ફરિયાદ / 6 વર્ષથી ભાવનગર મનપામાં 5 ગામ સામેલ છતા વિકાસના નામે મીંડુ, દવાખાનું છે પણ સ્ટાફ નથી, પાણી છે પણ દૂષિત

• મહાપાલિકામાં સમાવિષ્ઠ પાંચ ગામ હજુ ય 'ઓરમાયા' 
• ભાવનગર મહાપાલિકા સુવિધામાં 'ઠાગા-ઠેયા' કરે છે 
• બે સપ્તાહે એક વાર પાણી, એ પણ કેટલીક જગ્યાએ દૂષિત 

રાજ્યની મહાનગર પાલિકાઓના સુશાસન ની વાત આવે ત્યારે અણઘડ વહીવટ માટે ભાવનગરને ચોક્કસ યાદ કરવું પડે તેવી સ્થિતિનું નિર્માણ મહાનગર પાલિકાએ કર્યું છે. મહા પાલિકાએ 6 વર્ષ પહેલા કેટલાક વિસ્તારોને હદમાં સામેલ કર્યા હતા.આજે આટલા વર્ષો પછી પણ વહીવટી તંત્ર માટે 'ઓરમાયા' જેવો વ્યવહાર થઇ રહ્યો છે અને સુવિધાઓના નામે 'મસમોટું' મીંડું છે 

પાયાની સુવિધા વિહોણો વહીવટ 

ભાવનગર મહાનગરપાલિકામાં 6 વર્ષ પહેલા પાંચ જેટલા ગામોનો સમાવેશ કરવામાં આવ્યો હતો. પરંતુ હજુ પણ આ તમામ ગામો પ્રાથમિક સુવિધાઓનો અભાવ જોવા મળી રહ્યો છે. રુવા, સીદસર, અકવાડા, તરસમીયા અને નારી ગામ  હજુ પણ રોડ, ડ્રેનેજ અને પીવાના પાણીની તકલીફો અને પાયાની સુવિધાઓ માટે ઝઝુમી રહ્યાં છે.ગ્રામજનોનું કહેવુ છે તે ગામમાં બનાવેલા આરોગ્ય કેન્દ્રોમાં સ્ટાફ નથી. આ ગામોમાં ગ્રામ પંચાયત હતી ત્યારે ગામમાં આઠ દિવસે એક વાર પાણી આપવામાં આવતું હતું. જયારે હવે છ વર્ષથી મહાનગર પાલિકામાં સમાવેશ કરાયા બાદ 12 થી 15 દિવસે પાણી વિતરણ કરાય છે. જેમાં પણ અનેક વિસ્તારોમાં દૂષિત પાણી આવી રહ્યું છે.

આરોગ્ય સુવિધા 'શોભાના ગાંઠીયા ' જેવી 

ગામના મુખ્ય બજારમાં જ સારા રોડ નથી.  ભાવનગર મનપાએ કરોડો રૂપિયાના ખર્ચે ડ્રેનેજ લાઈન નાખી છે પરંતુ પરિસ્થિતિ એની એ જ જોવા મળી રહી છે. ગામમાં ત્રણ કરોડ રૂપિયાના ખર્ચે આરોગ્યની સુવિધા ઉપલબ્ધ કરવામાં આવી છે પરંતુ છેલ્લા એક વર્ષથી શોભાના ગાંઠિયા સમાન અર્બન સેન્ટર બંધ હાલતમાં છે. જેના કારણે લોકો આરોગ્યની સુવિધા માટે દૂર સુધી જવા મજબૂર બન્યા છે.