ડિજિટલ / આજથી AMCનો ટેક્સ વિભાગ સંપૂર્ણપણે ઓનલાઈન, હવેથી ઘરે બેઠાં જ અમદાવાદીઓ ઉઠાવી શકશે આ સુવિધાનો લાભ

• આજથી AMCમાં ટેક્સની ચૂકવણી કે સુધારા કરાવવા સરળ પડશે
• AMCનો ટેક્સ વિભાગ આજથી સંપૂર્ણપણે ઓનલાઈન થઇ ગયો
• 9 પ્રકારની અરજીઓ ઓનલાઈન કરી શકાશે

અમદાવાદીઓ માટે મહત્વના સમાચાર સામે આવ્યા છે. કારણ કે આજથી AMCમાં ટેક્સની ચૂકવણી કે સુધારા કરાવવા હવેથી સરળ બનશે. AMCનો ટેક્સ વિભાગ આજથી સંપૂર્ણપણે ઓનલાઈન થઇ જશે. જેના લીધે 9 પ્રકારની અરજીઓ હવેથી ઓનલાઈન કરી શકાશે. સિવિક સેન્ટરના કર્મીની મદદથી પણ અરજી કરી શકાશે.

AMCની એપ્લિકેશન ઓનલાઈન ચૂકવણી App બંધ રખાઇ હતી

મહત્વનું છે કે, AMCની એપ્લિકેશન ઓનલાઈન ચૂકવણી App બંધ રાખવામાં આવી હતી. 22 ઓક્ટોબરથી 31 ઓક્ટોબર સુધી આ App બંધ રખાઈ હતી. આથી, આજથી નવા સુધારા સાથે ફરીવાર આ App ચાલુ કરવામાં આવી છે. AMCમાં ટેક્સની ઓનલાઇન ચૂકવણીની સુવિધાના કારણે હવેથી નાગરિકોએ સિવિક સેન્ટર કે વોર્ડ ઓફિસ ખાતે રૂબરૂ જવાની જરૂર નથી. માત્ર વેબસાઈટ ઉપર પણ તેઓ ફોર્મ ભરી યોગ્ય પુરાવા આપીને ઓનલાઇન કામગીરી કરી શકશે.

ટેક્સ સંબંધિત તમામ કામગીરી આજથી ઓનલાઇન કરી શકાશે

તમને જણાવી દઇએ કે, AMCના ઈ-ગવર્નન્સ વિભાગ દ્વારા પ્રોપર્ટી, વ્હીકલ કે પ્રોફેશનલ ટેક્સની ઓનલાઈન ચૂકવણી કે સુધારા વગેરે કામગીરી માટે અદ્યતન સોફ્ટવેર અપડેટ કરવામાં આવ્યું છે. ટેક્નિકલ કામગીરી કરવામાં આવતી હોવાથી ટેક્સ વિભાગની કોઈ પણ કામગીરી જેવી કે ઓનલાઇન - ઓફલાઈન ટેક્સ પેમેન્ટ કે સુધારા વગેરે AMCના સિવિક સેન્ટર કે કોર્પોરેશનની એપ્લિકેશન તથા અન્ય ઓનલાઈન ચૂકવણી App મારફતે થતી ચૂકવણી તેમજ અન્ય કામગીરી 22 ઓક્ટોબરથી 31 ઓક્ટોબર સુધી બંધ રાખવામાં આવી હતી. જે આજથી સંપૂર્ણપણે કાર્યરત થઈ ગયું છે. આથી લોકો ટેક્સ સંબંધિત તમામ કામગીરી આજથી ઓનલાઇન કરી શકશે.

જાણો પ્રોપર્ટી ટેક્સની કઈ અરજીઓ/સેવાઓનો લાભ લઈ શકાશે?

• મિલકતમાં માલિકનું નામ ફેરફાર અંગેની અરજી - Owner Name Transfer
• મિલકતના કબજેદાર નામમાં ફેરફાર અંગેની અરજી – Occupier Change
• મિલકતવેરા ક્ષેત્રફળ અથવા પરિબળોમાં સુધારા અંગેની અરજી (ટેક્ષ ઘટાડાની અરજી) – Factor Change
• મિલકત ખાલી/ નોનયુઝ અંગેની અરજી–Vacant
• નવી મિલકતોનું એસેસમેન્ટ અંગેની અરજી–New Assessment
• સોલાર રૂફટોપ ઇન્સેન્ટીવ સ્કીમ–Solar Rooftop Incentive Scheme
• વપરાશ મુજબ ડિવિઝન બિલ – Division Bill
• પ્રોપર્ટી ટેક્ષ ચૂકવણી – Payment of Property Tax
• નામ ટ્રાન્સફર ફી – Name Transfer Fee