રાધનપુર બેઠક પરથી અલ્પેશ ઠાકોરને હટાવવાની ઉઠી તીવ્ર માંગ, ભાજપના પુર્વ ધારાસભ્યો અને આગેવાનો યોજ્યું સંમલેન કહ્યું સ્થાનિક નેતાને ભાજપ પસંદ કરે
અલ્પેશ ઠાકોરની મુશ્કેલી વધી શકે છે
રાધનપુરની બેઠક અલ્પેશ માટે જોખમી બની શકે
ખુદ ભાજપનાં પૂર્વ ધારાસભ્યો આવ્યા મેદાને
અલ્પેશ ઠાકોરની રાજનીતિ શરૂઆતથી જ હાલક-ડોલક રહી છે છે. કોંગ્રેસમાં જોડાયાના થોડા સમય બાદ જ બળવો કરી અલ્પેશે ભાજપમાં એન્ટ્રી મારી હતી. જે પછી મંત્રીપદની લાલસા હોવાનું પણ સ્પષ્ટ દેખાઈ આવ્યું હતું. 2019માં પેટાચૂંટણીમાં રઘુ દેસાઇ સામે કારમી હાર મળી હતી. ત્યારે હવે ગુજરાત વિધાનસભાની ચુંટણી નજીક આવી રહી છે. અલ્પેશ ઠાકોર ફરી રાધનપુર બેઠક પર સક્રિય જોવા મળી રહ્યા છે. અને બેઠકો તેમજ સામાજિક મેળાવડા કરી અત્યારથી ચૂંટણીની તૈયારીમાં જોતરાઈ ગયા છે જેથી ભાજપ પુર્વ ધારાસભ્ય અને આગેવાનોને લાગી રહ્યું છે અલ્પેશ ઠાકોરની ભાજપમાં એન્ટ્રીથી તેમનું પત્તું કપાઈ ગયું છે. જેથી હવે સ્થાનિક ઉમેદવારની માંગને વહેતી કરાઇ છે.
રાધનપુરમાં આયાતી નહીં સ્થાનિક ઉમેદવાર આપો: આ બેઠકના પૂર્વ ધારાસભ્યો
રાધનપુરના પૂર્વ ધારાસભ્ય અલ્પેશ ઠાકોરની મુશ્કેલી વધી શકે છે કારણ કે સ્થાનિક ઉમેદવારની માંગ સાથે ખુદ ભાજપનાં પૂર્વ ધારાસભ્યો મેદાને આવી ગયા છે. અને એકતા સમિતિના બેનર હેઠળ સંમલેનનું આયોજન કરી રાધનપુર બેઠક પર સ્થાનિક ઉમેદવારની માંગ કરી રહ્યા છે. મહત્વનું છે કે ભાજપ પુર્વ ધારાસભ્ય નાગરજી ઠાકોર સહિતના આગેવાનો આજે 2022માં સ્થાનિક ઉમેદવારની માંગ સાથે સંમેલન કર્યું હતું. જેમાં એક સૂરે હામ ભરવામાં આવી હતી કે રાધનપુર બેઠક પર કોઈ બહારનો નહીં પણ સ્થાનિક ઉમેદવાર ભાજપ ઉતારે તો જ બેઠક પર જીતી શકાશે. આ વિરોધ બાદ હવે 2022ની વિધાનસભાની રાધનપુરની બેઠક અલ્પેશ માટે જોખમી સાબિત થઈ શકે છે
પેટાચૂંટણીમાં હાર બાદ અલ્પેશ ઠાકોરે શું કહ્યુ હતું?
જાતીવાદી પરીબળો, પૈસાને જોરે કોંગ્રેસ જીત્યુ છે. હું મારા સમાજ માટે કામ કરીશ. ઠાકોર સમાજનો હતો અને છું. તમામ લોકોનો આભારી છું. હું જે સપનું લઈને આવ્યો હતો તે રાધનપુરની જનતાને પસંદ ન હતુ. હવે વિકાસ અટકી જશે.
2017માં શું હતુ ચિત્ર
2017ની ચૂંટણીમાં રાધનપુર બેઠક પર 68 ટકા મતદાન થયું હતું. એ ચૂંટણીમાં કૉંગ્રેસની ટિકિટ પરથી અલ્પેશ ઠાકોરનો અંદાજે 15,000 મતથી વિજય થયો હતો. કૉંગ્રેસને 48.33 ટકા મત મળ્યા હતા અને ભાજપને 39.96 ટકા મત મળ્યા હતા. પણ 2019માં પક્ષપલટા બાદ ભાજપની ટિકિટ લઈને તે જ બેઠક પર અલ્પેશ ઠાકોરને જનતાએ પાણીચો બતાવી દીધો હતો.