સુરતઃ અલ્પેશ કથીરિયા અને સુરત પોલીસ વચ્ચેનો વિવાદ શાંત થવાનું નામ નથી લેતો. આજે જ્યારે જામીનની શરતો પ્રમાણે અલ્પેશ કથીરિયાને ક્રાઇમ બ્રાન્ચમાં હાજરી પુરાવાની હતી ત્યારે ફરી વિવાદ સર્જાયો છે.
અલ્પેશ કથીરિયાએ પોલીસ પર આરોપ લગાવતા જણાવ્યું કે પોલીસે મને રોકવાનો પ્રયાસ કર્યો હતો. મારી ગાડીને રોકવાનો પોલીસનો પ્લાન હતો. મને હાજરી પુરાવવા જતા રોકવા માગતા હતા.
જોકે હું ટુ વ્હીલર પર નિકળી જતા ક્રાઇમ બ્રાન્ચ સુધી પહોંચી શક્યો. અલ્પેશે જણાવ્યું કે મને પોલીસ સ્ટેશનમાં નોટિસ આપવામાં આવી. જે મેં સ્વિકારી લીધી છે. આ મામલે જો હું કોર્ટમાં 10 મિનિટ દલીલ કરૂ તો પણ કોર્ટમાં પોલીસની નોટિસની પોલ ખુલી જશે.
કસ્ટડીમાં મને ઘરથી જમવાનું નથી આપ્યું: અલ્પેશ
પોલીસ કસ્ટડીમાં ગાળાગાળી મામલે ગઇકાલે અલ્પેશ કથીરિયાએ પોતાની પ્રતિક્રિયા આપી હતી. તેમણે સુરત પોલીસ કમિશ્નર સામે સવાલો ઉઠાવ્યા હતા. અલ્પેશે જણાવ્યું હતું કે શું સુરત પોલીસ કમિશ્નર ભાજપના એજન્ટ છે? કમિશ્નર સહિતના અધિકારીઓ અમારી સામે નિવેદનો કરી રહ્યા છે. પોલીસવાળાઓએ જ મને અપશબ્દો કહ્યા હતા. તેઓ જ અમને ટપોરી બનતા શિખવે છે.
આ ઉપરાંત અલ્પેશે જણાવ્યું હતું કે જેલમાં રહ્યો ત્યારે પરિવારજનોને કે વકીલને ન મળવા દીધો ન હતો. કસ્ટડીમાં મને ઘરથી જમવાનું લાવવા ન દીધું. તો પોલીસને ગાળો આપવા મામલે તેમણે વધુમાં જણાવ્યું હતું કે પોલીસના મારતા વિડીયો વાયરલ થયા તેમાંથી કેટલા પર કેસ થયા? જે અધિકારીઓ ભ્રષ્ટાચાર કરે છે તેમને ઊઘાડા પાડીશું.
કારણ કે મર્ડરના આરોપી લાખો રૂપિયા ચુકવી જલસા કરે છે. ત્યારે તમામ ડિપાર્ટમેન્ટ દ્વારા આંદોલન તોડવાના પ્રયાસ કરવામાં આવી રહ્યા છે. બસો ભાજપ સળગાવે અને પોલીસ અમારા માણસોને પકડે છે.