ટેક્સ પર ડોળો / અમદાવાદ મનપાના મગજમાં ટેક્સ વધારવાનું ભૂત સવાર, સ્થગિત કરેલી યુઝર્સ ચાર્જીસની દરખાસ્ત ફરી સ્ટેન્ડિંગ કમિટીમાં મૂકી

• અમદાવાદમાં ટેક્સબિલમાં થશે વધારો
• AMCની સ્ટેન્ડિંગ બેઠકમાં વિવાદાસ્પદ દરખાસ્ત
• ડોર ટુ ડોર યુઝર્સ ચાર્જીસ વધારવાની દરખાસ્ત

અમદાવાદ મહાનગર પાલિકા સ્વચ્છતામાં ભલે દેશના ગણમાન્ય શહેરોમાં અવ્વલ નાં હોય પણ નાગરિકોના  ખીસા ખંખેરવા અને તિજોરી ભરવી એ મૂળભૂત સ્વભાવ છે. શહેરની સુખાકારી અને સ્વચ્છતાના નામે અગાઉ પણ નાણા ખંખેર્યા છે. બદલામાં સુવિધાઓ શી મળે છે. તેનો નાગરિકોને ખ્યાલ જ છે. અમદાવાદના પોશ વિસ્તારોમાં રસ્તા,ગટર, પીવાનું ચોખ્ખું પાણી,રઝળતા ઢોર,આડેધડ પાર્કિંગ, પાર્કિંગ સુવિધાઓનો અભાવ, જેવીઓ અગણિત સમસ્યાથી અમદાવાદી પરેશાન છે. ત્યારે વધુ એક વખત AMCની સ્ટેન્ડિંગ બેઠકમાં વિવાદાસ્પદ દરખાસ્ત રજૂ કરાઇ છે જે અગાઉ ભારે વિરોધના પગલે મુલતવી રખાઇ હતી. 

નવા ડોર ટુ ડોર યુઝર્સ ચાર્જીસથી ટેક્સબિલમાં થશે વધારો
અમદાવાદના શહેરીજનોના ટેક્સબિલમાં વધારો થવાના એંધાણ વર્તાઈ રહ્યા છે. મુલતવી રખાયા બાદ ફરી એક વખત મહાનગર પાલિકા ડોર-ટુ-ડોર ચાર્જમાં વધારો કરવાની દરખાસ્ત મૂકી રહી છે. આના પરિણામે રહેણાંક એકમોના પ્રતિદિન રૂ. 1 ની જગ્યાએ રૂ 3 કરવાની દરખાસ્ત કરવામાં આવી છે.તો કોમર્શિયલ એકમોના રૂ. 2 ની જગ્યાએ રૂ. 5 કરવા દરખાસ્ત કરાઈ છે. આ ચાર્જ સફાઈ સુવિધાનાં હેડ નીચે વસુલવામાં આવશે. નવા ડોર ટુ ડોર યુઝર્સ ચાર્જીસથી ટેક્ષ બિલમાં થશે વધારો થશે. 

ભારે વિરોધના પગલે અગાઉ દરખાસ્ત રખાઇ હતી સ્થગિત
ગત 27 જાન્યુઆરીના રોજ AMCની સ્ટેન્ડિંગની બેઠકમાં ટેક્સ વધારવાની દરખાસ્તને મુલતવી રખાઈ હતી.કમીશ્નર દ્વારા ડોર ટુ ડોર યુઝર્સ ચાર્જીસ વધારવા રહેણાંક એકમોના પ્રતિદિન 1 રૂપિયાની જગ્યાએ 3 રૂપિયા અને કોમર્શિયલ એકમોના 2 રૂપિયાની જગ્યાએ 5 રૂપિયા કરવા દરખાસ્ત કરાઈ હતી.સ્વચ્છતા સેસના નામે ટેક્સ વધારાની દરખાસ્ત કરવામાં આવતા ભારે વિવાદ થયો હતો. આ દરખાસ્તને કારણે શહેરીજનો પર 280 કરોડનું ભારણ વધવાનું હતું.ત્યારે વિવાદ થત વધુ અભ્યાસ માટે આ દરખાસ્તને સ્થગિત કરવામાં આવી હતી. 

છેલ્લા પાંચ વર્ષથી કોઈ વધારો કરવામાં નથી આવ્યો
મહત્વનું છે કે 2018માં એએમસી દ્વારા ડોર ટુ ડોર કચરાના કલેક્શન માટે પ્રતિદિન રહેણાંક એકમો માટે 1 રૂપિયો અને કોમર્શિયલ એકમો માટે 2 રૂપિયા સ્વચ્છતા સેસ લગાવવામાં આવ્યો હતો.જેમાં છેલ્લા પાંચ વર્ષથી કોઈ વધારો કરવામાં નથી આવ્યો.ત્યારે આ વર્ષે સ્વચ્છતા સેસમાં બે ગણો વધારો કરવા ફરી દરખાસ્ત કરવામાં આવી છે.