છેક તા.૩ જૂન, ર૦૧૭એ એએમસી સેવા એપનું લોન્ચિંગ કરાયું હતું, તેમ છતાં માત્ર ૧૦,૦૦૦થી વધુ નાગરિકોએ જ ડાઉનલોડ કરી છે. બે મહિના પહેલાં જ સત્તાવાળાઓએ એપને અપડેટ કરી છે. સામાન્ય રીતે એવું કહેવાય છે કે, ‘મન હોય તો માળવે જવાય’, તેમાં પણ શહેરના મ્યુનિસિપલ સત્તાવાળાઓ જે ધારે તે કરી શકે તેમ છે. ફક્ત તેમના એજન્ડામાં જે તે બાબતનો સમાવેશ કરવો જરૂરી છે.
અહીં આ વાત ‘એએમસી સેવા એપ’ની કરવાની છે, પરંતુ દાયકાઓથી વસવાટ કરતા અમદાવાદીઓ માટે તો જાણે કે આ એપ વિવિધ માહિતીની દૃષ્ટિએ ઉપયોગી છે, પરંતુ અજાણ્યા મુલાકાતીઓ માટે પણ ‘ગાઇડ’ની સેવા બજાવી શકે છે, પરંતુ ગમે તે કારણ હોય એએમસી સેવા એપ તંત્રની નજરમાં આવી નથી.
છેક ગત તા.૩ જૂન, ર૦૧૭એ મ્યુનિસિપલ સત્તાધીશોએ સ્માર્ટ સિટી મિશન હેઠળ એએમસી સેવા એપનું લોન્ચિંગ કર્યું હતું. એએમસી સેવા એપ અનેક રીતે નાગરિકોને ઉપયોગી બની શકે છે. ઉદાહરણ તરીકે આ એપ થકી નાગરિક પોતાના મોબાઇલ ફોનના લોકેશન પરથી તંત્રના સંલગ્ન વોર્ડ, ઝોન વિશેની જાણકારી મેળવી શકે છે.
તેમજ પ્રજાના ચૂંટાયેલા પ્રતિનિધિઓ અંગેની માહિતી પણ એપમાં મુકાઇ છે. એએમટીએસ-બીઆરટીએસ બસસ્ટોપ, સ્વિમિંગ પૂલ, જિમ, અર્બન હેલ્થ સેન્ટર, લાઇબ્રેરી, હોલ, પાર્ક અને ગાર્ડનની સાથે-સાથે પબ્લિક ટોઇલેટ અને કચરાપેટીની માહિતીનો પણ એએમસી સેવા એપમાં સમાવેશ કરાયો છે. જાણકાર સૂત્રો કહે છે કે કોઇ પણ નાગરિક માટે ‘પોકેટ ગાઇડ’ની જેમ આ એપ હોવા છતાં તંત્ર દ્વારા છેલ્લાં બે વર્ષમાં ભાગ્યે જ તેના પ્રચાર-પ્રસાર પર ભાર મુકાયો છે, જેના કારણે માંડ ૧૦,૦૦૦થી વધુ નાગરિકોએ આ એપને ડાઉનલોડ કરી છે.
ટેકનિકલ ક્ષતિના કારણે સેવા એપ ખોરંભે ચઢી હતી
ફાયર, એમ્બ્યુલન્સ, વુમન હેલ્પલાઇન જેવી ર૪X૭ ઇમર્જન્સી સર્વિસ, બંધ સ્ટ્રીટલાઇટ, રસ્તા પરનો કચરો, પાણીની સમસ્યા, રસ્તા પરના ખાડા-ભૂવા વગેરેની ફરિયાદ માટે પણ ઉપયોગી એએમસી સેવા એપ ટેકનિકલ ક્ષતિના કારણે વચ્ચે ૬થી ૮ મહિના ખોરંભે ચઢી હતી, પરંતુ કેટલાક જાગૃત નાગરિકોની તંત્ર સમક્ષ ઉગ્ર રજૂઆતોના પગલે હજુ બે મહિના પહેલાં જ તેને અપડેટ કરાઇ છે.
અગાઉ સ્વચ્છતા સર્વેક્ષણ-ર૦૧૭ હેઠળ અમદાવાદનો સુરત અને વડોદરા બાદ ૧૪મો ક્રમાંક આવ્યો હતો. સુરતે ચોથો અને વડોદરાએ ૧૦મો ક્રમાંક મેળવ્યો હતો, જોકે દેશનાં પહેલાં ર૦ સ્વચ્છ શહેરમાં અમદાવાદનો સમાવેશ માટે પણ સિટીઝન ફીડબેકમાં મળેલા માર્કસ જવાબદાર હતા.
અગાઉ આ એપ્રિલકેશન ડાઉનલોડ કરવામાં પ્રથમ આવ્યું હતું અમદાવાદ
તે વખતે તંત્ર દ્વારા સિટીઝન ફીડબેક મેળવવા સ્વચ્છતા એપ્લિકેશન એપ મુકાઇ હતી અને હેલ્થ વિભાગ સહિતના વિભાગના તમામ કર્મચારીઓ તેમજ અધિકારીઓ પર આ એપને ડાઉનલોડ કરવા ખાસ ભાર મુકાયો હતો. નાગરિકોને પણ વારંવાર સ્વચ્છતા એપ્લિકેશન એપ ડાઉનલોડ કરવાની તંત્ર દ્વારા અપીલ કરાતી હતી, જેના કારણે સમગ્ર દેશમાં અમદાવાદ સ્વચ્છતાની એપ્લિકેશન ડાઉનલોડ કરવામાં પ્રથમ આવ્યું હતું. આ માટે સત્તાધીશોએ નાગરિકોનો જાહેર આભાર પણ વ્યક્ત કર્યો હતો.
એપ ડિલીટ કર્યા બાદ ફરી એપનો થઇ રહ્યો છે પ્રચાર, કારણ કે...
એ વાત જુદી છે કે એક વખત સિટીઝન ફીડબેકના માર્કસ મેળવ્યા બાદ આ એપને જે તે કર્મચારી-અધિકારીએ ડિલીટ કરી નાખી છે, પરંતુ સત્તાધીશોના મનમાં સ્વચ્છતા સર્વેક્ષણમાં યેનકેન-પ્રકારેણ અમદાવાદનો પ્રથમ ર૦માં સમાવેશ થાય તેવો આશય રહ્યો હોવાથી સ્વચ્છતા એપ્લિકેશન એપનો જોરશોરથી પ્રચાર-પ્રસાર કરાયો, પરંતુ એએમસી સેવા એપમાં તંત્રની દૃષ્ટિએ કોઇ ‘માર્કસ’ મેળવવાના ન હોઇ તેના પર કોઇની ‘અમી નજર’ પડતી નથી તેવું પણ જાણકાર સૂત્રો વધુમાં જણાવે છે.