અમદાવાદની બોડીલાઇન હોસ્પિટલને અમદાવાદ મ્યુનિસિપલ કોર્પોરેશન દ્વારા નોટિસ આપવામાં આવી છે. બોડીલાઇન હોસ્પિટલને કૉવિડ-19 હોસ્પિટલ જાહેર કરવામાં આવી છે. નિયમોનું પાલન ન કરવામાં આવતા બોડીલાઇન હોસ્પિટલને નોટિસ આપવામાં આવી છે. હોસ્પિટલ દ્વારા દર્દી પાસેથી ચાર્જ વસૂલવામાં આવ્યા હતાં. હોસ્પિટલે કોર્પોરેશને રિફર કરાયેલા દર્દી પાસેથી ચાર્જ વસૂલ્યાં હતાં. આ અંગે હોસ્પિટલ પાસેથી AMCએ ખુલાસો માંગ્યો છે.
બોડીલાઇન હોસ્પિટલે નિયમોનું પાલન ન કરતા AMCની નોટિસ
હોસ્પિટલે AMCએ રિફર કરાયેલા દર્દી પાસેથી ચાર્જ વસૂલ્યા હતા
ધી એપેડેમિક ડિસિઝ એક્ટ હેઠળ MoU કરી પાલડીની બોડીલાઇન હોસ્પિટલને કોવિડ હોસ્પિટલ જાહેર કરવામાં આવી છે. જેમાં 50 ટકા બેડ કોરોના દર્દીઓ માટે રિઝર્વ રાખવા કોર્પોરેશન દ્વારા હુકમ કરવામાં આવ્યો છે. તેમજ દર્દીઓ પાસેથી કોઈ ચાર્જ વસુલવાનો રહેતો નથી. તેમ છતા પણ બોડીલાઇન હોસ્પિટલ દ્વારા દર્દી પાસેથી ચાર્જ વસૂલવામાં આવ્યા હતાં.
કોરોના ટેસ્ટના 4500 રૂપિયા વસૂલ્યા
અમદાવાદના પાલડી વિસ્તારમાં આવેલી બોડીલાઇન હોસ્પિટલને અમદાવાદ મ્યુનિસિપલ કોર્પોરેશન દ્વારા નોટિસ ફટકારવામાં આવી છે. અમદાવાદ કોર્પોરેશન દ્વારા બોડીલાઇન હોસ્પિટલને કૉવિડ હોસ્પિટલ જાહેર કરવામાં આવી છે. જેમાં SVP હોસ્પિટલ દ્વારા 2 દર્દીઓને અહીં મંગળવારે રિફર કરવામાં આવ્યા હતા. જ્યાં હોસ્પિટલે કોરોના ટેસ્ટ પેટે 4500 રૂપિયા વસૂલ્યા હતા. આ ઉપરાંત અન્ય એક દર્દી પાસેથી પણ પૈસા વસૂલ્યા હતા.
1 દિવસમાં ખુલાસો કરવા નોટિસ
આ અંગે કોર્પોરેશનને જાણ થતા હોસ્પિટલને નોટિસ ફટકારવામાં આવી છે. હુકમનો ભંગ કર્યો હોવાથી હોસ્પિટલનું C ફોર્મ કેમ કેન્સલ ન કરવું તેનો એક દિવસમાં ખુલાસો કરવા નોટિસ આપી છે. જો હોસ્પિટલ ખુલાસો નહીં કરે તો એપેડેમિક એક્ટ મુજબ કાયદેસરની કાર્યવાહી કરવામાં આવશે.