દેશમાં ભડકે બળતા પેટ્રોલ-ડિઝલના ભાવ વચ્ચે કેન્દ્ર અને રાજ્ય સરકાર દ્વારા ઈલેક્ટ્રીક વાહનોના ઉપયોગ પર ભાર મુકવામાં આવી રહ્યો છે. ત્યારે અમદાવાદ મનપાએ પણ આજે મહત્વનો નિર્ણય કર્યો છે.
ઈલેક્ટ્રીક વાહનધારકોને મળશે રાહત
અમદાવાદના કોર્પોરેશનની નવી પોલીસી
300 જગ્યાએ EV ચાર્જ સ્ટેશન બનાવશે
મળતી જાણકારી પ્રમાણે, અમદાવાદ મ્યુનિસિપલ કોર્પોરેશન દ્વારા શહેરમાં સતત વધી રહેલા ઇલેક્ટ્રિક વાહનોના ઉપયોગને ધ્યાનમાં રાખીને વિવિધ 300 જગ્યાઓ ઉપર ચાર્જિંગ સ્ટેશન તૈયાર કરવામાં આવશે.
શહેરમાં 300 જગ્યાએ ચાર્જિંગ સ્ટેશન
અમદાવાદ મહાનગરપાલિકા દ્વારા આ નિર્ણય એટલા માટે લેવાયો છે કે, શહેરીજનોમાં ઈલેક્ટ્રિક વાહનોના વપરાશ અંગે લોકજાગૃતિ આવે અને જે નાગરિકો આ ઇલેક્ટ્રિકવાહનોનો ઉપયોગ કરે છે તેમને રસ્તામાં ચાર્જિગ ખૂટી પડે તો કોઈપણ પ્રકારની અગવડતા વેઠવી ન પડે. આ ચાર્જિંગ સ્ટેશન શહેરના વિવિધ 300 જગ્યાઓ પર તૈયાર કરવામાં આવશે. જે PPP ધોરણે તૈયાર કરાશે.
ચાર્જિંગ સ્ટેશનનું લોકેશન પર GIS મેપ તૈયાર કરાશે
ઇલેક્ટ્રિક વાહન ચાર્જિંગ સ્ટેશન માટે અમદાવાદ મહાનગરપાલિકા દ્વારા અલગથી એક ખાસ વિભાગની રચના કરવામાં આવશે. જેમાં આસિસ્ટન્ટ મ્યુનિસિપલ કમિશનર કક્ષાના અધિકારીના વડપણ હેઠળ એસ્ટેટ, ટેક્સ, ટ્રાફિક સહિતના વિભાગના અધિકારીઓનો સમાવેશ પણ કરવામાં આવશે. આ સાથે જ અરજીઓના ઝડપી નિકાલ માટે સિંગલ વિન્ડો સિસ્ટમ તૈયાર કરવામાં આવશે. તમામ લોકેશનની GIS મેપ પર યાદી તૈયાર કરી AMCની વેબસાઈટ પર અપલોડ કરી મહિને એકવાર અપડેટ કરવાની રહેશે.
રાજ્ય સરકાર આપશે સબસિડી
આવનારા ચાર વર્ષમાં આ નીતિ અંતર્ગત બે લાખ ઇલેકટ્રીક વાહનો રાજ્યના માર્ગો પર આવશે તેવી સ્પષ્ટ ધારણા સાથે લક્ષ્ય નિર્ધારીત કરવામાં આવ્યું છે. તદઅનુસાર, ૧ લાખ ૧૦ હજાર ટૂ વ્હીલર, ૭૦ હજાર થ્રી વ્હીલર અને ર૦ હજાર જેટલા ફોર વ્હીલર આગામી ૪ વર્ષોમાં રાજ્યમાં આવશે તેવો અંદાજ છે.
તો આ સાથે જ તેમણે કહ્યું હતું કે, એટલે કે આગામી ચાર વર્ષમાં ર લાખ ઇલેકટ્રીક વાહનો ગુજરાતના માર્ગો પર યાતાયાત માટે આવશે ત્યારે ઓછામાં ઓછા આશરે પાંચ કરોડ રૂપિયાની ઇંધણ બચત થશે તથા અંદાજે ૬ લાખ ટન જેટલું કાર્બન ઉત્સર્જન ઘટશે તેવો અંદાજ રાખવામાં આવ્યો છે.
ગુજરાત બન્યું પ્રથમ રાજ્ય
રાજ્ય સરકાર ઇલેકટ્રીક વાહનોની ખરીદી માટે વાહનના કિલોવોટ દિઠ રૂ. ૧૦ હજારની સબસિડી આપશે. સમગ્ર દેશમાં ગુજરાત આવી પ્રતિ કિલોવોટ સબસિડી આપવામાં અગ્રેસર રાજ્ય છે. દેશના અન્ય રાજ્યો આવી સબસીડી પ્રતિ કિલોવોટ વધુમાં વધુ રૂ. પ હજાર આપે છે જ્યારે ગુજરાતમાં એનાથી બમણી એેટલે કે પ્રતિ કિલોવોટ રૂ. ૧૦ હજારની સબસીડી આપણે આપવાના છીએ. આના પરિણામે ચાર વર્ષમાં રાજ્ય સરકાર રૂ. ૮૭૦ કરોડનો બોજ વહન કરશે.