યારેય દૈનિક ૫૦,૦૦૦ વેક્સિનનો ટાર્ગેટ મેળવી શક્યા નહોતા એટલે યુવાવર્ગને વેક્સિન આપવાની ઉગ્ર માગણી ઊઠતાં તે છેલ્લા દોઢ મહિનાથી સંતોષાઈ રહી છે.
જોકે ૧૮ પ્લસનાં વેક્સિનેશનમાં ઓનલાઇન રજિસ્ટ્રેશન ફરજિયાત હોવાથી માત્ર ટેકનોસેવી યુવાઓને જ આનો લાભ મળી શક્યો છે. ગરીબ પરિવારમાંથી આવતાં યુવક-યુવતીઓ રૂ. ૩૦૦ના મોબાઇલથી કામ ચલાવતા હોઈ સ્વાભાવિક રીતે તેમને વેક્સિનેશનથી વંચિત રહેવું પડ્યું છે. જોકે હવે ટેકનોસેવી યુવાઓના મોટા વર્ગે વેક્સિન લઈ લીધી હોઈ પૂર્વ અમદાવાદમાં અનેક વિસ્તારના ટાઇમ સ્લોટ ખાલી જાય છે. બીજા અર્થમાં તંત્રને વેક્સિનેશન માટે યુવા મળતા નથી એટલે સ્વાભાવિક છે કે સોમવારથી ૧૮ પ્લસ માટે ઓનલાઇન રજિસ્ટ્રેશનની શરત કાઢી નખાશે તો સ્પોટ રજિસ્ટ્રેશનથી સ્લમ વિસ્તારના હજારો યુવાઓનું વેક્સિનેશન થઈ શકશે.
ઘરથી દસ-બાર કિ.મી. દૂર વેક્સિન સેન્ટર
મ્યુનિ. કોર્પોરેશન દ્વારા ૧૮થી ૪૪ વયજૂથના માટે સ્પોટ રજિસ્ટ્રેશન કરવાની તૈયારી પણ આરંભાઈ છે. જોકે અમદાવાદ જિલ્લા તંત્રની જેમ સત્તાવાળાઓ અમદાવાદીઓને 'જ્યાં વોટ ત્યાં વેક્સિન'ની સુવિધા આપી શકે તેમ નથી. શહેરીજનોને તો તમામ વયજૂથ માટે સ્પોટ રજિસ્ટ્રેશન શરૂ કરાયા બાદ પણ વેક્સિન લેવા તેમના ઘેરથી નજીકના અર્બન હેલ્થ સેન્ટર કે મ્યુનિ. શાળા કે મ્યુનિ. કોમ્યુનિટી હોલ સુધી લાંબા થવું જ પડશે. જોકે યુવાઓને ઓનલાઇન રજિસ્ટ્રેશનની સગવડ તો મળશે જ અને એવા યુવાઓને વેક્સિનેશનમાં પ્રાધાન્ય અપાશે, પરંતુ હવે રોજેરોજ ટાઇમ સ્લોટ મેળવવો, ઘરથી દસ-બાર કિ.મી. દૂર સેન્ટર મેળવવું જેવી હાલાકીઓનો ફરજિયાત ઓનલાઇન રજિસ્ટ્રેશનની શરત કાઢી નખાયા બાદ અંત આવશે.
હેલ્થ વિભાગ પાસે પૂરતો સ્ટાફ જ નથી
શહેરમાં જ્યાં પોલિંગ બૂથ ત્યાં જો વેક્સિન અપાય તો અનેક વિકલાંગો, વૃદ્ધો, મહિલાઓને ઘરઆંગણે ઘણો લાભ મળી શકે તેમ છે. રાજકીય કાર્યકરો પણ ચૂંટણી સમયે મતદારોને બૂથ સુધી વાહનોથી લઈ જવા-લાવવા જેવી જવાબદારી સંભાળતા હોઈ તેમના વિસ્તારના લોકોનું પણ બૂથ સુધી વાહનોની વ્યવસ્થા કરીને ૧૦૦ ટકા વેક્સિનેશનનો લક્ષ્યાંક મેળવી શકે છે, પરંતુ હેલ્થ વિભાગ પાસે પૂરતો સ્ટાફ જ નથી. એક અંદાજ પ્રમાણે ૩૦ ટકા સ્ટાફની ઘટ છે. સ્વચ્છ સર્વેક્ષણ હેઠળ મોટા ભાગનો સ્ટાફ સોલિડ વેસ્ટ મેનેજમેન્ટને ફાળવતાં હવે વોર્ડમાં પાણીનાં સેમ્પલ લેવાનાં પણ કર્મચારી નથી.
હેલ્થની કામગીરી કરતો મોટા સ્ટાફ આઉટ સોસિંગ
મ્યુનિ. હેલ્થનો વેક્સિનેશનની કામગીરી સાથે સંકળાયેલો મોટા ભાગના સ્ટાફ આઉટ સોર્સિંગનો છે, જેમને રૂ. ૭૫૦૦થી રૂ. ૧૨,૦૦૦ સુધીનું મામૂલી વેતન ચૂકવાય છે. આવા આઉટ સોર્સિંગના કે કોન્ટ્રાક્ટના કે નેશનલ હેલ્થ અર્બન મિશન (એનએચયુએમ) સાથે સંકળાયેલા કર્મચારીઓથી હેલ્થ વિભાગ ગાડું ગબડાવે છે. મ્યુનિ. હેલ્થ વિભાગે મહિને રૂ. ૫૦ હજારનો પગાર ધરાવતા કાયમી કર્મચારીની નિમણૂક કરવી જોઈએ, પણ અર્બન હેલ્થ સેન્ટરમાં પણ પૂરતા કર્મચારીઓ નથી. જોકે શાસકોને આ અંગે પૂછતાં તેઓ કહે છે, અમદાવાદમાં વેક્સિનેશન સંતોષકારક છે. તેમ છતાં આગામી દિવસોમાં હયાત સેન્ટરો વધારવા ઉપરાંત પોલિંગ બૂથમાં વેક્સિનેશન શરૂ કરવાની દિશામાં ચોક્કસ પ્રયાસ કરાશે.