નેતાના ઘરમાં નશાની સામગ્રી / વિરમગામ ભાજપના મહિલા કોર્પોરેટરના ઘરમાંથી મળ્યો દારૂનો જથ્થો, બુટલેગર પતિ થયો ફરાર

• અમદાવાદના વિરમગામમાંથી કોર્પોરેટરના ઘરમાંથી મળ્યો દારૂ
• વિરમગામ ટાઉનમાં વોર્ડના મહિલા કોર્પોરેટરમાં ઘરેથી મળ્યો દારૂ
• વિદેશી દારૂ સાથે એક આરોપીની પોલીસે કરી ધરપકડ

અમદાવાદના વિરમગામમાંથી કોર્પોરેટરના ઘરમાંથી દારૂ ઝડપાયો છે. વિરમગામ ટાઉનમાં વોર્ડના મહિલા કોર્પોરેટરના ઘરેથી દારૂ મળતા પંથકમાં ખળભળાટ મચ્યો છે. વિદેશી દારૂ સાથે પોલીસે એક આરોપીની ધરપકડ કરી છે. મહિલા કોર્પોરેટરના પતિ મિહિર સીતાપરા ફરાર થઈ ચૂક્યા છે. તો શૈલેષ ઠાકોર નામના આરોપીની પોલીસે ધરપકડ કરી લીધી છે. પોલીસે ઘરમાંથી 1.28 લાખનો મુદ્દામાલ જપ્ત કર્યો હતો. આટલા મોટા પ્રમાણમાં દારૂનો જથ્થો જાણે બુટલેગરનું ઘર હોય તેવી રીતે પોલીસે ખુલાસો કર્યો છે. 

વિરમગામ શહેર પોલીસ દ્વારા ભાજપના મહિલા કોર્પોરેટરના પતિના નવા ઘરમાં દરોડા પાડ્યા હતા. જ્યાં દારૂનો મોટો જથ્થો છૂપાવવામાં આવ્યો હતો. જો કે, દારૂની વિદેશી બોટને ભોયરામાંથી બહાર કાઢવામાં આવી હતી. ત્યારે દારૂના જથ્થા સાથે મહિલા કોર્પોરેટરના પતિના સાગરીતની પણ ધરપકડ કરાઈ હતી. જ્યારે દારુનો ધંધો ચલાવતા પતિ તો ફરાર થઈ ગયા છે. પોલીસે એક-બે નહીં પરંતુ 804 વિદેશી બોટલને કબજે કરી છે.

મહિલા કોર્પોરેટરના પતિનું નામ મિહિર સીતાપરા છે. અને તેનું એક નવું ઘર બની રહ્યું છે. જે રૂમના ભોયરામાં દારૂની બોટલ છૂપાવવામાં આવી હતી. તેની બહાર તાળુ મારી રાખ્યું હતું. પોલીસે કલાકોનું ઓપરેશન કરીને દારૂનો જથ્થો કબજે કર્યો હતો. આ સાથે દારૂના જથ્થાની સંભાળ અને વેચાણ તેનો સાગરીત શૈલેષ ઠાકોર કરી રહ્યો હતો.