અમદાવાદ શહેરમાં વધતી પાર્કિંગની સમસ્યાનો કોન્ટ્રાક્ટરો ઉઠાવી રહ્યા છે લાભ, નિયત ચાર્જ કરતા વધુ વસૂલાત કરીને કોન્ટ્રાક્ટરો ભરી રહ્યા છે પોતાના ખિસ્સા
શહેરમાં વકરી રહી છે પાર્કિંગની સમસ્યા
પે પાર્કિંગના નામે ચાલી રહી છે ઉઘાડી લૂંટ
વીટીવી ન્યૂઝના કેમેરામાં કેદ થયો કોન્ટ્રાક્ટરોનો ભ્રષ્ટાચાર
નિયત કરવા વસૂલાય છે વધારે ચાર્જ
દિવસ જાય તેમ શહેરમાં પાર્કિંગની સમસ્યા વકરી રહી છે. એએમસી દ્વારા વિવિધ વિસ્તારોમાં ચાર્જ્ડ પાર્કિંગની સુવિધા કરવામાં આવી છે પરંતુ કોન્ટ્રાક્ટરો આ તકનો લાભ ઉઠાવીને પ્રજાને લૂંટવામાં મસ્ત બન્યા છે. વીટીવી ન્યૂઝના સ્ટિંગ ઓપરેશનમાં પે પાર્કિંગના નામે ઉઘરાવતા પૈસામાં પણ ભ્રષ્ટાચાર થતો હોવાની પોલ ખૂલી છે.
પે પાર્કિંગના નામે ઉઘાટી લૂંટ
અમદાવાદ શહેરમાં બ્રિજની નીચે પે પાર્કિંગ અલોટ કરવામાં આવ્યા છે. રોજના હજારો લોકો ચાર્જ આપીને પાર્કિંગ કરતા હોય છે. પરંતુ આ પૈસામાંથી અડધોઅડધ હિસ્સો તો કોન્ટ્રાક્ટરના ખિસ્સામાં જ જાય છે. તેનો પુરાવો વીટીવી ન્યૂઝના કેમેરામાં કેદ થયો. વીટીવી ન્યૂઝના સંવાદદાતાએ જ્યારે આ અંગે સ્ટિંગ ઓપરેશન કર્યુ શહેરની જનતાને ખુલ્લેઆમ લૂંટવામાં આવી હોવાનું સામે આવ્યું. પે પાર્કિંગનો એએમસીએ નક્કી કરેલો ચાર્જ 15 રૂપિયા છે પરંતુ કોન્ટ્રાક્ટરના માણસો સીધા જ 20 રૂપિયા પડાવી લે છે. કોન્ટ્રાક્ટરના માણસો બે કલાક સુધીના વાહન પાર્કમાટે 20 રૂપિયા ઉઘરાવે છે.
રસીદમાં લખ્યા છે રૂ.15 પરંતુ ઉઘરાવે છે રૂ.20
આ રસીદમાં જોઇ શકાય છે કે તંત્રએ ચાર્જ લખ્યો છે 15 રૂપિયા પરંતુ જ્યારે કોઇ પણ વ્યક્તિ ફોર વ્હિલ પાર્ક કરવા જાય તો તેની પાસેથી 20 રૂપિયા વસૂલમાં આવે છે. રસીદમાં બે કલાક માટે વાહન પાર્કિંગનો ચાર્જ 15 જ લખેલો છે છતાં મનફાવે તેમ આ લોકો વધારે ભાવ વસૂલે છે.
પાર્કિંગના નામે ઉઘાડી લૂંટ, તંત્ર અજાણ ?
એક તરફ એએમસી દ્વારા પાર્કિંગ વ્યવસ્થા જળવાય તે માટે પ્રયાસો કરી રહી છે. લોકોને હાલાકી ન પડે તે માટે ઠેર ઠેર પાર્કિંગ પોઇન્ટ બનાવી રહી છે પરંતુ કોન્ટ્રાક્ટરોને તો માત્ર મલાઇ ખાવામાં જ રસ હોય તેમ લાગી રહ્યું છે. 15 રૂપિયાના સીધા 20 રૂપિયા ચાર્જ વસૂલીને રોજનો હજારો રૂપિયાનો નફો ખિસ્સામાં લઇને ઘરે જાય છે. તંત્રએ પાર્કિંગ માટે ચાર્જ અગાઉથી નક્કી કર્યો છે પંરતુ કોન્ટ્રાક્ટરો નિયત ભાવ કરતા વધારે પૈસા લોકો પાસેથી પડાવી રહ્યા છે. કોન્ટ્રાક્ટરોની આવી મનમાની કોઇ એક જ જગ્યાએ નહી પરંતુ શહેરના મોટા ભાગના વિસ્તારોમાં ચાલી રહી છે. SG હાઇવે, આશ્રમ રોડ સહિતના વિસ્તારોમાં પાર્કિંગના નામે ઉઘાડી લૂંટ કરવામાં આવી રહી છે. ત્યારે અહીં સવાલ એ થાય કે આવી રીતે ખુલ્લેઆમ લૂંટ ચલાવાઇ રહી છે છતાં તંત્ર કેમ ચૂપ છે ? શું કોર્પોરેશનના અધિકારીઓને આની જાણ નથી ?
કોન્ટ્રાક્ટરે AMCના લિસ્ટમાંથી ભાવ જ છૂપાવી દીધા
અમદાવાદમાં સૌથી મોટી સમસ્યા પાર્કિંગની છે. પણ કોન્ટ્રાક્ટરોએ તો તેને નફો રળવાનું સાધન બનાવી દીધું. પાછુ નવાઇની વાત તો એ છે કે એએમસીના પાર્કિંગ ચાર્જની કિંમતનો જે ચાર્ટ છે તેમાંથી ફોર વ્હિલ અને મોટરસાઇકલના ભાવ હટાવી દેવાયા. જી, હા વીટીવી ન્યૂઝના સ્ટિંગ ઓપરેશનમાં કોન્ટ્રાક્ટરોના માણસોની આ કરતૂત કેમેરામાં કેદ થઇ હતી. સામાન્ય રીતે એએમસીનો આદેશ છે કે પાર્કિંગ સ્થળ પર ભાડાનુ લિસ્ટ લગાવાવમાં આવે પરંતુ અહીં તો નફાખોરોએ લગાવેલા લિસ્ટમાંથી ભાવ જ હટાવી દીધા જેથી તેઓ વધારે પૈસા લઇ શકે અને કોઇને ખબર પણ ન પડે.
2 કલાક સુધી વાહન પાર્ક કરવાનો શું છે ચાર્જ
સમય
વાહન
ચાર્જ
0 થી 2 કલાક
ટુ વ્હિલર
રૂ.5
0 થી 2 કલાક
થ્રી વ્હિલર
રૂ.10
0 થી 2 કલાક
ફોર વ્હિલર
રૂ.15
વીટીવી ન્યૂઝના સળગતા સવાલ
ત્યારે અહીં સવાલ એ થાય કે એએમસીના નિયમોને ઘોળીને પી જવાનો પરવાનો કોન્ટ્રાક્ટરોને કોણે આપ્યો. ? કોન્ટ્રાક્ટરો કેવી રીતે વસૂલી શકે મનફાવે તે ભાવ. ? શું આ કરતૂત વિશે તંત્રને જાણ નથી. ? રોજના હજારો અમદાવાદીઓ લૂંટાઇ રહ્યા છે છતાં તંત્ર ચૂપ કેમ. ? તંત્ર કોન્ટ્રાક્ટ આપીને કામીગીરીનું નિરીક્ષણ કરવાનું કેમ ભૂલી જાય છે. કોન્ટ્રાક્ટ મુજબ કાર્ય થઇ રહ્યું છે કે નહીં તે જોવાની જવાબદારી કોની ? શું આ નફાખોરીમાં કોન્ટ્ર્કટરો અને અધિકારીઓની મિલીભગત છે ?