પર્દાફાશ / કરોડોની સંપત્તિ પર કોની છે નજર? અમદાવાદની રાજસ્થાન સેવા સમિતિમાં નકલી સહીના કૌભાંડનો આક્ષેપ

• અમદાવાદ રાજસ્થાન સેવા સમિતિના ચેરમેન પર આરોપ
• રાજસ્થાન શાળા, સંસ્થા પોતાના નામે કરી દીધી
• સિલ્વર ઓક કોલેજના ચેરમેન શીતલ અગ્રવાલનો આક્ષેપ 

અમદાવાદ રાજસ્થાન સેવા સમિતિમાં કૌભાંડ થયું હોવાનું સામે આવ્યું છે. રાજસ્થાન સેવા સમિતિ સંચાલિત 60 વર્ષ જૂની રાજસ્થાન સ્કૂલ અને સંસ્થાઓ ચેરમેનના નામે કરવાના કારસાનો પર્દાફાશ થયો છે. અમદાવાદ રાજસ્થાન સેવા સમિતિના ચેરમેન દ્વારા રાજસ્થાન સ્કૂલનું નામ બદલવાની કાર્યવાહી કરવામાં આવી હોવાનો આક્ષેપ કરાયો છે. સિલ્વર ઓક કોલેજના ચેરમેન શીતલ અગ્રવાલે પુરાવા સાથે ગંભીર આક્ષેપ કર્યા છે.  

સમિતિના ચેરમેન ગણપત ચૌધરી દ્વારા બંધારણ બદલવા માટે બોગસ સહી પણ કરવામાં આવી હોવાનો આરોપ કરાયો છે. મૃત વ્યક્તિઓના નામે બોગસ સહી કરાવીને બંધારણમાં સુધારો કરવામાં આવ્યો હોવાનો આક્ષેપ કરવામાં આવ્યો છે. પૂનમચંદ જૈને પણ કહ્યું છે કે તેમની નહીં પણ તેમના વતી બોગસ સહી કરવામાં આવી છે. જૈન પરિવારે ચેરિટી કમિશનરમાં ફરિયાદ કરવાનું અને પોલીસ ફરિયાદ કરવાનું નક્કી કર્યું છે. કૌભાંડના કારણે હાલ સમિતિના તમામ સભ્યો ચેરમેન ગણપત ચૌધરીનો વિરોધ કરી રહ્યા છે.

આપને જણાવી દઈએ કે, આ અગાઉ રાજસ્થાન સેવા સમિતિના ટ્રસ્ટીઓએ પણ સમિતિના ચેરમેન ગણપત ચૌધરી સામે આક્ષેપો કર્યા છે. 40 વર્ષ અગાઉ મૃત્યુ પામેલાની બોગસ સહી 2018માં કરવામાં આવી હોવાનો દાવો સમિતિના ટ્રસ્ટીઓએ કર્યો છે. સાથે જ સમિતિના ટ્રસ્ટીઓએ ચેરમેન સામે ચેરિટી કમિશનર તથા પોલીસ ફરિયાદ કરવાની તૈયારી કરી છે.