ગાંધીનગર / નાટક પૂર્ણ, અંતે અલ્પેશ ઠાકોર મંત્રીપદના લટકતાં સપને કાલે ભાજપમાં જોડાશે

અલ્પેશ ઠાકોરે vtvgujarati.com ને જણાવ્યું કે હા હું કાલે વિધિવત રીતે ભાજપમાં જોડાઈશ. આ સાથે અલ્પેશ ઠાકોરની આંગળી પકડીને કોંગ્રેસમાંથી રાજીનામું આપનાર બાયડના પૂર્વ ધારાસભ્ય ધવલસિંહ ઝાલા પણ હવે ભાજપ કેસરિયાના રંગે રંગાશે.

સમાજને વ્યસન મુક્ત કરવાના અભિયાનથી શરૂ કરેલી ઠાકોર સેનાથી બનેતા નેતા પહેલાં કોંગ્રેસના શરણે ગયાં ત્યાંથી ધારાસભ્ય પણ બન્યા. પણ કોંગ્રેસમાં યોગ્ય સ્થાન નથી મળતું તેવા બાના સાથે હવે ભાજપ ભણી ચાલ્યા છે. જો કે અલ્પેશને તો મંત્રી બનવું હતું પરંતુ ભાજપ હાઈકમાન્ડે ચોખ્ખી ના પાડી દેતાં હવે માત્ર સામાન્ય કાર્યકર રહી જશે.

અલ્પેશ 5 કોંગી ધારાસભ્યોને ભાજપમાં લાવે તો જ મંત્રી બનાવાનો સોદો હતો

ભાજપના આંતરિક સુત્રો દ્વારા મળતી માહિતી અનુસાર અલ્પેશ ઠાકોર ઘણા લાંબા સમયથી ભાજપમાં આવવાં માંગતાં હતા. પરંતુ હાઈકમાન્ડે શરત રાખી હતી કે જો અલ્પેશ 5 કોંગી ધારાસભ્યો સાથે ભાજપમાં આવે તો તેને મંત્રી બનાવવા. જો કે અલ્પેશ આવું ના કરી શક્યો એટલે મંત્રી પદ લટકતું રહ્યું. ધવલસિંહે તો અલ્પેશનો ઝભ્ભો પકડ્યો પણ જુના અને અલ્પેશના માનીતા ભરતસિંહ ઠાકોર અને ગેનીબેન ઠાકોર હજુ કોંગ્રેસમાં જ છે.

ઠાકોર સેનાનો વોટ બેન્ક ભાજપ અને કોંગ્રેસ વચ્ચે બાટવાનો પ્લાન

અલ્પેશ ઠાકોર અને ધવલસિંહના ભાજપમાંન જોડાવાથી ઉતરગુજરાતના રાજકારણમાં પ્રભુત્વ ધરાવતો ઠાકોર સમાજ હવે ભાજપ અને કોંગ્રેસ એમ બંનેની વોટ બેન્કમાં વહેચાઈ જશે. ઠાકોર સેનાની છેલ્લે મળેલી બેઠકમાં પણ આ રીતે બંને પક્ષોમાં પોતાનું સ્થાન જાળવી રાખવું નક્કી થયાની ચર્ચા છે.