અમદાવાદમાં રખડતા ઢોરને અંકુશમાં લાવવા AMC એક્શનમાં આવ્યું છે. છેલ્લા 8 મહિનામાં 13,032 પશુઓને પકડવામાં આવ્યા છે. તો પશુ માલિકો પાસેથી લાખો રૂપિયાનો દંડ વસૂલ કરવામાં આવ્યો છે.
અમદાવાદમાં રખડતા પશુ મામલે AMCની કાર્યવાહી
8 મહિનામાં 13 હજાર 32 પશુ પકડવામાં આવ્યા
પશુ માલિકો પાસેથી અત્યાર સુધી 63.45 લાખનો વસૂલાયો દંડ
રાજ્યમાં રખડતાં ઢોરની વિકટ સમસ્યા માથાના દુઃખાવા સમાન બની ગઈ છે ત્યારે અમદાવાદ માં રખડતા ઢોર મામલે તંત્ર એક્શનમાં આવ્યું છે. શહેરમાંથી છેલ્લા 8 મહિનામાં 13032 ઢોર પકડી પાડી ઢોર માલિકો પાસેથી રૂ 63.45 લાખનો દંડ વસુલ્યો છે.
મનપાનું ઢોર નિયંત્રણ ખાતું કામે લાગ્યું
અમદાવાદમાં રખડતા ઢોરનો પ્રશ્ન વિકટ બની રહ્યો છે. શહેરીજનો ઘરેથી નીકળે એટલે રખડતાં ઢોર પ્રશ્ન પહેલા સામે આવે છે. શહેરમાં રખડના ઢોરની ઢિકે અનેક લોકો ચડ્યા છે અને જીવ પણ ગુમાવ્યા છે. ત્યારે હાઇકોર્ટની અનેક ટકોર બાદ આખરે મનપાનું ઢોર નિયંત્રણ ખાતું કામે લાગ્યું છે. છેલ્લા સાડા આઠ મહિનામાં તંત્ર દ્વારા 13032 ઢોર પકડવામાં આવ્યા છે તો તંત્ર દ્વરા ઢોર માલિકો પાસેથી અત્યાર સુધીમાં 63.45 લાખનો દંડ વસુલાયો છે.
ઢોર માલિકો દ્વારા 1229 ઢોરને છોડાવવામાં આવ્યા
ઢોર પકડવાની વિગત વાર કામગીરી પર નજર કરીયે તો એપ્રિલ મહિનામાં 912 મે મહિનામાં 1808 ઢોર પકડવામાં આવ્યા હતા. જુન મહિનામાં 1609 ઢોર, જુલાઈ મહિનામાં 1311 ઢોર પકડવામાં આવ્યા હતા. ઓગષ્ટ મહિનામાં 1299, સપ્ટેમ્બર મહિનામાં 2640 ઢોર પકડવામાં આવ્યા હતા. ઓક્ટોબર મહિનામાં 1019, નવેમ્બર મહિનામાં 1742 ઢોર પકડવામાં આવ્યા હતા. ડીસેમ્બર મહિનાની 12 તારીખ સુધીમાં 612 ઢોર પકડવામાં આવ્યા છે. જેની સામે અત્યાર સુધીમાં ઢોર માલિકો દ્વારા 1229 ઢોરને છોડાવવામાં આવ્યા છે.