ક્રિકેટની રમતમાં ક્યારે અને કેવીરીતે બાજી પલટાઈ જાય તે કોઈ કહી શકતુ નથી. ઘણી વખત ટીમ હારેલી મેચ પણ જીતી જાય છે, તો ઘણી વખત ટીમની જીત નક્કી હોવા છતાં હારી જાય છે. જેનો વધુ એક પુરાવો સામે આવ્યો છે. જ્યારે એક ટીમને છેલ્લાં બોલમાં જીતવા માટે 5 રનની જરૂર હતી અને બોલરે નો બોલ પણ ના ફેંક્યો અને ચોગ્ગો-છગ્ગો લગાવ્યાં વગર ટીમે જીત પ્રાપ્ત કરી.
પાકિસ્તાનના કરાંચીમાં એક મેચમાં ટીમે છેલ્લાં બોલમાં મેળવી જીત
બોલરે નો બોલ પણ ના ફેંક્યો અને પ્રતિસ્પર્ધી ટીમને જીત પ્રાપ્ત થઇ
પીચ પર ઉભા રહેલા બેટરોએ ચોગ્ગો-છગ્ગો માર્યા વગર જીત મેળવી
પાકિસ્તાનની અલ-વકીલ ક્રિકેટ લીગની મેચમાં થયુ આવુ
આ આંતરરાષ્ટ્રીય મેચ નથી. પાકિસ્તાનના કરાંચી શહેરમાં ચાલી રહેલ અલ-વકીલ ક્રિકેટ લીગની એક મેચમાં આવુ થયુ છે. હવે તેનો વીડિયો સોશિયલ મીડિયામાં પણ વાયરલ થઇ રહ્યો છે. અલ-વકીલ ક્રિકેટ લીગમાં ઑટોમોલ અને ઓડિયોનિક ટીમની વચ્ચે એક મેચ યોજાઈ હતી. બંને ટીમોની વચ્ચે તિવ્ર ટક્કર થઈ. જેનો પુરાવો છે કે જીત-હારનો નિર્ણય છેલ્લા બોલે થયો. આ અંતિમ બોલમાં મેચનો બધો રોમાંચ છુપાયેલો છે. આ મેચમાં ઑટોમોલ ટીમે 20 ઓવરમાં 155 રન બનાવ્યાં હતા. ટીમને મેચના છેલ્લાં બોલમાં જીતવા માટે 5 રનની જરૂર હતી અને તેની બે વિકેટ બાકી હતી. એવામાં કોઈ પણ એવુ કહેશે કે ચોગ્ગો-છગ્ગો ફટકાર્યા વગર જીત મળવી શક્ય નથી. પરંતુ તમે માનશો નહીં, બેટરોએ દોડીને જીત માટે જરૂરી 5 રન પૂર્ણ કર્યા. આ વીડિયો જોઈને સમજી શકાય છે.
વીડિયોમાં જોઈ શકાય છે કે છેલ્લાં બોલમાં બેટર શોટ ફટકારવાનો પ્રયાસ કરે છે. પરંતુ બોલ બેટ પર પરફેક્ટ આવતો નથી અને સીધો લોન્ગ ઑફ પર રહેલા ફીલ્ડરના હાથમાં જતો રહે છે. ત્યારબાદ ફીલ્ડિંગ ટીમ માટે આખી રમત બદલાઈ જાય છે. કારણકે બોલ પકડ્યા બાદ ફીલ્ડર તેને વિકેટ પર થ્રો કરીને પોતે બેટરને રન આઉટ કરવા માટે નોન સ્ટ્રાઈકર એન્ડ તરફથી દોડવા લાગે છે અને જ્યાં સુધી બેલ્સ વિખેરે છે ત્યાં સુધી બેટ્સમેન ક્રીઝની અંદર પહોંચી જાય છે અને 3 રન પૂરા થાય છે. ત્યારબાદ આ ફીલ્ડર બીજી તરફ દોડવા લાગે છે અને બેટ્સમેનને રન આઉટ કરવા માટે બોલ થ્રો કરે છે. ત્યારબાદ પણ બોલ સ્ટમ્પને ના અડતા થર્ડમેન તરફ જતી રહે છે. આ દરમ્યાન પીચ પર ઉભા રહેલા બેટર બીજા બે રન દોડી જીતવા માટેના 5 રન પૂર્ણ કરી દે છે.