પાટણમાં આયોજીત ગૌરવ યાત્રાની સભામાં અલ્પેશ ઠાકોર અને લવિંગજી એક મંચ પર જોવા મળતા અનેક ચર્ચાઓએ વેગ પકડ્યો છે. આપને જણાવી દઈએ કે, થોડા દિવસ અગાઉ સ્થાનિક ઉમેદવાર મુદ્દે અલ્પેશ ઠાકોરનો વિરોધ કરી 'જીતશે સ્થાનિક હારશે બહારનો, લડશે સ્થાનિક જીતશે સ્થાનિક'ના સ્લોગન સાથે પૂર્વ ધારાસભ્ય લવિંગજી ઠાકોર અને નાગરજી ઠાકોરની આગેવાનીમાં અઢારે આલમનું મહાસંમેલન યોજાયું હતું.
પાટણમાં અલ્પેશ ઠાકોર અને લવિંગજી એક મંચ પર જોવા મળ્યા
પાટણમાં આયોજીત ગૌરવ યાત્રાની સભામાં બન્ને સાથે જોવા મળ્યા
સભામાં અલ્પેશ ઠાકોરે લવિંગજી ઠાકોરનું કર્યું અભિવાદન
થોડા દિવસ પહેલા લવિંગજી ઠાકોરે અલ્પેશ ઠાકોરનો કર્યો હતો વિરોધ
ગુજરાત વિધાનસભાની ચૂંટણીના પડઘમ શરૂ થઈ ચૂક્યા છે અને ચૂંટણી જીતવા માટે તમામ રાજકીય પાર્ટીઓ તનતોડ મહેનત કરી રહી છે. ગુજરાત વિધાનસભાની ચૂંટણી જેમ-જેમ નજીક આવી રહી છે તેમ તેમ દિગ્ગજ નેતાઓની સક્રિયતા પણ વધી છે. તેવામાં વિધાનસભાની ચૂંટણી પહેલા રાધનપુર વિધાનસભામાં રાજકીય માહોલ ચરમસીમાએ પહોંચ્યો છે. થોડા દિવસ અગાઉ લવિંગજી ઠાકોરે રાધનપુરમાં અલ્પેશ ઠાકોરનો વિરોધ કરીને સ્થાનિક ઉમેદવાર જ ચૂંટણી લડે એવી માંગ કરી હતી. તેવામાં આજે પાટણમાં આયોજીત ગૌરવ યાત્રાની સભામાં અલ્પેશ અને લવિંગજી એક જ સ્ટેજ પર જોવા મળતા અનેક ચર્ચાઓએ વેગ પકડ્યું છે. અલ્પેશ ઠાકોર અને લવિંગજી ઠાકોર એક જ મંચ પર જોવા મળતા રાજકારણમાં અનેક ચર્ચાઓ થવાની શરૂ થઈ ગઈ છે.
અલ્પેશ ઠાકોરને નહીં સ્થાનિક ઉમેદવારને ટિકિટ આપવાની કરાઈ હતી માંગ
તાજેતરમાં ગુજરાતના ભારતીય જનતા પાર્ટીના પ્રદેશ પ્રમુખ સી.આર પાટીલે અલ્પેશ ઠાકોરના ચૂંટણી લડવાના સંકેત આપ્યા હતા. જે બાદ પૂર્વ ધારાસભ્ય લવિંગજી ઠાકોર અને નાગરજી ઠાકોર દ્વારા સ્થાનિક ઉમેદવારની માંગ સાથે અલ્પેશ ઠાકોરનો વિરોધ કરવામાં આવ્યો હતો. ગત 11 ઓક્ટોબરના રોજ પૂર્વ ધારાસભ્ય લવિંગજી ઠાકોર અને નાગરજી ઠાકોરની આગેવાનીમાં 'જીતશે સ્થાનિક હારશે બહારનો, લડશે સ્થાનિક જીતશે સ્થાનિક'ના સ્લોગન સાથે સમીના રણાવાડા ગામે રાધનપુર વિધાનસભા અઢારે આલમનું મહાસંમેલન યોજાયું હતું. જેમાં મોટી સંખ્યામાં ઠાકોર, ચૌધરી, માલધારી, આહિર સમાજના લોકો હાજર રહ્યા હતા. આ સંમેલનમાં ભાજપમાંથી અલ્પેશ ઠાકોરને નહીં સ્થાનિક ઉમેદવારને ટિકિટ મળે એવી માંગ ઉઠી હતી.
સી.આર.પાટીલે પણ પાઠવી હતી શુભેચ્છા
હાલ એવી અટકળો ચાલી રહી છે કે, રાધપુર બેઠક પરથી ભારતીય જનતા પાર્ટી અલ્પેશ ઠાકોરને મેદાનમાં ઉતારી શકે છે. થોડા દિવસ અગાઉ ચાણસ્મા ખાતે શસ્ત્રપૂજનમાં ભાજપ પ્રદેશ અધ્યક્ષ સી.આર પાટીલે અલ્પેશ ઠાકોર ચૂંટણી લડે અને જીતે તેવી શુભકામનાઓ પણ પાઠવી છે. સી.આર.પાટીલે જણાવ્યું હતું કે, 'અલ્પેશભાઈ અમારા સિનિયર આગેવાન છે, તેઓ ચૂંટણી લડે અને સીટ પર વિજયી થાય એવી શુભેચ્છાઓ આપીએ છીએ. દરેક પોત-પોતાના મત વિસ્તારમાં તૈયારીઓ કરતા હોય છે, અલ્પેશ ઠાકોર ચૂંટણી લડશે અને જીતશે એવો અમને વિશ્વાસ છે.' આ ઉપરાંત તેમણે જણાવ્યું હતું કે, ટિકિટ આપવાનો નિર્ણય હાઈકમાન્ડ દ્વારા કરવામાં આવશે.
મારે અહીંયાથી પરણવું છેઃ અલ્પેશ
તો અલ્પેશ ઠાકોરે તાજેતરમાં રાધનપુરમાં યોજાયેલા બનાસડેરીની મહિલા જાગૃતિ કાર્યક્રમમાં જણાવ્યું હતું કે, 'મારે અહીંયાથી પરણવું છે, પરણાવવાની જવાબદારી તમારી છે. જાન રંગેચંગે જોડાય અને તમે મુરતિયાને પરણાવો એવી વિનંતી કરું છું. મારાથી ભૂલચૂક થઇ હોય ક્યાય મનદુઃખ થયું હોય તો તમામ આગેવાનો મને માફ કરજો.'