સામાન્ય રીતે એવું બને છે કે કોઈ ખેલાડી મેદાનમાં પોતાના પ્રદર્શનથી પ્રશંસકો વચ્ચે હીરો બનીને ઊભરે છે, પરંતુ કોઈ એવું કામ રિયલ લાઇફમાં પણ કરી દે તો પછી પૂછવું જ શું!
આવી જ એક ઘટના બ્રાઝિલમાં જોવા મળી છે. બ્રાઝિલના ૨૪ વર્ષીય ફૂટબોલર બ્રાયન બોરગેસે પોતાની પ્રેગ્નન્ટ પત્ની માટે દાયણની ભૂમિકા નિભાવવી પડી.
બ્રાયને પત્નીનો જીવ બચાવવા ઉપરાંત નવજાત બાળકી સેસિલિયાને પણ ઈજા થવાથી બચાવી લીધી. સોશિયલ મીડિયા પર આ ઘટનાનો વીડિયો વાઇરલ થયો છે. લોકો બ્રાયનની હિંમતને બિરદાવી રહ્યા છે.
બન્યું એવું કે બ્રાયનની પત્ની માયલેનાને જ્યારે લેબરપેન શરૂ થયું ત્યારે દંપતી પોતાનાં એપાર્ટમેન્ટમાંથી હોસ્પિટલમાં જવા નીકળ્યું, પરંતુ બ્રાયન પોતાની પત્નીને ઊંચકીને દોડ્યો. બ્રાયન પાર્કિંગમાં ઊભેલી કાર સુધી પહોંચે એ પહેલાં જ પત્નીનું દર્દ વધી ગયું. તે જમીન પર બેસી ગઈ. દર્દ અસહનીય બન્યું. આ દરમિયાન પત્નીએ બાળકીને જન્મ આપ્યો. બ્રાયને તરત જ નવજાત બાળકીને જમીન પર પડતાં બચાવી લીધી. ત્યાર બાદ પત્નીને સંભાળી અને બંનેને સુરક્ષિત રીતે હોસ્પિટલે પહોંચાડ્યાં.
આ દંપતીએ એરિજોના હોસ્પિટલના પ્રસૂતિ વોર્ડમાં અગાઉથી જ બુકિંગ કરાવી રાખ્યું હતું, પરંતુ ભગવાનને કંઈક અલગ જ મંજૂર હતું. પુત્રીના જન્મ બાદ બ્રાયન પોતાના મિત્રોની સહાયતાથી પત્નીને કારમાં લઈને હોસ્પિટલ પહોંચ્યો. હવે પત્ની અને બાળકી સ્વસ્થ છે. બાળકીનું વજન ૨.૯ કિલો છે. આ ઘટના હજુ થોડા દિવસ પહેલાંની જ છે.
બ્રાયન સેકન્ડ ડિવિઝનની ટીમ નોટિકો કેપિબરિબે એફસી તરફથી રમે છે. તેણે જણાવ્યું, ''આ પળ મને જિંદગીભર યાદ રહેશે. જ્યારે મારી પુત્રી સમજદાર થઈ જશે ત્યારે હું તેના જન્મ પર શું બન્યું હતું એ તેને જરૂર જણાવીશ.''