પંચમહાલમાં જિલ્લામાં સ્ટેમ્પ ડ્યુટીમાં ભ્રષ્ટાચાર થયો હોવાનો આક્ષેપ થતાં ખળભળાટ મચી જવા પામી છે. ભ્રષ્ટાચારના આક્ષેપ સાથે એક અરજદારે અરજી છે. જે નામથી અરજી કરવામાં આવી તે નામની VTV ન્યૂઝ પુષ્ટી કરતું નથી.
પંચમહાલ જિલ્લામાં સબ રજિસ્ટ્રાર કચેરી અને સ્ટેમ્પ ડ્યુટી કચેરીની મિલીભગતથી 500 કરોડ રૂપિયાની સ્ટેમ્પ ડ્યુટીની ચોરી કરીને ભ્રષ્ટાચાર આચર્યો હોવાના આક્ષેપ કરતી લેખિત અરજી વાયરલ થતા ખળભળાટ ગયો છે. હાલોલના જાગૃત નાગરિકે આ અંગે પ્રધાનમંત્રી, રાજ્યપાલ, મુખ્યમંત્રી, નોંધણી નિરીક્ષક કચેરી સહિતનાઓને લેખિત અરજી મોકલી છે.
પંચમહાલમાં 500 કરોડના ભ્રષ્ટાચારનો આક્ષેપ
500 કરોડના ભ્રષ્ટાચારના આક્ષેપ સાથે મહેન્દ્ર રણછોડદાસ વ્યાસ નામના અરજદારે અરજી કરી છે. હાલોલની સબ રજિસ્ટ્રાર કચેરીની મિલીભગતથી ભ્રષ્ટાચાર થયો હોવાનો અરજીમાં આક્ષેપ કરાયો છે. આ અરજીમાં અધિકારીઓ પાસે આવક કરતા વધુ સંપતિ હોવાનો પણ આક્ષેપ કરાયો છે. આ અરજીમાં હાલોલ સબ રજિસ્ટ્રાર, ગોધરા જિલ્લા રજિસ્ટ્રાર અને સ્ટેમ્પ ડ્યુટી કલેક્ટરના નામનો ઉલ્લેખ કરાયો છે. અરજદારે PM નરેન્દ્ર મોદી, રાજ્યપાલ આચાર્ય દેવવ્રત, CM ભૂપેન્દ્ર પટેલ સહિત મંત્રીઓ અને કલેક્ટરને અરજી મોકલી છે. અરજીમાં જે અધિકારીઓ પર આક્ષેપ કરાયા તે અધિકારીની બદલી થઈ ચૂકી છે. જે નામથી અરજી કરવામાં આવી તે નામની VTV પુષ્ટી કરતું નથી.
સ્ટેમ્પ ડ્યુટીની ચોરી કરી હોવાનો આક્ષેપ
જિલ્લાની સબ રજિસ્ટ્રાર કચેરીઓમાં સ્ટેમ્પ ડયુટી કચેરીની મિલીભગતથી છેલ્લા 5 વર્ષમાં 500 કરોડ રૂપિયાની સ્ટેમ્પ ડ્યુટીની ચોરી કરી હોવાનો આક્ષેપ કરતાં પંચમહાલમાં સરકારી કચેરીઓમાં ખળભળાટ મચી જવા પામ્યો છે. પંચમહાલના કલેક્ટરે પણ અરજી મળી હોવાનો સ્વીકાર કર્યો છે.
અધિકારીની નિમણૂક કરીને તપાસ કરવાનું કલેક્ટરે આપ્યું નિવેદન
પંચમહાલના કલેક્ટર સુજલ મયાત્રાએ જણાવ્યું કે, જિલ્લામાં સ્ટેમ્પ ડ્યુટીની 500 કરોડ રૂપિયાની ચોરી થઇ હોવાની રજૂઆત મળી છે. જિલ્લાની કચેરીઓમાંથી બાનાખાતા રજિસ્ટ્રેશન, વેચાણ દસ્તાવેજો સહિતની ચકાસણી કરવા ટીમ બનાવવામાં આવશે અને જો તપાસમાં કોઇ કસુરવાર નીકળશે તો કડક કાર્યવાહી કરવામાં આવશે.
સળગતા સવાલો
રાજ્યમાં થતો ભ્રષ્ટાચાર ક્યારે બંધ થશે?
ભ્રષ્ટ અધિકારીઓને કાયદાનો ભય કેમ નથી?
ભ્રષ્ટ અધિકારીઓ વિરુદ્ધ દાખલારૂપ કાર્યવાહી થશે?
અરજીમાં જે અધિકારીઓના નામનો ઉલ્લેખ છે તે અધિકારીઓને સસ્પેન્ડ કરવા જેવી કાર્યવાહી થશે?
ભ્રષ્ટાચાર નાબૂદી માટે રાજ્યમાં કાયદો કેમ નથી બનતો?