અમદાવાદઃ AMC દ્વારા વીજ બીલ ઘટાડવા માટે સ્ટ્રીટ લાઈટોનું LED કન્ઝર્વેશન અને વિન્ડ પાવર જેવાં અનેક પ્રોજેક્ટો શરૂ કરવામાં આવ્યાં પણ આ તમામ પ્રોજેક્ટ AMCને મોંઘા પડી રહ્યાં છે.
AMC વીજ બીલ બચતનાં બણગા ભલે ફૂંકે પણ વાસ્તવિકતા એ છે કે દર વર્ષે વીજનો વપરાશ વધી રહ્યો છે અને 10 વર્ષમાં વીજ બીલ 90 કરોડથી વધીને 300 કરોડ થઈ ગયું છે.
AMC દ્વારા શહેરની દોઢ લાખ સ્ટ્રીટ લાઈટને LED કન્ઝર્વેશન કરવાનું કામ હાથ ધરાયું હતું. જેમાંથી 95 ટકા સ્ટ્રીટ લાઈટનું કન્ઝર્વેશન થઈ ગયું છે. તેમ છતાં વીજ બીલ ઘટ્યું નથી તેવું દેખાઈ રહ્યું છે.
આ પ્રોજેક્ટમાં કોન્ટ્રાક્ટર ખુદ LED લાઈટનો ખર્ચ ભોગવે છે અને તે સ્ટ્રીટ લાઈટમાં LED લગાવે છે. જેથી જે-તે ઝોન કે વિસ્તારમાં જેટલી વીજ બચત થઈ તેનો મોટો ભાગ તે મેળવે છે. જ્યારે AMCને આંશિક ફાયદો જ થાય છે.
આ પ્રોજેક્ટમાંથી મોટા ભાગનાં પ્રોજેક્ટ પાંચ વર્ષની મુદ્દતનાં છે. માટે સ્થિતિ એવી છે કે પાંચ વર્ષ બાદ નવેસરથી સ્ટ્રીટ લાઈટમાં LED લગાવવાનો ખર્ચ AMCને ભોગવવો પડી શકે છે. કાં તો પછી કોન્ટ્રાક્ટરને.
જો કે મ્યુનિસિપલ કોર્પોરેશન એવો દાવો કરી રહ્યું છે કે સ્ટ્રીટ લાઈટ LED કર્યા બાદ માસિક વીજ બીલમાં 3.50 કરોડ ઘટીને 2.20 કરોડ થઈ ગયું છે. જેથી વાર્ષિક 15.50 કરોડની બચત થઈ રહી છે. જો કે આ બચત પૈકી AMCને ખરેખર કેટલા નાણાં મળી રહ્યાં છે અને કોન્ટ્રાક્ટરને કેટલો લાભ મળી રહ્યો છે તે મુદ્દે કોઈ જ સ્પષ્ટતા નથી કરી રહ્યાં.