સુરતના પ્રખ્યાત એલાયન્સ ગ્રુપએ આ દીપાવલીની અનોખી રીતે ઉજવણી કરી છે. કંપનીએ પોતાના 35 કર્મચારીઓને ઇલેક્ટ્રીક સ્કૂટર ગિફ્ટ કર્યા છે.
દિવાળી પર સુરતની કંપનીએ કર્મચારીઓને આપી અનોખી ભેટ
35 કર્મચારીઓને ઇલેક્ટ્રીક સ્કૂટર કરાયા ગીફ્ટ
કર્મચારીઓને ફાયદો અને પર્યાવરણની જાળવણી પણ થાય
આવનારા સમયમાં ખુબજ ઉત્તમ અને ઉપયોગી ગણાતી શરૂઆત એલાયન્સ ગ્રુપે કરી છે. દૂરદર્શી વિચાર ધરાવતા એલાયન્સ ગ્રુપના ડાયરેક્ટર સુભાષ ડાવરે દીપાવલીના સમયે પોતાના કર્મચારીઓને ઇલેક્ટ્રિક સ્કૂટરની ગીફ્ટ આપી છે.
આ અંગે માહિતી આપતા સુભાષ ડાવરે એક ન્યૂઝ સંસ્થાને જણાવ્યું હતું કે, તેમને હંમેશાથી પર્યાવરણ પ્રત્યે સદ્ભાવ રહ્યો છે. કુદરતના સાનિધ્યમાં રહેવું તેમને પસંદ છે અને પર્યાવરણની સુરક્ષા માટે તમામ સંભવ પગલા ભરવાનો તેમનો અંદાજ. સુભાષ ડાવરના દીકરા ચિરાગ ડાવર જે એમ્બ્રોડરી મશીનનો બિઝનેસ જુએ છે, તેઓ જણાવે છે કે આ દીવાળી પર તેઓ પોતાના 35 કર્મચારીઓને પેટ્રોલથી ચાલનારી બાઈકોના બદલે અત્યાધુનિક ઇલેક્ટ્રીક સ્કૂટર ભેટ કરી રહ્યા છે.
કર્મચારીઓને ફાયદો અને પર્યાવરણની જાળવણી પણ થાય
આ અભિયાન પાછળનું કારણ જણાવતા તેમણે કહ્યું કે, આમ તો પેટ્રોલના ભાવ વધી રહ્યા છે. આ મુદ્દો માત્ર મીડિયાના ચર્ચાતો રહે છે પરંતુ આની અસર કંપનીના ફાઇનાન્શિયલ પર પણ પડે છે. તેવામાં અમે નિર્ણય લીધો છે કે કર્મચારીઓ જે પેટ્રોલ બાઈક દોડાવે છે તેમને ઇલેક્ટ્રિક સ્કૂટર ગિફ્ટ આપવામાં આવે. જેનાથી ન માત્ર પેટ્રોલ ખર્ચ બચે પરંતુ પર્યાવરણ સુરક્ષા, ગ્રીન સુરત પ્રત્યે અમારી કંપની યોગદાન આપી શકશે.
CR પાટીલના હસ્તે કરાયું વિતરણ
આ હેતુની સાથે ગુરૂવારે દિવાળીના દિવસે 4 નવેમ્બર 2021 સવારે 11 વાગ્યે Alliance House, સોસિયો સર્કલ ઉધના મગદલ્લા રોડ પર એક કાર્યક્રમનું આયોજન કરવામાં આવ્યું હતું જેમાં સાંસદ અને ગુજરાત પ્રદેશ પ્રમુખ સી.આર. પાટીલના હાથે ઇલેક્ટ્રિક સ્કૂટરનું વિતરણ કરાયું હતું.