ગુજરાતમાં ભાજપની ભવ્ય જીત થઈ છે. એક તરફ જીતનો જશ્ન છે તો બીજી તરફ હારનો સ્વીકાર છે. ત્યારે સીએમ રૂપાણીએ જનતાના જનાદેશને આવકાર્યો છે. જ્યારે વિપક્ષ નેતા પરેશ ધાનાણીએ ભાજપને જીત બદલ અભિનંદર પાઠવ્યા. આવો જોઈએ શું કહે છે હાર્દિક પટેલ, અલ્પેશ ઠાકોર, સીએમ રૂપાણી, નીતિન પટેલ અને વિપક્ષ નેતા પરેશ ધાનાણી...
અલ્પેશ ઠાકોરની પત્રકાર પરિષદ
ચૂંટણીના પરિણામ પર અલ્પેશ ઠાકોરે પત્રકાર પરિષદ કરી હતી. તેમણે ખેડૂતોનો આભાર માન્યો હતો. અલ્પેશે કહ્યું કે ગુજરાતની જનતાએ કોંગ્રેસને જવાબ આપ્યો છે. ઓબીસી અને ઠાકોરસેના અને રાજ્યની જનતાનો આભાર માનું છું. આ જીત છે ગરીબોની, સામાન્ય લોકોની છે.
વધુમાં તેમણે કહ્યું કે, અમારી સાથે ષડયંત્રનો જનતાએ જવાબ આપ્યો છે. હવે અમારી જવાબદારી થાય છે કે લોકો માટે કામ કરવું. એક નેતાએ કહ્યું હતું કે ઠાકોર સેનાનો કોઇ પ્રભાવ નહીં પડે. પરંતુ તે ખોટા સાબિત થયા.
હાર્દિક પટેલની પત્રકાર પરિષદ
ચૂંટણીના પરિણામ પર હાર્દિક પટેલે પત્રકાર પરિષદ યોજી હતી. જેમાં તેમણે જણાવ્યું કે, તમામ મુદ્દે દેશની જનતાની હાર થઇ છે. અમારી ઇમાદારી સામે બેઇમાનીની જીત થઇ છે. અમે લોકો વચ્ચે જઇશું. લોકોની સમસ્યાઓનું સમાધાન થાય તેવા પ્રયત્નો કરીશું. ગુજરાતની જનતાએ જેટલા અમને મત આપ્યા છે તેના આધારે જ વધુને વધુ કામ કરીશું.
ચૂંટણીના પરિણામ પર પરેશ ધાનાણીએ આપી પ્રતિક્રિયા
ભાજપની સરકાર બને તેવા સંકેતો છે ત્યારે વિપક્ષ નેતા પરેશ ધાનાણીએ આ મામલે નિવેદન આપ્યું હતું. તેમણે કહ્યું કે જનતાનો નિર્ણય આખરી નિર્ણય. મોદી અને અમિત શાહને શુભેચ્છા પાઠવું છું. અમે લોકોના મન વાંચવામાં નિષ્ફળ ગયા છીએ. લોકોએ સરકારને સમર્થન આપ્યું છે.
CM રૂપાણીએ આપી પ્રતિક્રિયા
લોકસભાની ચૂંટણીના પરિણામ જાહેર થઈ રહ્યા છે. વલણમાં ગુજરાતની તમામ બેઠકો પર ભાજપને જીત મળી છે. ત્યારે હવે મુખ્યમંત્રી વિજય રૂપાણીએ પ્રતિક્રિયા આપી છે કે, ગુજરાતમાં તમામ બેઠક પર ભાજપ જીત તરફ વધી રહી છે. દેશભરમાં મોદી લહેર જોવા મળી રહી છે.
સાથે જ તેમણે જણાવ્યુ કે, દેશની જનતાએ ફરી એક વખત નરેન્દ્રભાઈને પ્રધાનમંત્રી બનાવવાનુ નક્કી કર્યુ છે. 4 વિધાનસભા બેઠકોની પેટાચૂંટણીમાં પણ ભાજપની જીત નિશ્ચિત છે.
DyCM નીતિન પટેલની પ્રતિક્રિયા
તો આ તરફ નાયબ મુખ્યમંત્રી નીતિન પટેલે પ્રતિક્રિયા આપી હતી કે, લોકોએ નરેન્દ્રભાઈને ફરીથી પ્રધાનમંત્રી બનાવવાનો નિર્ણય કર્યો છે. નરેન્દ્રભાઈને પ્રધાનમંત્રી બનાવવા માટે લોકોએ મતદાન કર્યુ. સાથે જ તેમણે જણાવ્યુ હતું કે, ગુજરાત અને સમગ્ર દેશમાં ભાજપ અને NDAના ઉમેદવારો માટે લોકોએ મતદાન કર્યુ છે. આ ચૂંટણીમાં ભાજપની જીતનો નીતિન પટેલે વિશ્વાસ વ્યક્ત કર્યો.