લો બોલો! ભગવાન પછી લોકો ડોક્ટરને સ્થાન આપતા હોય પરંતુ આ ડોક્ટર નકલી નીકળે તો? અમદાવાદના લાંભા વિસ્તારમાં આવી જ ઘટના સામે આવી છે. AMCના આરોગ્ય વિભાગે દરોડા પાડી બોગસ ડિગ્રી ધરાવતા 10 તબીબોનો ઝડપી પાડ્યા છે.
અમદાવાદમાં બોગસ તબીબ સામે AMCની કાર્યવાહી
લાંભા વિસ્તારમાં AMC આરોગ્ય વિભાગના દરોડા
બોગસ ડિગ્રી ધરાવતા 10 તબીબ ઝડપાયા
બોગસ તબીબોના ક્લિનિક AMCએ સીલ કર્યા
અમદાવાદમાં બોગસ તબીબોનો રાફડો ફાટ્યો હોય તેવું લાગી રહ્યું છે. આજે અમદાવાદ મ્યુનિસિપલ કોર્પોરેશનના આરોગ્ય વિભાગે લાંભા વિસ્તારમાં દરોડા પાડીને બોગસ ડિગ્રી ધરાવતા 10 તબીબોને ઝડપી પાડ્યા છે તથા તેમના ક્લિનિકને પણ સીલ કરી દીધા છે.
બોગસ તબીબ સામે AMCની લાલ આંખ
મળતી માહિતી અનુસાર, શહેરના લાંભા વિસ્તારમાં AMCના આરોગ્ય વિભાગે દરોડા પાડ્યા હતા. આરોગ્ય વિભાગની ટીમો લાંભા વિસ્તારમાં આવેલ જનકલ્યાણ હોસ્પિટલ, સૌમીન ક્લિનિક, શ્રી ગુરુકૃપા ક્લિનિક, શિવાય ક્લિનિક, રાજ ક્લિનિક, આયુષ્માન ક્લિનિક પર ત્રાટકી હતી.
તપાસમાં 10 બોગસ તબીબ ઝડપાયા
આ દરમિયાન આરોગ્ય વિભાગની ટીમની તપાસમાં 10 જેટલા તબીબો બોગસ ડિગ્રીના આધારે ક્લિનિક ચલાવતા હોવાનું સામે આવ્યું હતું. જે બાદ ટીમોએ આ ડોક્ટોરોના ક્લિનિકોને સીલ કરવાની તજવીજ હાથ ધરી હતી.
કોની રહેમનજર હેઠળ ફૂલેફાલે છે નકલી ડોક્ટર
ખરેખર પ્રશ્ન થાય કે સામાન્ય લાયસન્સ ન હોય કે હેલમેટ ન હોય તો દંડ ફટકારતી અને ઈ મેમો મોકલતી સરકાર નકલી ડોક્ટર કે અન્ય હોદ્દેદારોને કેમ નહીં ઓળખી શકતી હોય? શું સરકારી આગેવાનોની રહેમનજર હેઠળ આવા ડોક્ટર ફુલેફાલે છે?
નડિયાદમાંથી ઝડપાયો હતો બોગસ તબીબ
આપને જણાવી દઈએ કે, તાજેતરમાં જ નડિયાદના માતરના સંધાણા ગામમાંથી SOGની ટીમે બોગસ ડોક્ટરને ઝડપી પાડ્યો હતો. તેની તપાસ કરતા તેની પાસે કોઈપણ પ્રકારની ડિગ્રી કે લાયસન્સ ન હોવાનું બહાર આવતા પોલીસ ટીમે દવાનો જથ્થો જપ્ત કરી કાયદેસરની કાર્યવાહી હાથ ધરી હતી. જિલ્લા SOGની ટીમે માતરના સંધાણા ગામના ભોઇવાસમાં રહેણાંક મકાનમાં દરોડો પાડી બોગસ ડોક્ટરને ઝડપી પાડયો હતો. પકડાયેલા બોગસ ડોક્ટર નરેશ રમણભાઇ ભોઇ (ઉં.46) ફક્ત ધો-12 પાસ હોવાનું તપાસમાં ખુલ્યુ હતું.વળી નરેશની પૂછપરછ કરતા તેની પાસે કોઈ માન્યતા પ્રાપ્ત ડિગ્રી ન હોવાનું જણાવ્યું હતું.