રાજ્યના વાતાવરણને લઈને હવામાન નિષ્ણાંત અંબાલાલ પટેલ મોટી આગાહી કરી છે. તેમણે જણાવ્યું કે રાજ્યમાં 3-4 માર્ચથી ગરમીમાં વધારો થશે. એપ્રિલમાં 45 ડિગ્રી કરતા વધારે તાપમાન નોંધાશે.
રાજ્યના વાતાવરણને લઇ અંબાલાલ પટેલની આગાહી
ઉત્તર ગુજરાતમાં 24થી 27 જાન્યુઆરી દરમિયાન વધશે ઠંડી: અંબાલાલ
20 ફેબ્રુઆરીથી ગરમીની શરૂઆત થશે- અંબાલાલ
ગુજરાતમાં ઠંડીના માહોલ વચ્ચે હવામાન નિષ્ણાંત અંબાલાલ પટેલે ગુજરાતમાં ક્યાં સુધી કડકડતી ઠંડી પડશે અને ગરમીની શરૂઆત ક્યારથી થશે તે અંગે મોટી આગાહી કરી છે. તેમણે જણાવ્યું છે કે, રાજ્યમાં હાલ ઠંડીમાં ઘટાડો નોંધાયો છે. પરંતુ આગામી 24મી જાન્યુઆરીથી ઠંડીનો બીજો રાઉન્ડ શરૂ થશે અને ઉત્તર ગુજરાતમાં ઠંડીનું પ્રમાણ વધશે. સાથે જ સૌરાષ્ટ્ર-કચ્છ, મધ્ય અને દક્ષિણ ગુજરાતમાં પણ 24થી 27 જાન્યુઆરી દરમિયાન ઠંડી વધશે. આ દરમિયાન બર્ફીલા પવનોની અસર જોવા મળશે. 29મી જાન્યુઆરીની આસપાસ વાદળછાયું વાતાવરણ રહેવાની શક્યાતાઓ છે.
3-4 માર્ચથી ગરમીમાં વધારો થશેઃ અંબાલાલ
હવામાન નિષ્ણાંત અંબાલાલ પટેલે જણાવ્યું કે, જાન્યુઆરીના અંતમાં અને ફેબ્રુઆરીની શરૂઆતમાં જે ઠંડી પડશે તે આકરી હશે. આ સાથે રાજ્યમાં આગામી 20મી ફેબ્રુઆરીથી ગરમીની શરૂઆત થશે. આ ઉપરાંત 3-4 માર્ચથી ગરમીમાં વધારો થશે. તેમણે જણાવ્યું કે, 26 એપ્રિલે 45 ડિગ્રી કરતા વધુ તાપમાન નોંધાશે. 26 એપ્રિલ પછી સમુદ્રમાં હલચલ શરૂ થશે. 10 અને 11 મેના રોજ બંગાળના ઉપસાગરમાં વાવાઝોડું આવશે.
આજે અમદાવાદમાં 10.8 ડિગ્રી ઠંડી પડી
આપને જણાવી દઈએ કેક, ઉત્તર ભારતના પર્વતીય રાજ્યોમાં થતી હીમવર્ષા તેમજ વરસાદથી કરોડો લોકોના સામાન્ય જનજીવન પર માઠી અસર પડી છે. વેસ્ટર્ન ડિસ્ટર્બન્સના કારણે જમ્મુ-કાશ્મીર, ઉત્તરાખંડ અને હિમાચલ પ્રદેશમાં હવામાન લોકો માટે પડકારજનક બન્યું છે. હિમાચલમાં બેથી ત્રણ ફૂટ બરફ પડતાં અનેક માર્ગોને બંધ કરવા પડ્યા છે. આ હીમપ્રપાતથી ગુજરાતમાં પણ કાતિલ ઠંડીએ ભારે કહેર મચાવ્યો છે. અમદાવાદમાં શીતાગાર ડંખીલા પવનોએ લોકોને ધ્રુજાવ્યા બાદ આજે બેઠી ઠંડીથી ધ્રૂજવાનો વારો આવ્યો છે. આજે શહેરમાં ઠંડા પવનોનું જોર કંઈક અંશે ઓછું હતું, પરંતુ બેઠી ઠંડીથી લોકોની હાલત કફોડી બની હતી. ગઈ કાલની 11.7 ડિગ્રી ઠંડીની સામે આજે 10.8 ડિગ્રી ઠંડી પડી હતી, જે સામાન્ય તાપમાન કરતાં એક ડિગ્રી ઓછી હતી.
આજે ક્યાં કેટલું નોંધાયું તાપમાન?
આજે ગુજરાતમાં પણ ઠંડીની અસર જળવાઈ રહી હતી. દાહોદ, ગાંધીનગર, નલિયા, નર્મદા, પંચમહાલ અને વલસાડ એમ રાજ્યનાં કુલ છ શહેરોમાં ઠંડીનો પારો 10 ડિગ્રીથી નીચે ગગડ્યો હતો. પંચમહાલમાં આજે 8.9 ડિગ્રી સેલ્સિયસ લઘુતમ તાપમાન નોંધાયું હતું કે જે રાજ્યભરમાં સૌથી નીચું તાપમાન હતું. ગુજરાતનાં પ્રમુખ શહેરોમાં આજની ઠંડીની વિગત તપાસતાં અમરેલી 10.04, વડોદરા 14, ભાવનગર 14.1, ભૂજ 10.7, છોટાઉદેપુર 11.2, દાદરા-નગર હવેલી 15.6, દાહોદ 8.8, દમણ 14.6, ડીસા 11.1, દીવ 13.6, દ્વારકા 15.2, ગાંધીનગર 9.8, જામનગર 15.1, જૂનાગઢ 17.4, કંડલા 12.5, નલિયા 9.8, રાજકોટ 11.2, સુરત 15.6 અને વેરાવળમાં 15.2 ડિગ્રી સેલ્સિયસ લઘુતમ તાપમાન નોંધાયું હતું