તમારા કામનું  / આવતીકાલથી બદલાઇ જશે આ તમામ Rules, જાણો તમારા ખિસ્સા પર શું પડશે અસર 

• માર્ચ મહિનામાં કુલ 12 દિવસ સુધી બેંકોમાં રજા રહેશે
• હોમ લોન, કાર લોન, એજ્યુકેશન લોન વગેરેના વ્યાજ દરમાં વધારો થઈ શકે છે
• રસોઈ ગેસ અને સીએનજીના ભાવમાં વધારો થઈ શકે છે

આવતીકાલ (બુધવાર)થી 2023નો ત્રીજો મહિનો એટલે કે માર્ચ મહીનો શરૂ થશે. નવા મહિનાની શરૂઆત સાથે બુધવારથી ઘણા નિયમોમાં બદલાવ થશે. આ બદલાવની સીધી અસર તમારા ખિસ્સા પર થશે. માર્ચથી બેંક હોલીડે, એલપીજી સિલિન્ડરની કિંમત, બેંક લોનના વ્યાજ દર સહિત ઘણી વસ્તુઓમાં બદલાવ થવા જઈ રહ્યો છે. ચાલો જાણીએ કે 1 માર્ચ, 2023 થી કયાં નિયમો બદલાઈ રહ્યા છે જે સામાન્ય લોકોના ઘરના ખર્ચ પર અસર કરશે. 

1. માર્ચમાં બેંક કેટલા દિવસ બંધ રહેશે
માર્ચ મહિનામાં રજાઓ ઘણી આવે છે. આ મહિનામાં હોળી અને ચૈત્ર નવરાત્રિ જેવા અનેક તહેવારોની ઉજવણી કરવામાં આવશે. એવામાં માર્ચ મહિનામાં કુલ 12 દિવસ બેંકોમાં રજા રહેશે. આ 12 દિવસમાં બીજા અને ચોથા શનિવાર અને રવિવારની રજા સામેલ છે. આ રજાઓ રાજ્યના હિસાબે નક્કી કરવામાં આવશે. એવામાં જો તમારે બેંક સંબંધિત કોઈપણ મહત્વું કામ પૂર્ણ કરવાનું છે તો આરબીઆઈની બેંક રજાઓની યાદી તપાસવી ખૂબ જ જરુરી છે. કારણ કે પછી તમારા મહત્વના કામ અટકી શકે છે.

2. બેંક લોન થઈ શકે છે મોંઘી 
રિઝર્વ બેંક સતત દેશમાં મોંઘવારીને કંટ્રોલમાં કરવા માટે તેના વ્યાજ દરોમાં સતત વધારો કરી રહી છે. ફેબ્રુઆરી મહિનામાં રેપો રેટમાં પણ વધારો કરવામાં આવ્યો છે. ત્યારબાદ ઘણી બેંકોએ તેમના MCLRમાં વધારો કર્યો છે. આગળ પણ બેંકો તેમાં વધારો કરવાનું ચાલુ રાખી શકે છે જેની સીધી અસર સામાન્ય લોકો પર પડી શકે છે. જેના કારણે ગ્રાહકોને હોમ લોન, કાર લોન, એજ્યુકેશન લોન વગેરેના વ્યાજ દરમાં વધારો થઈ શકે છે.

3. CNG અને રસોઈ ગેસના ભાવમાં થઈ શકે છે વધારો 
દર મહિનાની શરુઆતમાં રસોઈ ગેસ અને સીએનજીના ભાવ નક્કી કરવામાં આવે છે. ફેબ્રુઆરી મહિનામાં એલપીજીના ભાવમાં કોઈ વધારો થયો નથી. એવામાં આશા છે કે, આ વખતે તેની કિંમતમાં વધારો થઈ શકે છે.

4. ટ્રેનના ટાઈમ ટેબલમાં થઈ રહ્યો છે બદલાવ
ગરમીની શરૂઆતના કારણે ભારતીય રેલવેએ પોતાની ટ્રેનોના ટાઈમ ટેબલમાં બદલાવ કર્યો છે. 1 માર્ચથી રેલવેએ તેની 5,000 માલગાડી અને હજારો પેસેન્જર ટ્રેનોના સમયમાં ફેરફાર કર્યો છે. એવામાં જો તમારે પણ આ મહિને મુસાફરી કરવાની હોય તો તમારી ટ્રેનનો સમય જરુર ચેક કરો.