એટેક / 1 જુલાઈથી આરંભાતી અમરનાથા યાત્રા પર આ પ્રકારના હુમલાનો ખતરો

હાલ સીમા પાર ચાલી રહેલી સાજિશ પરથી સુરક્ષા એજન્સીઓને હવે એવા પાકા સંકેત મળ્યા છે કે આ વખતે પણ આવો આઇએસ ટાઇપ હુમલો થઇ શકે છે. આ સંદર્ભમાં જમ્મુમાં પણ સેના, બીએસએફ, પોલીસ, સીઆરપીએફના કેમ્પ આસપાસ કડક સુરક્ષા ગોઠવી દેવામાં આવી છે.

અમરનાથ યાત્રાના માર્ગ પર પણ કડક સુરક્ષા જાપતો ગોઠવવામાં આવી રહ્યો છે. વરિષ્ઠ અધિકારીઓ અમરનાથ યાત્રાની સુરક્ષાના પ્રત્યેક પાસાનું સઘન મોનિટરિંગ કરી રહ્યા છે અને આ પ્રકારના આતંકી હુમલાને નિષ્ફળ બનાવવા માટે નક્કર રણનીતિ તૈયાર કરી રહ્યા છે.

સુરક્ષાદળો આ મામલે કોઇ તક છોડવા માગતાંં નથી અને તેથી એક મહિના પૂર્વે જ તમામ તૈયારીઓ શરૂ કરી દીધી છે. અમરનાથ યાત્રાના માર્ગ પર અને તેની આસપાસ બારુદી સુરંગો છુપાવેલી છે કે કેમ? તે અંગે પણ ચેકિંગ ચાલી રહ્યું છે અને સમગ્ર માર્ગને સુરંગથી મુકત કરવા સક્રિય કાર્યવાહી ચાલી રહી છે.

દરમિયાન ૧ જુલાઇથી આરંભાઇ રહેલી અમરનાથ યાત્રા માટે રજિસ્ટ્રેશન કરાવવું ફરજિયાત છે. દર વર્ષે સરકાર દ્વારા અમરનાથ યાત્રીઓનો કવોટા નક્કી કરવામાં આવે છે. રજિસ્ટ્રેશન કરાવેલા યાત્રીઓ જ યાત્રામાં સામેલ થઇ શકશે. સરકાર દ્વારા તમામ શહેરોમાં નિયત બેન્ક બ્રાન્ચ મારફતે યાત્રીઓ રજિસ્ટ્રેશન કરાવી શકે છે.

એક યાત્રા પરમિટ પર માત્ર એક જ યાત્રીનું રજિસ્ટ્રેશન માન્ય ગણાશે. ૧૩ વર્ષથી ઓછી અને ૭પ વર્ષથી વધુ વય ધરાવનારનું રજિસ્ટ્રેશન થઇ શકશે નહીં. એ જ રીતે ગર્ભવતી મહિલાઓનું પણ રજિસ્ટ્રેશન કરવામાં આવતું નથી. દરેક યાત્રીએ અરજી સાથે મેડિકલ ફિટનેસ સર્ટિફિકેટ અને ચાર પાસપોર્ટ સાઇઝ ફોટા આપવા ફરજિયાત છે.