અમદાવાદ / ગરમીનું પ્રમાણ વધતાં AMCના હેલ્થ વિભાગે જાહેર કરી સૂચના

ગુજરાતમાં ગરમીનો પારો ફરી એકવાર ઉચકાતા હાહાકાર મચી ગયો છે. ઉલ્લેખનીય છે કે બપોરના સમયે અમદાવાદમાં તાપમાન 43 ડિગ્રી સુધી પહોંચી રહ્યું છે. જો કે હવામાન વિભાગે પણ ગરમીનું પ્રમાણ હજુ પણ વધે તેવી શક્યતાઓ દર્શાવી છે. ત્યારે AMCના હેલ્થ વિભાગે પણ ગરમીના કારણે સૂચના જાહેર કરી છે.
 
તેમાં ખાસ કરીને બિલ્ડીંગની કન્સ્ટ્રક્શન લાઈનમાં કામ કરતા શ્રમિકોને બપોરના સમયે કામ ન કરવા માટે સૂચના આપવામાં આવી છે. આ સાથે જ ગરમીને પગલે પાણી અને અન્ય સુવિધાઓ પર પણ ખાસ ધ્યાન આપવામાં આવતું હોવાનું જણાવ્યું છે.
 
મહત્વનું છે કે અમદાવાદમાં સામાન્ય રીતે ગરમીનો પારો 45 ડિગ્રી સુધી પહોંચતો હોય છે, જેને રેડ એલર્ટમાં ગણવામાં આવે છે. 43 ડિગ્રીને પાર તાપમાનનો પારો પહોંચતા જ લોકોને બહાર નીકળવું પણ મુશ્કેલ પડી જાય છે. ત્યારે લોકો પણ ગરમીથી બચવા માટે ઠંડા પીણા અને જ્યુસ,ગોળાનો સહારો લઈ રહ્યા છે.

અમદાવાદીઓ ઉનાળાની આ કાળઝાળ ગરમીમાં હજી પણ તમે તપવા માટે તૈયાર રહેજો. હજી પણ બે દિવસ સુધી અમદાવાદમાં ગરમીનો પારો ઉંચે સુધી જઇ શકે છે. હવામાન વિભાગે એવી આગાહી કરી છે કે અમદાવાદમાં આગામી બે દિવસ 42થી 43 ડિગ્રી સુધી તાપમાન નોંધાશે. વધતી ગરમીને ધ્યાને રાખી હવામાન વિભાગ દ્વારા ઓરેન્જ એલર્ટ જાહેર કરાયું છે. તો બીજી તરફ બે દિવસ બાદ રાજ્યનાં કેટલાંક જિલ્લાઓમાં મોસમ પોતાનો મિજાજ બદલી શકે છે.