ગુજરાતમાં નશાના ગોરખધંધા બેફામ બન્યા, વલસાડમાંથી NCB 4 કરોડનું ડ્રગ્સ ઝડપ્યું તો સુરત પોલીસે દારૂની લે-વેચ કરતાં બે સાતિરને ઝડપી જેલ ભેગા કર્યા.
ગુજરાતમાં વધી રહ્યો છે નશાખોરીનો ગ્રાફ
સુરત પોલીસે દારૂની હેરાફેરી કરતા 2 બૂટલેગરને ઝડપ્યા
લક્ઝુરિયસ ગાડીમાં ચોરખાના બનાવી દારૂની હેરફેર
સુરતની કાપોદ્રા પોલીસે બાતમીને આધારે કરેલી કાર્યવાહીમાં દારૂની હેરાફેરી કરતા ગુનેગારોને ઝડપી પાડયા છે, પોલીસે 36 હજારની કિંમતની 72 બોટલ સાથે લાખોનો મુદ્દામાલ પણ જપ્ત કર્યો છે. 28 લાખની ફોર્ચ્યુનર કાર પણ પોલીસે કબ્જે લીધી છે.
લક્ઝુરિયસ ગાડીમાં ચોરખાના બનાવ્યા
સુરત શહેરના કાપોદ્રા નાકા નજીક અમીદીપ હોન્ડાની સામેના ચાર રસ્તા રસ્તા પાસે કરાયેલી આ કાર્યવાહીમાં બંને સાતિર બુટલેગરોને જેલ ભેગા કરવામાં આવ્યા છે. બે લક્ઝુરિયસ ફોર્ચ્યુનર કારમાં ચોરખાના બનાવી દારૂની હેરફેર કરવામાં આવતી હતી. કાપોદ્રા પોલીસે દારૂની લે-વેચ કરતા બંને આરોપીને ઝડપી લઈ ત્રણને વોન્ટેડ જાહેર કર્યા છે. આરોપી હિતેષ પટેલ, કૌશિક સેલડિયા સામે કાયદેસરની કાર્યવાહી કરવામાં આવી છે.બંને ગાડીઓ સહિત આરોપીઓ પાસેથી 9.62 લાખના મુદ્દામાલ પકડી પાડવામાં પોલીસને સફળતા મળી છે.
બાતમી મળી ત્યારથી પોલીસની રડાર પર હતા આરોપીઓ
કાપોદ્રા પોલીસે સમગ્ર કાર્યવાહીને બાતમીને આધારે અંજામ આપ્યો હતો, થોડા દિવસ અગાઉ પોલીસ સૂત્રો દ્વારા જાણકારી મળી હતી કે લક્ઝુરિયસ કારનો ઉપયોગ કરી મોટા પાયે દારૂની હેરાફેરી થઈ રહી છે. જે બાદ વોચ ગોઠવી સાતિર બુટલેગરોને રંગેહાથ ઝડપી લેવામાં આવ્યા છે. તેમની પાસેથી 36275 રૂપિયાની 72 વિદેશી દારૂની બોટલ મળી આવી હતી. વધુ પૂછપરછ કરતાં તેમને દારૂનો જથ્થો ભરત બાંભણીયા, પિયુશ હાદવાનીને આપવાનો હોવાનું જણાવ્યું હતું. જે બાદ આઇ-20 કારમાં કાર્ટિંગ કરતા પકડાઇ ગયા હતા. બાદમાં ગાડીની તપાસ કરતાં પ્લાસ્ટિકની કોથળી માંથી અલગ અલગ બ્રાન્ડની બોટલો મળી હતી, હાલમાં ભરત બાંભણીયા, પિયુશ હાદવાનીને વોંટેડ જાહેર કરી તેમની શોધખોળની તજવીજ હાથ ધરાઇ છે.
NCBએ વાપીમાંથી ઝડપ્યું ડ્રગ્સનું રેકેટ
તો તરફ વાપીમાંથી NCBને મોટી સફળતા હાથ લાગી છે. વાપીમાંથી મેફેડ્રિંન ડ્રગ્સનો 4.5 કિલોનો જથ્થો મળ્યો છે. જેની કિમત 4 કરોડથી વધુ આંકવામાં આવી રહી છે. સાથે બે આરોપીઓની પણ ધરપકડ કરવામાં આવી છે. જેમની પાસેથી 85 લાખ રૂપિયાની રોકડ પણ મળી આવી છે મળેલા મુદ્દામાલનો કબજો લઈ વધુ તપાસ હાથ ધરાઇ છે. 2 ટીમોને ખડેપગે રાખી મેફેડ્રિંન ડ્રગ્સની બનાવટથી માંડીને વેચાણ સુધીના તારો પકડી પાડયા છે. પ્રકાશ પટેલ અને સોનુ રામનિવાસને ઝબ્બે કરી વધુ તપાસ હાથ ધરવામાં આવી છે
ગુજરાતમાં દારૂ પીતા લોકોના આંકડા!
ચોમાસા સત્રમાં સામાજિક અધિકારિતા અને સશક્તિકરણ મંત્રાલય દ્વારા રાજ્યસભામાં રજૂ કરવામાં આવેલા આંકડાઓ પરેશાન કરી મૂકે એવા છે. આ ડેટા નારાયણસ્વામી દ્વારા રાજ્યસભામાં રજૂ કરવામાં આવેલ આંકડાઓ પર આધારિત છે. આ ડેટા એઇમ્સ દ્વારા 2019 માં નેશનલ ડ્રગ યુઝ સર્વેમાં એકઠો કરવામાં આવ્યો હતો.
રાજસ્થાન કે બિહાર કરતાં પણ ગુજરાત આગળ ?
આ ડેટા મુજબ ગુજરાતમાં 4.3% લોકો આલ્કોહોલ ડીપેન્ડન્ટ છે એટલે કે આ લોકો નિયમિત રીતે દારૂનું સેવન કરે છે અને તેને આધારિત છે. આમાં ક્યારેક ક્યારેક દારૂનું સેવન કરતાં લોકોનો સમાવેશ થતો નથી. વસ્તીના 4.3% લોકો એટલે 19.53 લાખ લોકો એડિક્ટ છે.
આ આંકડો જ્યાં દારૂ પીવાની કાયદાકીય છૂટ છે એવા રાજ્યો કરતાં પણ વધારે છે.
રાજસ્થાનમાં 2.3% લોકો દારૂનું વ્યસન ધરાવે છે
બિહારમાં 1% લોકો દારૂનું વ્યસન ધરાવે છે.
તો જમ્મુ કશ્મીરમાં 4% જેટલો દારૂ પીવાય છે.
36.5 લાખ લોકો દારૂ કે ડ્રગ્સના બંધાણી
આ સર્વેમાં કરવામાં આવેલા ચોંકાવનારા દાવાઓમાં એક દાવો એ પણ છે કે ગુજરાતમાં 8% લોકો ડ્રગ્સ અને દારૂના બંધાણી છે. એટલે કે 36.5 લાખ લોકો આ પ્રકારના નશાની લત લાગી ગઈ છે