ધર્મ / ક્યારે છે અખાત્રીજ? લગ્ન સહિત દરેક શુભ કામ માટે કહેવાય છે વણજોયુ મુહૂર્ત, જાણો શું છે મહાત્મય

• જાણો ક્યારે છે અખાત્રીજ? 
• મુહૂર્ત જોયા વગર પણ થાય છે શુભ કામ  
• જાણો શું છે મહાત્મય 

હિન્દુ ધર્મમાં અખાત્રીજ એટલે કે અક્ષય તૃતીયાને ખૂબ જ શુભ તિથિ માનવામાં આવે છે. લગ્ન, ગૃહપ્રવેશ, જનોઈ સંસ્કાર સહિત કોઈપણ શુભ કાર્ય કરવા માટે અક્ષય તૃતીયાને વણજોયું મુહૂર્ત માનવામાં આવે છે. 

એટલે કે આ દિવસે મુહૂર્ત કાઢ્યા વિના પણ શુભ કાર્યો કરી શકાય છે. હિંદુ કેલેન્ડર મુજબ, દર વર્ષે અક્ષય તૃતીયા વૈશાખ મહિનાના શુક્લ પક્ષની તીજે આવે છે. આ વર્ષે અક્ષય તૃતીયા 3 મે 2022ના રોજ છે.

અક્ષય તૃતીયા 2022 શુભ મુહૂર્ત
તૃતીયા તિથિ મંગળવાર, 3 મે 2022 ના રોજ સવારે 05:19 થી શરૂ થશે અને 04 મેના રોજ સવારે 07:33 સુધી રહેશે. આ દિવસે રોહિણી નક્ષત્ર રહેશે. રોહિણી નક્ષત્ર 04 મેના રોજ સવારે 12:34 થી 03:18 સુધી રહેશે.

જાણો અખાત્રીજનું મહાત્મય 
અક્ષય તૃતીયાનો દિવસ શુભ કાર્ય કરવા માટે ખૂબ જ સારો છે. આ ઉપરાંત આ દિવસે કિંમતી વસ્તુઓ જેવી કે નવા કપડાં, ઘરેણાં, ઘર-ગાડી વગેરેની ખરીદી કરવી પણ ખૂબ જ શુભ માનવામાં આવે છે. આ દિવસે ધાર્મિક કાર્યક્રમો પણ યોજાય છે. 

મહારાષ્ટ્ર, રાજસ્થાન સહિતના કેટલાક રાજ્યોમાં આ દિવસે સોના-ચાંદીની કોઈ વસ્તુ ખરીદવાની પરંપરા છે. એવું માનવામાં આવે છે કે આ દિવસે સોનું અને ચાંદી ખરીદવાથી ઘરમાં સુખ-સમૃદ્ધિ આવે છે. એટલું જ નહીં આ દિવસે દાન કરવાનું પણ ઘણું મહત્વ છે. અક્ષય તૃતીયાના દિવસે દાન કરવાથી ઘરમાં સમૃદ્ધિ આવે છે.