વાયરલ વીડિયો / વડોદરાના લિસ્ટેડ બુટલેગરનો મોટો દાવો, દારૂના ધંધામાં પોલીસ સાથે સાંઠગાંઠ હોવાનો વીડિયો વાયરલ કરતા હડકંપ

• વડોદરામાં દારૂબંધી ધજાગરા ઉડાવતો વીડિયો થયો વાયરલ
• પોલીસ મથકના PI પણ દારૂના વેચાણમાં ભાગીદાર હોવાનો દાવો
• વાયરલ વીડિયોનું VTV નથી કરતું સમર્થન

કહેવાતા ગાંધીના ગુજરાતમાં દારૂબંધી માત્ર નામની છે. દારૂની હાટડીઓ સરેઆમ ધમધમી રહી છે. પોલીસ ફક્ત દરોડાના નામે નાટક કરી બુટલેગરોને છાવરીજ  રહી હોય તેવુ લાગી રહ્યું છે. રોજે રોજ અનેક એવા અહેવાલો મળે છે કે જેમાં કાં તો દેશી દારૂની હાટડીઓ ચાલતી હોય છે અને યા તો  કોઈ બુટલેગર ખુલ્લેઆમ દાદાગીરીથી દારૂ વેચતો હોય. પણ વડોદરામાં આજે બુટલેગર હુસેને વધુ કે અવળચંડાઈ કરી છે. દારૂની હેરાફેરી અને ઝડપાતા મુદ્દામાલને લઇને બુટલેગરનો ચોંકાવનારો દાવો કરતાં કહ્યું છે કે પોલીસ અને બુટલેગરની સાંઠગાંઠથી દારૂનો વેપલો ધમધમી રહ્યો છે. પોલીસ હપ્તા માટે દારૂને વેચવાની પરમીશન આપે છે. સાથે જ કોઈ જ લાજ સરમ વગર પોતે સર્વેસર્વા હોય તેમ દારૂની હોમડિલિવરી કરવાનો પણ નામચીન બુટલેગર હુસેન વાયરલ વીડિયોમાં દાવો કરી રહ્યો છે.

પોલીસ મથકના PI પણ દારૂના વેચાણમાં ભાગીદાર?
વડોદરાના કારેલીબાગ વિસ્તારમાં દારુના કાળા વેપાર માટે જગજાહેર બુટલેગર હુસેન ખુલ્લેઆમ વીડિયો વાયરલ કરી કહી રહ્યો છે કે પોલીસને સાથે રાખી તે દારૂનું વેચાણ કરે છે. તે વીડિયોમાં એ કહી રહ્યો છે કે તેણે કોઇની બીક નથી. જણાવી દઈએ કે દાવો કરનાર બુટલેગર હુસૈન  કારેલીબાગનો લિસ્ટેડ બુટલેગર છે. અગાઉ પોલીસ પર હુમલો કરવાના હુસૈનની કેસમાં સંડોવણી હતી. થોડા સમય અગાઉ જ હુસૈન પાસામાંથી મુક્ત થયો છે અને કારેલીબાગ વિસ્તારમાં દારુના કાળા વેપાર માટે જાણીતો છે. પોતે ડિમ હાંકી દારૂના વેપલામાં  પોલીસ સાથે હોવાનો દાવો કરી રહ્યો છે અને પોલીસ મથકના PI પણ દારૂના વેચાણમાં ભાગીદાર હોવાની મોટો ઘટસ્ફોટ કરી રહ્યો છે. જો વીડિયો સત્યતા હોય તે એ વાત નક્કી છે કે પોલીસને હાથના કર્યા હૈયે વાગ્યા છે. હુસૈન સામે કોઈ કાર્યવાહી પોલીસ કરે છે કે નહીં તેતો હવે સમય જ બતાવશે. પણ દારૂની હેરાફેરી અને ઝડપાતા મુદ્દામાલમાં પોલીસના ભાગ ખરેખર છે કે નહીં તે મોટી તપાસનો વિષય છે. બુટલેગર હુસૈનની આટલી હિમ્મત પાછળ પણ કોઈ મોટા રાજદારનો હાથ હોય તેવુ લાગી રહ્યું છે કારણ કે વીડિયોમાં દારૂ વેચતો હોવાનું સરેઆમ સ્વીકારી રહ્યો છે અને લોકોને અવળા માર્ગે દોરી રહ્યો છે. પોલીસ બસ મૂકપ્રેક્ષક બની બુટલેગરનો તમાશો જોઈ રહી છે. કડક કાર્યવાહી તો દૂર રહી પણ દારૂબંધીના છડેચોક થઈ રહેલા ઉલ્લધન સામે હાથ પર હાથ ધરી બેઠી છે. અહી એ સવાલ પણ ઊભો થાય છે કે દારૂબંધી હોવાને લીધે બુટલેગરનો કાળો કારોબાર ઠપ્પ થઈ બેઠો છે આથી તે પોલીસ પર ભડાસ કાઢી રહ્યો છે ત્યારે સવાલ અનેક છે અને જવાબ એક જ છે કે ગુજરાતમાં દારૂબંધી શું માત્ર નામ પૂરતી જ છે.

VTV ગુજરાતીના સળગતા સવાલ

• શું વડોદરામાં બુટલેગર અને પોલીસની મિલીભગત ચાલે છે?
• શું દારૂના મુદ્દામાલ જપ્ત કરવામાં કોઇ ગોઠવણ હોય છે?
• વડોદરામાં બુટલેગરોનું નેટવર્ક આટલું મોટા પાયે ચાલે છે?
• દારૂની હેરાફેરી પોલીસની મીઠી નજર હેઠળ થાય છે?
• બુટલેગરના દાવા બાદ પોલીસની ભૂમિકા પર ઉઠ્યા સવાલ?
• શું બુટલેગરો સાથે પોલીસ ભાગીદારી કરતી હોય છે?