6 વર્ષ બાદ મ્યુનિસિપલ કોર્પોરેશન દ્વારા પ્રોપર્ટી ટેક્સ અને વ્હીકલ ટેક્સમાં વધારો કરાયો છે. કમિશનરના બજેટ બાદ તત્કાળ મ્યુનિ. ભાજપમાં ભારે કરબોજના આકરા પ્રત્યાઘાત પડ્યા હતા. ચૂંટણી વર્ષમાં ભારે કરબોજ લદાતાં શાસક પક્ષના કોર્પોરેટરોમાં તીવ્ર અસંતોષ ફેલાયો છે.
શહેરીજનો પર છ વર્ષ બાદ મ્યુનિસિપલ કોર્પોરેશન દ્વારા પ્રોપર્ટી ટેક્સ અને વ્હીકલ ટેક્સમાં વધારો કરાયો છે. રહેણાકમાં અંદાજે ર૦ ટકા પ્રોપર્ટી ટેકસ વધતાં રૂ.૪૦ કરોડ જ્યારે કોમર્શિયલ મિલકતમાં ૩૦ ટકા પ્રોપર્ટી ટેક્સ વધતાં રૂ.૧૭૮ કરોડનો બોજો પડશે. કમિશનર દ્વારા રૂ.ર૪૪ કરોડના નવા વેરા ઝીંકવાની દરખાસ્ત આવતાં શાસક ભાજપ પક્ષમાં ગણગણાટ ફેલાયો છે.
મ્યુનિસિપલ કમિશનર વિજય નહેરા દ્વારા ગત તા.૧૭ જાન્યુઆરીએ રૂ.૮૯૦૭.૩ર કરોડનું ડ્રાફટ બજેટ સ્ટેન્ડિંગ કમિટી સમક્ષ રજૂ કરાયું હતું. છ વર્ષ બાદ ડ્રાફટ બજેટમાં પ્રોપર્ટી ટેક્સમાં વધારો કરાયો છે. આ ઉપરાંત વ્હીકલ ટેક્સના સ્લેબ અને ટકાવારીમાં ફેરફાર કરીને નાગરિકો પાસેથી રૂ.ર૬ કરોડ ખંખેરી લેવાશે. આગામી નવેમ્બર-ડિસેમ્બરમાં મ્યુનિસિપલ કોર્પોરેશનની સામાન્ય ચૂંટણી છે. સતત ૧પ વર્ષથી સત્તાસ્થાને રહેનાર ભાજપ પક્ષમાં પ્રજાની એિન્ટ ઇન્કબન્સીનો ભય ફેલાયો છે, જેમાં ચૂંટણી વર્ષમાં ભારે કરબોજ લદાતાં શાસક પક્ષના કોર્પોરેટરોમાં તીવ્ર અસંતોષ ફેલાયો છે.
કમિશનરના બજેટ બાદ તત્કાળ મ્યુનિ. ભાજપમાં ભારે કરબોજના આકરા પ્રત્યાઘાત પડ્યા હતા. ભાજપના સિનિયર કોર્પોરેટરથી લઇ મોટા ભાગના કોર્પોરેટરે કરવેરાની કમિશનરની દરખાસ્તને સ્ટેન્ડિંગ કમિટીના રિવાઇઝડ બજેટમાં ફગાવી દેવાની માગણી ટોચના પાંચ હોદ્દેદારો સમક્ષ કરી છે. સ્ટેન્ડિંગ કમિટીનું રિવાઇઝડ બજેટ ફેબ્રુઆરીના પહેલા અઠવાડિયામાં રજૂ કરાશે. આ બજેટમાં સૂચિત કરવેરાને ફગાવી દેવાય તેેવી પૂરી શક્યતા છે. રિવાઇઝડ બજેટમાં ભાજપ શાસકો ડ્રાફટ બજેટમાં વધુ પ૦૦ કરોડનાે વધારો સૂચવી તેનું રૂ.૯૩૦૦ કરોડનું જંબો બજેટ રજૂ કરે તેવી શક્યતા છે.
જાણકાર સૂત્રો કહે છે, ચૂંટણી વર્ષ હોઇ ભાજપ મોવડીમંડળ ઉપરાંત પ્રભારીઓ પ્રદીપસિંહ જાડેજા, કૌશિક પટેલ, આઇ.કે. જાડેજા, આર.સી.ફળદુ અને સુરેન્દ્ર પટેલ વગેરે મનોમંથન કરી કરવેરાની દરખાસ્તને કમસે કમ હળવી કરે તેવી મ્યુનિ. ભાજપના ટોચના હોદ્દેદારોએ પણ રજૂઆત કરી છે.