છટણી / એમેઝોને પણ વહેતી ગંગામાં લગાવી ડૂબકી, 9 હજાર કર્મચારીઓને નોકરીમાંથી છુટા કરવાનું એલાન

• મંદીના વાગતા ભણકારા વચ્ચે વધુ એક વખત છટણી
• એમેઝોને વધુ એક વખત સ્ટાફ ઘટાડાની જાહેરાત કરી
• 9000 કર્મચારીઓને ઘર ભેગા કરી દેવામાં આવશે

મંદીના વાગતા ભણકારા વચ્ચે અનેક મોટી મોટી કંપનીઓએ પોતાના કર્મચારીઓને છુટા કરી દીધાના દાખલાઓ છે. આવી સ્થિતિ વચ્ચે છટણીના આ દોરમાં એમેઝોને વધુ એક વખત સ્ટાફ ઘટાડાની જાહેરાત કરી છે. જેમાં આગામી સમયમાં amazon માં કામ કરતા 9000 કર્મચારીઓને ઘર ભેગા કરી દેવામાં આવશે. તેવું સામે આવતા આ ગોજારો સિલસિલો ક્યારે અટકશે તેવું લોકો જણાવી રહ્યા છે. અત્રે નોંધનીય છે કે આ અગાઉ જાન્યુઆરી માસમાં પણ એમેઝોને 18 હજાર કર્મચારીઓને ઘર ભેગા કરી દીધા હતા.

કંપની દ્વારા કર્મચારીઓને છુટા કરવા અંગે નિર્ણય

Amazon કંપની દ્વારા કરવામાં આવતા છટણીના બીજા રાઉન્ડ અંગે માહિતી આપતા કંપનીના ચીફ એક્ઝિક્યુટિવ ઓફિસર એનડી જેસીએ જણાવ્યું હતું કે,કંપનીની વાર્ષિક આયોજન પ્રક્રિયા આ મહિને પૂર્ણ થવા જઈ રહી છે. ત્યારે હવે કંપની દ્વારા કર્મચારીઓને છુટા કરવા અંગે નિર્ણય લેવામાં આવ્યો છે અને તેમણે સ્પષ્ટ કરતા એવુ પણ જણાવ્યું કે કંપનીની સ્ટેટર્જી મુજબ આગામી સમયમાં નવી ભરતી પણ કરવામાં આવશે. ઉલ્લેખની એ છે કે એમેઝોન અગાઉ facebook ની કંપની મેટાએ પણ ચોખા શબ્દોમાં કહી દીધું હતું કે આ વર્ષે 10,000 જેટલા લોકો નોકરીથી હાથ ધોઈ બેસશે!

અગાઉ 18,000 લોકોને બતાવ્યો હતો બહારનો રસ્તો 

છટણી અંગે એવું જાણવા મળી રહ્યું છે કે એડબલ્યુએસ સિવાય કર્મચારીઓને છુટા કરવાની પ્રક્રિયાની અસર એડવર્ટાઇઝિંગ અને ટીચમાં જોવા મળશે કારણ કે આ વિભાગમાં કામ કરતા લોકોને ઘરભેગા કરી દેવામાં આવે તેવા ભણકારા વાગી રહ્યા છે. એવું પણ જાણવા મળી રહ્યું છે કે કંપનીની આર્થિક સ્થિતિ ડામાડોળ બનતા ખર્ચ ઘટાડવાના ભાવ સાથે આ નિર્ણય કરવામાં આવ્યો હોવાનું જણાઈ રહ્યું છે. હજુ જાન્યુઆરી માસમાં જ 18000 લોકોને કંપનીમાંથી બહારનો રસ્તો બતાવનાર amazon દ્વારા વધુ એક વખત મોટા પાયે છટણીની પ્રક્રિયા કરવામાં આવતા કર્મચારીઓમાં ફફડાટ ફેલાયો છે.