જમીન માલિકો સાવધાન / મહેસાણામાં રૂ.35 હજારમાં ભાડે જમીન આપવાની લાલચ મોંઘી પડી, ઠગબાજોએ 5 વિઘાનો કરી નાખ્યો દસ્તાવેજ

• મહેસાણાના મોટી દાઉ ગામમાં જમીન કૌભાંડ
• જમીન ભાડે લેવાનું કહી વેચાણનો દસ્તાવેજ કરી નાખ્યો
• કરોડોની 5 વિઘા જમીનનો ઓફલાઈન દસ્તાવેજ કરવામાં આવ્યો

મહેસાણાના મોટી દાઉ ગામમાં જમીન કૌભાંડ થયું હોવાનું સામે આવ્યું છે. જમીન ભાડે લેવાનું કહી વેચાણનો દસ્તાવેજ કરી નાખ્યો હોવાનો આક્ષેપ લાગ્યા છે. કરોડોની 5 વિઘા જમીનનો ઓફલાઈન દસ્તાવેજ કરવામાં આવ્યો હોવાની વાત સામે આવી છે. 30 ગુઠા જમીન ભાડે લેવાનું કહી 129 ગુઠા જમીન પડાવી લેવાઈ હતી. ભાડાકરારનું કહીને પરિવારના અંગુઠા મરાવીને લીધા હતા. જે બાદ ધીણોજના રાજેશ બાબુલાલ ચૌધરીના નામે દસ્તાવેજ કરવામાં આવ્યો હોવાનું સામે આવ્યું છે. દસ્તાવેજમાં સાક્ષી તરીકે પણ ખોટા વ્યક્તિઓ દર્શાવાયા હતા. 

મહેસાણાના મોટી દાઉની જમીન પચાવવાના મામલે જિલ્લા પંચાયતના ઉપપ્રમુખના પુત્રનું નામ સામે આવ્યું છે. તો કિરણ ઠાકોર પર દલાલ બનીને છેતરપિંડી કર્યાનો આક્ષેપ છે. પીડિત પરિવારે જિલ્લા કલેકટર સમક્ષ રજૂઆત કરી છે. 

ફરિયાદીએ કહ્યું, મારી પાસેથી 35 હજાર રૂપિયા ભાડા પેટે જમીન માગી હતી. અને સાથે 20 લાખ રૂપિયાની ડિપોઝીટ પણ આપવાની વાત કરી હતી. આ પ્રકારની વાતમાં આવી જમીન માલિકે ભાડાકરારના બહાને 5 વિઘા જમીન પડાવી લીધી અને ભાડાકરારના નામે પરિવારના અંગુઠા પણ કરાવી લીધા હતા. જે બાદ જમીન માલિક કલેક્ટર પાસે ફરિયાદ નોંધાવવા માટે પહોંચ્યો હતો.