મ્યુનિસિપલ કોર્પોરેશન માટે ઓક્ટ્રોય નાબૂદી બાદ આવકનો એકમાત્ર સ્રોત પ્રોપર્ટી ટેક્સ છે. તંત્ર દ્વારા ચાલુ વર્ષમાં પ્રોપર્ટી ટેક્સની આવક પેટે રૂ.૧૦પ૦ કરોડનો લક્ષ્યાંક નક્કી કરાયો છે. આ લક્ષ્યાંકને ૩૧ માર્ચ, ર૦ર૦ સુધીમાં મેળવી શકાય તેવી શક્યતા છે, પરંતુ સત્તાવાળાઓ માટે પ્રોપર્ટી ટેક્સના ડિફોલ્ટર્સ સૌથી મોટો માથાનો દુખાવો છે. લાખો-કરોડો રૂપિયાનો ટેક્સ બાકી હોય તેવા ડિફોલ્ટર્સને કાયદાના સાણસામાં લેવા તેમના રેવન્યૂ રેકોર્ડમાં બોજો નોંધાવવાની દિશામાં તંત્રએ ચક્રો ગતિમાન કર્યાં છે.
AMCએ લોકોની રજૂઆત ગંભીરતાથી લીધી
પ્રોપર્ટી ટેક્ષ બાકી હોય તો થઈ શકે છે હરાજી
ટોચના આઠ દસ ડિફોલ્ટર્સનો રૂ.૭૦ કરોડનો ટેક્સ ચૂકવાયો નથી
સરકારી મિલકતો જેવી કે એરપોર્ટ ઓથોરિટી, રેલવેતંત્ર, ઇન્કમટેક્સ વગેરેનો મ્યુનિ. કોર્પો.માં લાખો-કરોડો રૂપિયાનો ટેક્સ બાકી બોલે છે. આ ઉપરાંત બંધ મિલ, પોલીસ વિભાગ વગેરેના પણ ટેક્સ બાકી છે. એક અંદાજ મુજબ રૂ.ર૦૦૦ કરોડનો ટેક્સ હજુ સુધી ભરાયો નથી, તેમાં પણ ટોચના આઠ દસ ડિફોલ્ટર્સનો રૂ.૭૦ કરોડનો ટેક્સ ચૂકવાયો નથી.
પ્રોપર્ટી ટેક્ષ બાકી હોય તો થઈ શકે છે હરાજી
તંત્રના ચોપડે જૂની ફોર્મ્યુલાનો પણ લાખોનો ટેક્સ બાકી બોલતો હોય કેટલાક ડિફોલ્ટર્સની મિલકતની સત્તાવાળાઓએ જાહેર હરાજી કરવા લીધી છે. આગામી દિવસોમાં પ્રોપર્ટી ટેક્સ વિભાગ વધુ ત્રણ મિલકતની જાહેર હરાજી કરશે. ડિફોલ્ટર્સની મિલકતને તાળાં મારવાં, તેમની મિલકતની હરાજી કરવી ઉપરાંત હવે સત્તાધીશોએ આવા મિલકતધારકોની મિલકત પર બોજો નાખવાની દિશામાં પણ કવાયત હાથ ધરી છે.
AMCએ લોકોની રજૂઆત ગંભીરતાથી લીધી
કલેક્ટર કચેરીના રેવન્યૂ વિભાગમાં મોટા ડિફોલ્ટર્સના ૭/૧ર જેવા રેવન્યૂ રેકોર્ડમાં બોજો નોંધવા માટેની મ્યુનિ. સત્તાવાળાએ રજૂઆત કરી છે. કલેક્ટર કચેરીએ પણ મ્યુનિસિપલ તંત્રની રજૂઆતને ગંભીરતાથી લીધી છે. એક વખત આવી મિલકતો પર બોજો નોંધાશે તો એક પણ ડિફોલ્ટર્સ તેની મિલકત અન્યને વહેંચી નહીં શકે કે તેમાં કોઇ પણ પ્રકારના ફેરફાર નહીં કરી શકે. આ અંગે મ્યુનિ. પ્રોપર્ટી ટેક્સ વિભાગના વડા દેવાશિષ બેનરજી કહે છે કે કલેક્ટર કચેરી સાથે મંત્રણા કરીને ટેક્સ લાયેબિલિટી બાબતને આગળ વધારાશે.