કેન્દ્રિય પ્રધાનમંડળે મોટર વિહિકલ (સંશોધન) બિલને મંજૂરી આપી દીધી છે. આ બિલમાં વાહનવ્યવહારના નિયમોના ઉલ્લંઘન પર ભારે દંડની જોગવાઈ કરવામાં આવી છે. ઉલ્લેખનીય છે કે, આ બિલ અગાઉ રાજ્યસભામાં પેન્ડિંગ હતું અને ૧૬મી લોકસભાનો કાર્યકાળ સમાપ્ત થયા બાદ તે નિષ્પ્રભાવી થઈ ગયું હતું. મોટર વિહિકલ (સંશોધન) બિલને સંસદના વર્તમાન સત્રમાં રજૂ કરવામાં આવશે.
અધિકૃત સૂત્રોના જણાવ્યા અનુસાર, બિલમાં એમ્બ્યુલન્સ, ફાયરબ્રિગેડ જેવી ઈમર્જન્સી સેવાનાં વાહનોને રસ્તો ન આપ્યો તો રૂ.૧૦ હજાર સુધીનો દંડ કરવાની આકરી જોગવાઈ પણ છે. એજ રીતે અયોગ્ય જાહેર થયા બાદ પણ વાહન ચલાવ્યું તો પણ રૂ.૧૦ હજાર દંડ ભરવો પડશે.
બિલમાં સડક સુરક્ષાનાં ક્ષેત્રમાં કડક નિયમોની જોગવાઈ કરવામાં આવી છે. સગીર વયના કિશોરો દ્વારા ડ્રાઈવિંગ, ડ્રાઈવિંગ લાઈસન્સ વગર વાહન ચલાવવું, ખતરનાક રીતે ડ્રાઈવિંગ કરવું, દારૂના નશામાં વાહન ચલાવવું, ઓવર સ્પીડિંગ અને ઓવરલોડિંગ જેવા નિયમોનું ઉલ્લંઘન કરવા સામે કડક અને ભારે દંડની જોગવાઈ પણ રાખવામાં આવી છે. ઓલા, ઉબેર જેવા એગ્રીગેટર્સ દ્વારા ડ્રાઈવિંગ લાઈસન્સના નિયમોનો ભંગ કરવામાં આવશે તો બિલની જોગવાઈ અનુસાર રૂ.એક લાખ સુધીનો દંડ કરવામાં આવશે.
બિલમાં રાખવામાં આવેલી જોગવાઈઓ ૧૮ રાજ્યના પરિવહન પ્રધાનની ભલામણના આધારે તૈયાર કરવામાં આવી છે. આ ભલામણોને સંસદની સ્થાયી સમિતિએ પણ ચકાસી હતી. બિલના ડ્રાફ્ટમાં ઓવર સ્પીડિંગ કરવા બદલ રૂ.૧૦૦૦થી ૨૦૦૦ સુધીનો દંડ કરવાની જોગવાઈ છે.
વીમા પોલિસી વગર વાહન ચલાવવા બદલ ૨૦૦૦ રૂપિયા સુધીનો દંડ રાખવામાં આવ્યો છે. હેલ્મેટ વગર વાહન ચલાવ્યું તો રૂ.૧૦૦૦નો દંડ અને ત્રણ મહિના સુધી લાઈસન્સ સસ્પેન્ડ કરવાની જોગવાઈ પણ રાખવામાં આવી છે. ખતરનાક રીતે ડ્રાઈવિંગ કરવા બદલ રૂ.૧૦૦૦નો દંડ વધારીને રૂ.૫૦૦૦ કરવામાં આવ્યો છે.
નવી જોગવાઈ પ્રમાણે કિશોર (સગીર વયના) દ્વારા વાહન ચલાવવાથી કોઈ ગુનો બને ત્યારે ગાડીના માલિક કે વાલીને દોષી માનવામાં આવશે અને વાહનનું રજિસ્ટ્રેશન રદ્દ કરવામાં આવશે. આ ઉપરાંત વાહન માલિક કે વાલીને દોષી જાહેર કરીને તેમને ત્રણ વર્ષની સજા ઉપરાંત રૂ.૨૫ હજાર સુધીનો દંડ પણ ફટકારવામાં આવશે.
સંશોધન બિલના ડ્રાફ્ટ અનુસાર હવે ટ્રાફિકના નિયમોના ઉલ્લંઘન બદલ લઘુતમ ૧૦૦ રૂપિયાના દંડના બદલે રૂ.૫૦૦નો દંડ ભરવો પડશે. અધિકારીઓના આદેશનું પાલન નહીં કરવા બદલ ૫૦૦ રૂપિયાના દંડના સ્થાને હવે બે હજાર રૂપિયા ચૂકવવા પડશે.