ભાવનગર / શાળામાં વિદ્યાર્થીનીઓને બીભત્સ વીડિયો દેખાડતો વિકૃત્ત શિક્ષક જેલ હવાલે

ભાવનગરમાં શિક્ષક જગતને કલંક લાગે તેવી વધુ એક ઘટના ભાવનગરમાં બની છે. જેમાં ભાવનગરના મામાકોઠા રોડ પર આવેલ અંબિકા કન્યા શાળામાં ફરજ બજાવતા દિશાંત મકવાણા નામનો શિક્ષક છેલ્લા કેટલાય સમયથી હલકી અને માનસિક વિકૃત્તા ધરાવે છે. તે બાળાઓને ક્લાસ રૂમમાં પૂરી હેરાન પરેશાન કરતો રહે છે. સાથે બીભત્સ ચિત્રો દર્શાવી બાળાઓને પરેશાન કરતો હતો. જેની જાણ વાલીઓને થતા વાલીઓના ટોળા સી-ડીવીઝન પોલીસ સ્ટેશન પહોંચ્યા હતા. વાલીઓએ ફરિયાદ નોંધાવતા પોલીસે આ શિક્ષકની ધરપકડ કરી હતી.

બાળાઓ સાથે અડપલા કરતા અને બીભત્સ ચિત્રો બતાવી પરેશાન કરતો

સમાજમાં માં પછી જો કોઈ બીજા ગુરુ હોય તો એ શિક્ષક છે. પરંતુ આજકાલ અમુક શિક્ષકો અભ્યાસ કરાવવાને બદલે લંપટ લીલાઓ કરતા હોવાનું જોવા મળે છે. આવું જ બન્યુ છે ભાવનગરની એક સરકારી શાળા જેનું નામ અંબિકા કન્યાશાળા છે. અંબિકા કન્યા શાળામાં દિશાંત રસિકભાઈ મકવાણા નામનો શિક્ષક છેલ્લા ૫ વર્ષથી આ શાળામાં કાયમી શિક્ષક તેરીકે ફરજ બજાવે છે. આ શિક્ષક શાળામાં અભ્યાસ કરતી બાળાઓ સાથે અડપલા કરતા અને બીભત્સ ચિત્રો પોતાના ફોનમાં બતાવી પરેશાન કરતો હતો. શાળાની ચાર બાળાઓએ આ ઘટનાની જાણ પોતાના વાલીઓને કરતા મોટી સંખ્યામાં વાલીઓ પહેલા શાળાએ અને ત્યારબાદ પોલીસ મથકે પહોંચ્યા હતા. બાળાઓ પર થતા આ હલકાપણાને લઇને રજૂઆત કરી હતી.

ઘટનાની જાણ થતા પોલીસ શાળામાં દોડી આવી અને...

સરકારી શાળામાં આમ તો શિક્ષકો માટે શાસનાધિકારી મોબાઈલ પર મનાઈ ફરમાવી છે. તેમ છતાં કેટલાક શિક્ષકો સમય પાસ કરવા અને આવા હલકા કૃત્યો કરવા મોબાઈલનો ઉપયોગ કરે જ છે. આ ઘટનાની જાણ પોલીસને કરાતા પોલીસ શાળામાં દોડી આવી હતી અને આ શિક્ષક દિશાંત મકવાણાની ધરપકડ કરી હતી. આ બનાવને લઇ શહેરીજનો અને શિક્ષક જગતમાં ભારે ચકચાર મચી છે.

ભાવનગર શહેર અને જીલ્લામાં શિક્ષકો દ્વારા વિધાર્થીઓને માર મારવાના અનેક બનાવો સામે આવે છે. ત્યારે હલકું અને માનસિક વિકૃત ધરાવતા આવા શિક્ષકો પણ હવે શિક્ષણ આપવાને બદલે પોલીસ સ્ટેશનનાં લોકઅપમાં હવા ખાઈ રહ્યા છે.