હવામાન વિભાગની આગાહી મુજબ 7 માર્ચે વરસાદ થવાની સંભાવના જ્યારે અંબાલાલની આગાહી મુજબ 5 થી 10 માર્ચ વચ્ચે વાતાવરણ બદલાશે
રાજ્યમાં થશે કમોસમની વરસાદ
પશ્ચિમી વિક્ષેપને કારણે વરસાદ
5 થી 10 માર્ચ વચ્ચે વાતાવરણ બદલાશે
રાજ્યમાં હજુ રાત્રે અને વહેલી સવારે ઠંડીનો આંશિક ચમકારો અનુભવાય છે. જ્યારે દિવસ દરમિયાન ઉનાળાની કાળઝાળ ગરમીનો તપારો લાગી રહ્યો છે. ત્યારે રાજ્યમાં ફરી કમોસમી વરસાદની આગાહી હવામાન નિષ્ણાંત અંબાલાલ પટેલ દ્વારા કરવામાં આવી છે.
5 થી 10 માર્ચ સુધી રાજ્યમાં કમોસમી વરસાદની શક્યતા - અંબાલાલ
અંબાલાલની આગાહી મુજબ પશ્ચિમી વિક્ષેપોને કારણે કમોસમી વરસાદની સંભાવના ગુજરાત પર મંડારાઈ રહી છે. જેમાં ખાસ કરીને ઉત્તર, દક્ષિણ ગુજરાતમાં લો પ્રેશરને કારણે વરસાદી ઝાપટા પડવાની વકી છે. અમદાવાદ ગાંધીનગરમાં વાદળછાયુ વાતાવરણ રહેશે તેવો વરતારો પણ અંબાલાલે આપ્યો છે. મધ્ય ગુજરાતમાં છૂટો છવાયો ક્યાંય ક્યાંય વરસાદ પણ પડી શકે છે. 5 થી 10 માર્ચ સુધી રાજ્યમાં વાદળછાયું વાતાવરણ રહેશે જેમાં હળવો વરસાદ થવાની શક્યતા છે.
સામાન્ય વરસાદ સાથે થંડરસ્ટોર્મની શક્યતા: હવામાન વિભાગ
હવામાન વિભાગના જણાવ્યા અનુસાર દક્ષિણ ગુજરાતના ડાંગ, તાપી અને નર્મદા સહિતના જિલ્લાઓમાં આગામી 7 માર્ચે હળવા વરસાદની સંભાવના છે. જેને લઈને રાજ્યના અન્ય ભાગોમાં ઠંડો પવન ફૂકાઈ શકે છે. હવામાન વિભાગની કમોસમી વરસાદની આગાહીના પગલે પાકને નુક્સાનની ભીતિ સેવાઈ રહી છે. ફરીથી એક વખત કમોસમી વરસાદની આગાહીના કારણે ખેડૂતોની ચિંતા વધી જવા પામી છે.
રાજ્યમાં અનેક વિસ્તારોમાં તાપમાન યથાવત રહેવાનું અનુમાન
જ્યારે રાજ્યના કેટલાક જિલ્લાઓનું વાતાવરણ શુષ્ક રહેવાની સંભાવનાઓ રહેલી છે. જેને લઈને રાજ્યના અનેક વિસ્તારોમાં મહત્તમ તાપામાન અને લઘુત્તમ તાપમાનનું પ્રમાણ યથાવત રહેવાનું અનુમાન રાજ્યના હવામાન વિભાગ દ્વારા કરવામાં આવ્યું છે.