દેશ શહીદોના શૉકમાં ત્યારે અમદાવાદમાં નેતાઓએ જે કર્યુ તે જોઈને શરમ આવશે

અમદાવાદ કોર્પોરેશનમાં ભાજપ-કોંગ્રેસે મર્યાદા નેવે મૂકી દેશના શહીદોના અંતિમ સંસ્કાર હજુ થયા નથી થયા ત્યાં નેતાઓનું રાજકારણ શરૂ થઈ ગયું હતું. શહીદોને શ્રદ્ધાંજલિ આપવાને બદલે ભાજપ-કોંગ્રેસે બૂમાબૂમો કરી મૂકી હતી. કોંગ્રેસના નેતાઓએ કોર્પોરેશન હોલમાં કપડા કાઢયા તો ભાજપ નેતાઓએ પણ કોંગ્રેસ સાથે બૂમાબૂમમાં સૂર પૂરાવ્યાં. શું શહાદતનો ગમ નથી અમદાવાદ ભાજપ-કોંગ્રેસના નેતાઓને? એક બાજુ ગુજરાત સહિત સમગ્ર દેશમાં જ્યારે સામાન્ય પ્રજા શહીદોને વીરાંજલિ આપવા માટે સ્વયંભૂ બંધ પાળી રહી છે ત્યારે પ્રજાનો જુસ્સો દેખાઈ આવે છે. આવામાં નેતાઓ પોતાના રાજકીય સ્વાર્થ માટે જે કરી રહ્યાં છે તે ખરેખર દુઃખદ વાત છે.

સમગ્ર ઘટનાની વાત કરીએ તો આજે મ્યુનિસિપલ મુખ્યાલયમાં આવેલા ગાંધી હોલમાં મળેલી બજેટ બેઠકમાં સવારે ૧૦ વાગ્યે મ્યુનિ. કોર્પોરેશન સલગ્ન ચારેય સંસ્થાનાં બજેટ ચર્ચા માટે મુકાયાં હતાં. જોકે ફક્ત એક કલાકમાં મેયર બીજલબહેન પટેલે બહુમતીના આધારે તમામ બજેટને મંજૂર કરતાં કોર્પોરેશનના ઇતિહાસમાં અભૂતપૂર્વ ઘટના બની હતી. પરંતુ આ ઘટનામાં ભાજપ-કોંગ્રેસના હોબાળાએ અમદાવાદ સહિત દેશભરને શરમમાં મૂક્યો હતો. દેશમાં જ્યારે જવાનોની શહીદીના શૉકમાં સૌકોઈ ગરકાવ છે ત્યારે આવું ગંદુ રાજકારણ રમીને હોબાળો કરવાની ક્યાં જરૂર હતી? મનપા બજેટ સત્ર ચોકીદાર ચોરના નારા લાગ્યાં હતાં. તેમ જ પુસ્તકો પણ ઉડાવવામાં આવ્યાં હતાં. 
 

મેયર બીજલબહેન પટેલની અધ્યક્ષતામાં આજે સવારે ૧૦ વાગ્યે બજેટ બેઠકનો પ્રારંભ થયો હતો. બે દિવસની બજેટ બેઠકના આજના પહેલા દિવસે પહેલા સ્કૂલ બોર્ડ ત્યાર બાદ એમજે લાઇબ્રેરી વીએસ હોસ્પિટલ એએમટીએસ અને છેલ્લે જનરલ બજેટને ચર્ચા માટે ક્રમશઃ લેવાનાં હતાં. બજેટ બેઠકનો પ્રારંભ  પૂર્વ નિર્ધારીત સમય મુજબ થયો હતો બજેટ બેઠકમાં સ્કૂલ બોર્ડના આગામી નાણાકીય વર્ષ ર૦૧૯-ર૦ના રૂપિયા ૬૭૩ કરોડના બજેટને સ્ટેન્ડિંગ કમિટીના ચેરમેન અમૂલ ભટ્ટ દ્વારા ચર્ચા માટે મુકાયું હતું. અમૂલ ભટ્ટ દ્વારા સ્કૂલ બોર્ડના બજેટને મૂવ કરાયા બાદ કોંગ્રેસના વરિષ્ઠ કોર્પોરેટર સુરેન્દ્ર બક્ષીની ગેરહાજરીમાં જગદીશ રાઠોડ દ્વારા તેમાં  પક્ષ વતી સુધારા મુકાયા હતા જોકે કોંગ્રેસના સભ્યને રજૂઆત કરતા રોકતા ગૃહમાં હોબાળો મચ્યો હતો. આ દરમિયાન ભાવનાબહેન નાયકે બજેટની ચર્ચાને આગળ વધારતા ગૃહ શોરબકોરમાં ફેરવાઇ ગયું હતું. આ દરમિયાન પક્ષ નેતા અમિત શાહે મ્યુનિસિપલ કોર્પોરેશનની કલમ-૨૫ હેઠળનો ઉલ્લેખ કરીને જો સભ્યોને બજેટની ચર્ચામાં રસ ન હોય તો તે મંજૂર કરી શકાય છે તેવો ઉલ્લેખ કર્યો હતો. 

અમિત શાહ દ્વારા બજેટને મંજૂરી અપાવવાની બાબતનો ઉચ્ચાર કરતાં ગૃહમાં શોરબકોર વધ્યો હતો. કોંગ્રેસના કેટલાક સભ્યોએ પોતાની બેઠક ઉપરથી ઊભા થઇ ભાજપ તેરી તાનાશાહી નહીં ચલેગી તેવો સૂત્રોચ્ચાર કર્યો હતો. સમગ્ર ગૃહમાં ભારે ધાંધલ ધમાલ મચવાથી કોણ શું બોલી રહ્યું છે તે કશું સંભળાતું ન હતું. આવા ઘોંઘાટભર્યા મહોલમાં મેયર બીજલબહેન પટેલે મ્યુનિ. કોર્પોરેશન સંલગ્ન સ્કૂલ બોર્ડ એમજે લાઇબ્રેરી વીએસ હોસ્પિટલ એએમટીએસના આગામી નાણાકીય વર્ષ ર૦૧૯-ર૦ના ક્રમશ રૂપિયા ૬૭૩ કરોડ રૂ.૧ર.૮૬ કરોડ રૂપિયા ર૧૩.૩૬ કરોડ અને રૂ.૪પ૦ કરોડના બજેટને બહુમતીના આધારે મંજૂરી આપી હતી. મેયર બીજલબહેન પટેલે માત્ર દોઢ કલાકમાં ચારેય સંસ્થાનાં બજેટને બહાલી આપીને ગૃહને આના દિવસ પૂરતું મુલતવી રાખ્યું હતું. 

જાણકાર સૂત્રો કહે છે આજની બજેટ બેઠકના પહેલા દિવસે સાંજના ૭ વાગ્યા સુધી આ ચારેય સલગ્ન સંસ્થાની ચર્ચા થવાની હતી અને આવતી કાલે જનરલ બજેટ પર ચર્ચા કરાઇને છેલ્લે આ તમામ બજેટ પર મતદાન લેવાનું હતું. પરંતુ કોર્પોરેશનના ઇતિહાસમાં પ્રથમવાર માત્ર એક કલાકમાં ચારેય બજેટને મંજૂરી અપાઇ છે. હવે આવતી કાલે સવારે ૧૦ વાગે જનરલ બજેટની ચર્ચા માટે બોર્ડ મળશે.