વેલેન્ટાઇન સ્પેશિયલ / અલ્પેશ ઠાકોરે પપ્પાને પ્રેમલગ્નની વાત કરી તો બે ફડાકાં માર્યા, પ્રેમ પુરવાર કરવા હાથમાં બ્લેડથી ક...ક...કિરણનું નામ લખી કાઢયું

• અલ્પેશ ઠાકોરને પોતાના પ્રેમને પામવાની અનોખી જીદ હતી
• અલ્પેશ ઠાકોરે હાથ પર બ્લેડથી કિરણબહેનનું નામ કોતર્યુ હતું
• ભાગવા માટે અલ્પેશ ઠાકોરે ઓલરેડી બૅગ પણ પેક કરી લીધી હતી

હાર્ડકોર રુઢીચુસ્ત એવું ફૅમિલી બૅકગ્રાઉન્ડ અને એટલું જ નહીં, મૅરેજ માટે ફૅમિલીએ પસંદ કરેલી છોકરીને ના પાડવાની પણ કોઈ હિંમત ન કરી શકતું હોય એવા સમયે ગુજરાતના ઠાકોર સમાજનું પ્રતિનિધીત્વ કરતાં અલ્પેશ ઠાકોરે છપ્પનની છાતી સાથે ફૅમિલીને કહી દીધું હતું કે તે મૅરેજ કરશે તો માત્ર અને માત્ર કિરણ સાથે જ.

આજે પણ જ્યારે લવસ્ટોરીની વાત આવે છે ત્યારે અલ્પેશ ઠાકોરની આંખોમાં આછી સરખી ચમક અને ચહેરા પર વેંત એકનું સ્માઇલ આવી જાય છે. પોતાના જૂના દિવસો યાદ કરતાં ઠાકોર કહે છે, ‘અમારી લવસ્ટોરીનું આ પચ્ચીસમું વર્ષ ચાલે છે. એચ.કે.કોલેજમાં અમે બન્ને સાથે સેન્ડવિચ ખાતાં અને એકબીજાને જોતાં બેસી રહેતાં. બહુ મન થાય તો કોલેજથી લાલ દરવાજા સુધી અમે ચાલતાં જઈએ. વાત બહુ ઓછી થાય પણ એ જે ખામોશી હતી એમાં અમારી એકબીજાની ફીલિંગ્સ સતત વ્યક્ત થતી.’

'એકબીજા સામે એમ જ જોતાં-જોતાં ત્રણ મહિના પસાર કરી નાખ્યા'
પાર્ટી બદલવામાં કે પછી પાર્ટી સામે બાંયો ચડાવવાની આવી હોય તો પણ કોઈની સાડી બારી રાખ્યા વિના લડી લેનારા અલ્પેશ ઠાકોરને કિરણબહેન સામે મૅરેજની પ્રપોઝલ મૂકવામાં એક વર્ષ લાગ્યું હતું. એક ગાલ અને બે થપ્પડ. તમને જાણીને નવાઈ લાગશે પણ એ સાચું છે કે, કિરણબહેન ગમી ગયા પછી તેની સાથે વાત કરવાની હિંમત પણ અલ્પેશભાઈથી થઈ નહોતી અને બન્ને એકબીજા સામે એમ જ જોતાં-જોતાં ત્રણ મહિના પસાર કરી નાખ્યા હતાં. અલ્પેશ ઠાકોર કહે છે, ‘મને ખબર હતી કે અમારી કમ્યુનિટીમાં લવમૅરેજ બોલવાની પણ મનાઈ હોય એવા સમયે હું લવમૅરેજની દિશામાં આગળ વધતો હતો પણ મેં તૈયારી રાખી હતી કે જો ફૅમિલી ના પાડશે તો અમે ઘરેથી ભાગી જશું.’

અલ્પેશભાઈના પપ્પાને દીકરાના પ્લાનની ખબર પડી ગઈ હતી
ભાગવા માટે ઠાકોરે ઓલરેડી બૅગ સુદ્ધાં ભરીને રેડી રાખી હતી પણ સદનસીબે અલ્પેશભાઈના પપ્પાને દીકરાના પ્લાનની ખબર પડી ગઈ અને તેમણે દીકરાને બોલાવી બે લાફાં ચોડી દીધાં. અલ્પેશભાઈ કહે છે, ‘તેમનો ગુસ્સો વ્યાજબી હતો. સંસ્કારી પરિવાર ક્યારેય એ ન સ્વીકારે કે તેનો દીકરો કોઈની દીકરીને લઈને ભાગે.’

ક... ક... કિરણ
આજના વાઇફ પણ કોલેજ સમયના ગર્લફ્રેન્ડ એવા કિરણબહેનના પ્રેમનો નશો તમે જૂઓ સાહેબ, જેની સામે અવાજ ઊંચો કરવાની હિંમત કોઈ સરકારી અધિકારી નથી કરી શકતું એ અલ્પેશ ઠાકોરે કોલેજ સમયે પોતાનો પ્રેમ પુરવાર કરવા માટે હાથ પર બ્લેડથી કિરણબહેનનું નામ કોતર્યુ હતું.

અલ્પેશ ઠાકોર કહે છે, ‘ઘટના ભલે એ સમયની હોય પણ અમારા પ્રેમની ઇન્ટેન્સિટી આજે પણ એટલી જ તિવ્ર છે. આજે પણ ઘરે આવી, તેનો સ્માઇલ કરતો ચહેરો જોઉં એટલે મારો બધો થાક ઉતરી જાય.’

‘આજનો પ્રેમ બદલાઈ ગયો છે'
હવે તો અલ્પેશભાઈ અને કિરણબહેનના દીકરાના પણ મૅરેજ થઈ ગયા છે પણ આજે પણ, તે બન્ને એકબીજાને સમય આપવામાં જરા પણ કસર નથી છોડતાં. અલ્પેશભાઈ કહે છે, ‘આજનો પ્રેમ બદલાઈ ગયો છે, પહેલાં એકબીજાને પ્રાધન્ય મળતું, હવે સમય મળે તો પ્રાધન્ય આપવામાં આવે છે.’