અમદાવાદ મ્યુન્સિપલ કોર્પોરેશન દેવાદાર બની ચૂક્યું છે.અમદાવાદ મ્યુન્સિપલ કોર્પોરેશનની તિજોરી તળિયાઝાટક હોવાથી હવે વિકાસના કામો કરવા માટે AMC દ્વારા લોન લેવામાં આવશે. જેને લઈને AMC એ ગ્રીન બોન્ડ બહાર પાડ્યા છે. આથી આવક કરતા જાવક વધારે તેવી અમદાવાદ મહાનગરપાલિકાની સ્થિતિ જન્મી છે.
સરકાર પાસે 50 ટકા સહાયતા માટે ગ્રીન બોન્ડ બહાર પાડશે
અમદાવાદને રાજ્યનું આર્થિક પાટનગર ગણવામાં આવે છે. અમદાવાદ મ્યુન્સિપલ કોર્પોરેશન કે જેનું બજેટ રાજ્યની તમામ મહાનગર પાલિકામાં સૌથી વધુ હોય છે. પરંતુ બજેટ વધુ હોવા છતાં અમદાવાદ કોર્પોરેશન દેવાદાર બન્યું છે. જેને પગલે અમદાવાદ મહાનગરપાલિકા દ્વારા હવે ગ્રીન પ્રોજેક્ટનો ગ્રીન બોન્ડ માટે લોન લેવામાં આવશે. જે અંગે 459 કરોડનો ડીપીઆર મંજૂર થયો છે. જેમાં સરકાર પાસે 50 ટકા સહાયતા માટે ગ્રીન બોન્ડ બહાર પાડશે. હાલ 200 કરોડના બોન્ડ બહાર પાડવામાં આવશે. આ લોનથી ગ્રીન હાઉસિંગ, વોટર રિસકલિંગ, ટ્રાન્સપોરટેશન પ્રોજેક્ટના કરવામાં આવશે. મહત્વનું છે કે હાલ 550 કરોડનું મનપા પર દેવું હોવાનું જાણવા મળી રહ્યું છે.
AMC માં 250 કરોડના બિલો હાલ પેન્ડિંગ
તો જીએસએફએસ પાસેથી વધુ 350 કરોડની લોન પણ લેવામાં આવશે. જની મર્યાદા સાત વર્ષની નક્કી કરવામાં આવશે. કોર્પોરેશનની હાલની સ્થિતિની વાત કરવામાં આવે તો AMC માં 250 કરોડના બિલો હાલ પેન્ડિંગ છે. તો 72 કરોડ રૂપિયા સરકાર પાસેથી AMC એ લેવાના બાકી છે. ગયા વર્ષે 963 કરોડના વિકાસના કામો થયા આ વર્ષે 1217 કરોડના વિકાસના કામો થયા છે. તો લાઈટથી માંડી પગાર સુધીનો 325 કરોડ ખર્ચ AMC ચલાવવા માટે થાય છે. જેની સામે અમદાવાદ મનપાના તિજોરીમાં દર વર્ષે 2468 કરોડ આવક પેટે ઠળવાઈ છે અને 2490 કરોડનો ખર્ચ જોવા મળી રહ્યો છે.
લોન લઈને વિકાસના કામો કરતી મનપાનું દેવું ક્યારે પૂર્ણ થશે : વિપક્ષ
બીજી બાજુ અમદાવાદ મનપામાં વિપક્ષે આક્ષેપ કર્યો છે કે માત્ર વિકાસના નામે પ્રજા પર બોજ વધારવામાં આવી રહ્યો છે. લોન લઇને મનપાનું દેવું વધારવામાં સત્તા પક્ષ કામ કરી રહ્યું છે. આ વર્ષનું મનપાનું બજેટ 10 હજાર કરોડ સુધીનું છે છતાં મનપા દેવામાં ડૂબી રહી છે. લોન લઈને વિકાસના કામો કરતી મનપાનું દેવું ક્યારે પૂર્ણ થશે તે જોવાનું રહ્યું.