ભંગાણના સંકેત? /  'મજબૂત નેતા પાર્ટીમાં આવે તેવું દરેક પાર્ટી ઇચ્છે', પાટીલના આડકતરા આમંત્રણ બાદ અંબરીશ ડેરના નિવેદનથી રાજકીય હડકંપ

• અંબરીશ ડેર માટે ભાજપમાં જગ્યા ખાલી જ છે: સી આર પાટીલ
• મજબૂત નેતા પાર્ટીમાં આવે તેવું દરેક પાર્ટી ઇચ્છે છે-ડેર
• અમિત ચાવડાએ પાટીલ પર કર્યા પ્રહાર
• પરેશ ધાનાણીએ ભાજપ પર કર્યો વાર

અંબરીશ ડેર ગુજરાત કોંગ્રેસનો જાણીતો અને દિગ્ગજ ચહેરો જે છેલ્લા 5 દિવસમાં 2 ભાજપના મોટા નેતાઓ સાથે જોવા મળતા રાજકારણ ગરમાયું છે. મંત્રી મુકેશ પટેલ સાથેની મુલાકાત બાદ અંબરીશ ડેરે ટ્વીટ કર્યું હતું અને  ફક્ત શુભેચ્છા મુલાકાત હોવાનું રટણ પણ કર્યું હતું.

જે બાદ આજે અમરેલીના બાબરીયા ધાર ગામે સમૂહ લગ્નમાં સી આર પાટીલ સાથે મંચ શેર કર્યો હતો. પાટીલના આડકતરા આમંત્રણ બાદ અંબરીશ ડેરે સ્પષ્ટતા કરી છે કે ભૂતકાળમાં ભાજપ યુવા મોરચામાં મે કામ કર્યું છે અને જાહેર જીવનમાં બધાને વાણી સ્વાતંત્ર્યનો અધિકાર છે, એના જ સંદર્ભે સી.આર.પાટીલે કહ્યું હોઇ શકે,પણ એ વાત તો નક્કી છે કે મજબૂત નેતા પાર્ટીમાં આવે તેવું દરેક પાર્ટી ઇચ્છે છે જેથી સી.આર.પાટીલ પોતાની જવાબદારીને ધ્યાને રાખી બોલ્યા હોઇ શકે.

અમિત ચાવડા અને પરેશ ધાનાણીએ કર્યા ભાજપ પર આકરા પ્રહાર
કોંગ્રેસના ધારાસભ્ય અમરીશ ડેરને લઇ ગુજરાત કોંગ્રેસ પ્રમુખ અમિત ચાવડા અને વિપક્ષ નેતા પરેશ ધાનાણીએ નિવેદન આપ્યું. તેઓએ કહ્યું કે ભાજપ પાસે કોઈ નેતા નથી એટલે લોકોના ઈમાન ખરીદવા નીકળ્યા છે. અમરીશ ડેર કોંગ્રેસના સૈનિક છે એમને ખરીદી ન શકાય. તેઓએ કહ્યું કે જનમત હોવાનો દાવો કરતા ભાઉ કોગ્રેસના નેતાઓને કેમ આવકારી રહ્યા છે. ભાજપને જન સમર્થનમાં શંકા છે તે આ વાતથી સાબિત થાય છે. ભાજપ તમામ મોરચે નિષ્ફળ ગઇ છે. અને ભાજપના ઇશારે કોઈ પણ કોંગ્રેસ કાર્યકર રાજકીય આત્મહત્યા નહિ કરે. પરેશ ધાનાણીએ કહ્યું કે ભાજપ પાસે એવા નેતા જ નથી જેનાથી તેઓ ચૂંટણી જીતી શકે અને સરકાર બનાવી શકે. 2022માં ભાજપના કમલમ કાર્યાલયમાં તાળા વાગી જશે.

પાટીલે અંબરીશ ડેરને આપ્યું આડકતરું આમંત્રણ
અમરીશ ડેરનું ભાજપમાં જોડાવવાની વાતોને લઈને ચર્ચા જોરશોરથી ચાલી રહી છે ત્યારે સી. આર પાટીલના આ નિવેદને બળતામાં ઘી હોમવા જેવું છે. પાટીલે કહ્યું હતું કે અમરીશ ડેર તો ભાજપના કાર્યકર્તા હતા અને કામ કરી ચૂક્યા છે. મારા પણ મિત્ર છે અને મારે તો ડેરને એક વખત ખખડાવવાના છે, મારો અધિકાર છે. અમરીશ ડેર માટે ભાજપમાં જગ્યા ખાલી જ છે. જેમ બસમાં આપણે આપણા મિત્રો માટે જગ્યા ખાલી રાખીએ તેમ તેમની માટે ભાજપમાં જગ્યા ખાલી જ છે. તેમણે આગળ એમ પણ કહ્યું હતું કે ભાજપની પાર્ટીના ઘણા લોકો ડેરના ખાસ મિત્રો છે.