હોબાળો / VIDEO: AMCની સામાન્ય સભામાં રખડતા ઢોરના મુદ્દે કોંગ્રેસ અને ભાજપના કાઉન્સિલરો બાખડ્યા!

• AMCની સામાન્ય સભામાં કોંગ્રેસ બની આક્રમક
• એક બાદ એક મુદ્દાઓને લઇ સત્તાપક્ષને ઘેરવાનો પ્રયાસ
• રખડતા ઢોર મુદ્દે કોંગ્રેસ કર્યો સૂત્રોચ્ચાર 

રખડતા ઢોર... હાલ રાજ્યના તમામ મહાનગરો અને શહેરો માટે મોટો પ્રશ્ન બની ગયો છે. કારણ કે, રખડતા ઢોરના કારણે અનેક રોડ અકસ્માત થઈ રહ્યા છે. અનેક લોકોએ ચાલુ વર્ષે જીવ પણ ગુમાવ્યા છે. હવે આ મામલે મહાનગરપાલિકાઓ ચર્ચાઓ શરૂ થઇ ચૂકી છે. ત્યારે મંગળવારે અમદાવાદ મ્યુનિસિપલ કોર્પોરેશન(AMC)ની સામાન્ય સભા દરમિયાન હોબાળો મચી ગયો હતો. કોંગ્રેસે એક બાદ એક મુદ્દાઓને લઇને સત્તાપક્ષને ઘેરવાના પ્રયાસ કર્યા હતા. તો રખડતા ઢોર મુદ્દે કોંગ્રેસે સૂત્રોચ્ચાર કર્યા હતા. આ દરમિયાન કોંગ્રેસના કાઉન્સિલરોએ ભાજપ પર આક્ષેપો પણ લગાવ્યા હતા.

અત્રે ઉલ્લેખનીય છે કે, અમદાવાદ શહેરને રખડતા પશુઓના ત્રાસમાંથી મુક્ત કરવા માટે અમદાવાદ મહાનગર પાલિકાના સત્તાધીશોને થોડા દિવસ અગાઉ પ્રદેશ ભાજપ પ્રમુખ સી. આર. પાટીલે હાંકલ કરી હતી, જોકે સ્થિતિ જેમની તેમ જ છે. અમદાવાદ મહાનગર પાલિકાની હદમાં જાહેર માર્ગો પર પશુઓ રખડતા જોવા મળે છે. જેની સામે CNCD વિભાગ પગલાં ભરવામાં નિષ્ફ્ળ ગયું છે. 

મહત્વના સૂત્રો તરફથી મળતી માહિતી પ્રમાણે CNCD વિભાગના અધિકારીઓ અને ઢોર માલિકોની મિલી ભગતના પરિણામે અમદાવાદ શહેરને ઢોરના ત્રાસમાંથી મુક્તિ મળતી નથી. માત્ર શાસકો મોટી મોટી વાતો કરીને છટકી જાય છે. જેના પરિણામે નિર્દોષ વાહનચાલકો અને રાહદારીઓ રખડતા પશુઓના કારણે અકસ્માતનો ભોગ બની રહ્યાં છે. અમદાવાદના ઘાટલોડિયા, ચાંદલોડિયા, વાડજ, રાણીપ, બાપુનગર, રખિયાલ સહીત શહેરના મોટાભાગના વિસ્તારોમાં જાહેર માર્ગો પર રખડતા પશુઓ જોઈ શકાય છે. જેના પરિણામે નિર્દોષ નાગરિકો અકસ્માતનો ભોગ બનતા હોય છે.

અમદાવાદ શહેરમાં દરરોજ 125થી વધુ પશુઓ પકડવામાં આવે છેઃ હિતેશ બારોટ

ગત દિવસોમાં AMC સ્ટેન્ડિંગ કમિટી ચેરમેન હિતેશ બારોટે દાવો કર્યો હતો કે, અમદાવાદ શહેરમાં દરરોજ 125થી વધુ પશુઓ પકડવામાં આવે છે. રખડતા પશુઓની સમસ્યા દૂર નહીં થાય ત્યાં સુધી કાર્યવાહી ચાલુ રહેશે.