આ કેવું? / એક તરફ અમદાવાદ પૂર્વની જનતા 'ભીડ'માં રહે, આ બાજુ સત્તાધીશોને 4 ટીપી સ્કીમમાંથી ૧૯૬ પ્લોટ ઉપલબ્ધ થશે

• કોટ વિસ્તારમાં ભીડમાં જનતા રહે
• નવા વિસ્તારોમાં સત્તાધીશો વિશાળ જમીનમાં રહે
• 4 ટીપી સ્કીમમાંથી સોનાની લગડી જેવા ૧૯૬ પ્લોટ ઉપલબ્ધ

સિમેન્ટ-કોંક્રીટના જંગલમાં ફેરવાયેલા અમદાવાદમાં મ્યુનિ. તંત્રને જે તે વિકાસકામ કરવા જમીન મળતી નથી. કોટ વિસ્તાર તો એવો ભરચક થઈ ગયો છે કે ત્યાં નવાં વૃક્ષો ક્યાં વાવવાં તેની તંત્રને સૂઝ પડતી નથી, કેમ કે કોઈ મ્યુનિ. પ્લોટ નજરે પડતો નથી, જોકે નવા વિસ્તારોમાં સત્તાવાળાઓ નવી ટીપી સ્કીમની મંજૂરીના આધારે વિશાળ જમીન મેળવતા રહે છે, જ્યાં અર્બન હેલ્થ સેન્ટર, આંગણવાડી, જિમ, સ્વિમિંગ પૂલ, પાર્ટી પ્લોટ, કોમ્યુનિટી હોલ, લાઇબ્રેરી, બગીચા, સ્કૂલ, પ્લે-ગ્રાઉન્ડ જેવી નાગરિકો માટે સુવિધા ઊભી કરી શકાય છે. તાજેતરમાં સત્તાધીશોને ચાર ટીપી સ્કીમમાંથી સોનાની લગડી જેવા ૧૯૬ પ્લોટ ઉપલબ્ધ થતાં નવા વિસ્તારોમાં તંત્રની વિકાસયાત્રા આગળ ધપી શકશે.

મકતમપુરા  ટીપી સ્કીમ
મ્યુનિ. ટાઉન પ્લાનિંગ કમિટીના ચેરમેન અને બોડકદેવના કોર્પોરેટર દેવાંગ દાણી આ અંગે વધુમાં માહિતી આપતાં કહે છે, ટીપી સ્કીમ ૯૩-એ મકતમપુરાની કુલ ૫૨.૨૧ હેક્ટર જમીન પૈકી તંત્રને કુલ ૧૩ પ્લોટ મળ્યા છે, જેમાં ઓપન સ્પેસ, પ્લે-ગ્રાઉન્ડ, ગાર્ડન માટે ત્રણ, સ્કૂલ, પબ્લિક યુટિલિટી તથા ઓપન કોમર્શિયલ યુઝ વગેરે માટે કુલ ૧૦ પ્લોટ મળીને કુલ ૧૩ પ્લોટથી ૨૬,૩૨૬ ચો.મી. જમીન પ્રાપ્ત થઈ છે.

રાણીપ-ચેનપુર-કાળી ટીપી સ્કીમ
ટીપી સ્કીમ ૬૬-એ રાણીપ-ચેનપુર-કાળીની કુલ ૧૨૭.૦૯ હેક્ટર જમીનમાંથી સૌથી વધુ ૫૯ પ્લોટથી કુલ ૫૫,૩૪૨ ચોરસ મીટર જગ્યા મળી છે, જેમાં વાણિજ્ય-રહેણાક વેચાણ માટે કુલ ૧૪, ઈડબ્લ્યુએસ મકાન માટે સાત, બગીચો, ખુલ્લી જગ્યા, પ્લે-ગ્રાઉન્ડ, અર્બન ફોરેસ્ટ્રી માટે કુલ ૧૩ અને સોશિયલ ઇન્ફ્રાસ્ટ્રક્ચર, પાર્કિંગ, ઓપન કોમર્શિયલ યુઝ માટે કુલ ૨૫ પ્લોટ મળ્યા છે. આ સ્કીમમાંથી તંત્રને સૌથી વધુ ૨.૦૭ લાખ ચોરસ મીટર જમીન મળી હોવાનું ટાઉન પ્લાનિંગ કમિટીના ચેરમેન દેવાંગ દાણી કહે છે.

શીલજ ટીપી સ્કીમ
જ્યારે ટીપી સ્કીમ નં. ૧૫૨-જી (શીલજ)ની કુલ ૬૫.૧૭ હેક્ટર જમીનમાંથી કુલ ૧.૩૫ લાખ ચોરસ મીટર જમીન ધરાવતા કુલ ૫૧ પ્લોટ તંત્રને મળ્યા છે તેવું જણાવતાં દેવાંગ દાણી વધુમાં ઉમેરે છે, શીલજ ટીપી સ્કીમમાંથી સોશિયલ ઇન્ફ્રાસ્ટ્રક્ચર, પાર્કિંગ, ઓપન કોમર્શિયલ યુઝ માટે સૌથી વધુ ૪૬.૭૪૮ ચોરસ મીટર જમીન ધરાવતા કુલ ૨૫ પ્લોટ મળ્યા છે.

આંબલી ટીપી સ્કીમ
તંત્રને ટીપી સ્કીમ નં. ૨૧૨ (આંબલી)ની કુલ ૮૫.૬૭ હેક્ટર જમીન પૈકી કુલ ૧.૨૪ લાખ ચોરસ મીટર જમીનના ૩૩ પ્લોટ મળ્યા હોઈ તેમાં સૌથી વધુ ૧૧ પ્લોટ પબ્લિક યુટિલિટી સર્વિસીસના છે. આ ઉપરાંત બગીચો, ઓપન સ્પેસના આઠ, રહેણાક વેચાણ માટે સાત, વાણિજય વેચાણ માટે ચાર, શાળા, પ્લે-ગ્રાઉન્ડ માટે બે અને ખુલ્લા વાણિજ્ય વેચાણ માટે એક પ્લોટનો સમાવેશ થાય છે તેમ પણ ટાઉન પ્લાનિંગ કમિટીના ચેરમેન કહે છે.

ભાડજ ટીપી સ્કીમથી કુલ ૩૧ પ્લોટ મળ્યા
તંત્રને ટીપી સ્કીમ નંબર ૧૫૧-એ (ભાડજ)માંથી કુલ ૧,૩૯,૯૬૪ ચોરસ મીટરની જગ્યા ધરાવતા કુલ ૩૧ પ્લોટ મળ્યા છે, જેમાં સોશિયલ ઇન્ફ્રાસ્ટ્રક્ચર માટે સૌથી વધુ ૧૧ પ્લોટ છે.યુનિવર્સિટી કેમ્પસ વિસ્તારમાં સોશિયલ ઇન્ફ્રાસ્ટ્રક્ચર માટે ત્રણ પ્લોટ નક્કી કરાયા સત્તાધીશોને યુનિવર્સિટી કેમ્પસ વિસ્તારમાંથી ૭,૩૨૨ ચોરસ મીટર જમીન ધરાવતા કુલ ૧૭ પ્લોટ મળ્યા છે. વાણિજ્ય અને રહેણાક વેચાણ માટે પાંચ પ્લોટ, અર્બન ફોરેસ્ટ્રી માટે ચાર પ્લોટ નક્કી કર્યા છે.