કેન્દ્ર સરકાર ફક્ત બે પ્રકારના ચાર્જર લાવવાની વિચારણા કરી છે. આ મુદ્દે થોડા વખતમાં એક મોટી બેઠક થવાની છે.
ઝાઝાને બદલે ફક્ત 2 ચાર્જર પોર્ટની સરકારની વિચારણા
17 ઓગસ્ટે ઉપભોક્તા મંત્રાલય અને ઉદ્યોગ સંગઠન વચ્ચે બેઠક
બધા મોબાઈલ માટે એક ચાર્જર હોય તેવી સરકારની ઈચ્છા
નવું ચાર્જર ખરીદવાની સમસ્યા દૂર થશે
ઇલેક્ટ્રોનિક એપ્લાયન્સ માટે ચાર્જર ખૂબ મહત્વના છે. ચાર્જર વગર તો આવા સાધનો ચાલી ન શકે. હાલમાં દરેક કંપનીના અલગ અલગ ચાર્જર આવે છે પરંતુ અલગ અલગ ચાર્જરને બદલે ફક્ત એક જ ચાર્જર હોય તો કેવું સારુ. સરકારે હવે આ દિશામાં સક્રિય વિચારણા કરી છે અને તમામ પ્રકારના મોબાઈલ માટે એક જ ચાર્જર હોય તેવી સરકારની ઈચ્છા છે. કેન્દ્રીય ગ્રાહક બાબતોના મંત્રાલયે તમામ મોટા ઉદ્યોગ સંગઠનો અને ક્ષેત્ર વિશિષ્ટ સંસ્થાઓની બેઠક બોલાવી છે. 17 ઓગસ્ટના રોજ યોજાનારી આ બેઠકમાં "ઘરેલું ઉપયોગ માટે બહુવિધ ચાર્જિંગના ઉપયોગને નાબૂદ કરવાની સંભાવના પર વિચાર-વિમર્શ કરવામાં આવશે.
સરકારે ઉદ્યોગ સંગઠનનોને લખ્યો હતો પત્ર
ગ્રાહક બાબતોના સચિવ રોહિતકુમાર સિંહે ગયા અઠવાડિયે આ સંદર્ભે ઉદ્યોગના નેતાઓને એક પત્ર લખ્યો હતો. અહેવાલો અનુસાર, રોહિતે પત્રમાં કહ્યું છે કે, ભારતમાં મોટાભાગના ગ્રાહકો નાના અને મધ્યમ કદના પોર્ટેબલ ઇલેક્ટ્રોનિક ઉપકરણોનો ઉપયોગ કરે છે. તેમની પાસે ટાઇપ-સી ચાર્જિંગ પોર્ટ છે. મોટી સંખ્યામાં યૂઝર્સ ફીચર ફોનનો પણ ઉપયોગ કરે છે, જે અલગ ચાર્જિંગ પોર્ટ સાથે આવે છે.
નવું ચાર્જર ખરીદવામાંથી છૂટકારો મળશે
સરકાર માત્ર બે પ્રકારના ચાર્જ લાવવા પર વિચાર કરી રહી છે. એટલે કે ભારતમાં તમને બે જ પ્રકારના ચાર્જિંગ પોર્ટ જોવા મળશે. તેનાથી દર વખતે નવું ચાર્જર ખરીદવાની સમસ્યા દૂર થશે. તેમણે કહ્યું કે હવે સમય આવી ગયો છે કે આપણે 'માત્ર બે પ્રકારના ચાર્જિંગ પોઇન્ટ'ના માળખા પર કામ શરૂ કરીએ. એટલે કે સ્માર્ટફોન, લેપટોપ, ટેબલેટ, ઇયરબડ, સ્પીકર જેવા નાના અને મધ્યમ કદના ઉપકરણો માટે ચાર્જિંગ પોર્ટનો ઉપયોગ કરવામાં આવશે. સાથે જ ફોનમાં બીજા ફીચરનો ઉપયોગ કરવામાં આવશે.
એપલ પર સૌથી પ્રતિકૂળ અસર
જો સરકાર આ પોલિસી લાગુ કરશે તો તેની સૌથી વધુ અસર એપલ પર પડશે. એપલ પોતાના સ્માર્ટફોનમાં લાઈટનિંગ કેબલનો ઉપયોગ કરે છે. એટલું જ નહીં એપલ આઇફોન સાથે બોક્સમાં ચાર્જર પણ નથી આપતું અને તેની મોટી કમાણી ચાર્જર છે. આવી સ્થિતિમાં કોમન ટાઇપ-સી કે અન્ય કોઇ ચાર્જિંગ પોર્ટને કારણે કંપનીના બિઝનેસ પર અસર પડશે.
યુરોપિયન યુનિયને ફક્ત એક જ ચાર્જર પોર્ટ લાગુ પાડ્યું છે
તાજેતરમાં યુરોપિયન યુનિયને આવું પગલું ભર્યું છે. ઇલેક્ટ્રોનિક ગેજેટ્સ માટે હવે માત્ર એક જ ચાર્જિંગ પોર્ટ હશે. યુરોપિયન યુનિયને ટાઇપ-સી ચાર્જિંગ પોર્ટને મંજૂરી આપી છે. આગામી વર્ષથી આ નિયમનું પાલન કરવાનું રહેશે. ભારતમાં પણ કંઈક આવું જ થવાની આશા છે.