કપિલે થોડાં સમય પહેલાં જ જણાવ્યું હતું કે શોમાં પહેલાં ગેસ્ટ તરીકે અક્ષય કુમાર આવશે. આ દરમિયાન કપિલ શર્માએ સોશિયલ મીડિયા પર એક એવી તસવીર શેર કરી છે જેને લઈને ચર્ચાઓ થઈ રહી છે.
અક્ષય કુમાર તેની ફિલ્મોના પ્રમોશન માટે કપિલ શર્મા શો પર ઘણી વખત આવી ચૂક્યો છે અને બંને વચ્ચે જોરદાર મસ્તી મજાક જોવા મળે છે. અક્ષયની ફિલ્મ બેલ બોટમ રિલીઝ થવાની છે અને ફિલ્મના પ્રમોશન માટે અક્ષય કપિલના શો પર આવવાનો છે. કપિલે તેના સેટની એક તસવીર તેના ઈન્સ્ટાગ્રામ એકાઉન્ટ પર શેર કરી છે. આ તસવીરમાં અક્ષય કપિલના આશીર્વાદ લેતો જોવા મળી રહ્યો છે. આ સાથે જ કપિલે કેપ્શનમાં લખ્યું- 'પ્રખ્યાત ફિલ્મ અભિનેતા શ્રી અક્ષય કુમાર તેમની નવી ફિલ્મ બેલ બોટમ માટે આશીર્વાદ લઈ રહ્યા છે.'
અક્ષય કુમારની ફિલ્મ 'બેલ બોટમ'નું ટ્રેલર મંગળવારે રિલીઝ થયું હતું. આ અંગે કપિલ શર્માએ બુધવારે ટ્વિટર પર અક્ષય કુમારને ટેગ કરીને લખ્યું, 'સુંદર ટ્રેલર અક્ષય કુમાર પાજી. 'બેલ બોટમ'ની સમગ્ર ટીમને અભિનંદન અને શુભેચ્છાઓ. કપિલ શર્માએ પોતાના ટ્વિટમાં ફિલ્મનું ટ્રેલર પણ શેર કર્યું છે. જવાબમાં અક્ષય કુમારે કપિલ સાથે મસ્તી કરતા લખ્યું કે, 'જેવી જ તને ખબર પડી કે હું શોમાં આવી રહ્યો છો તો બેસ્ટ વિશેઝ મોકલી, એ પહેલાં નહોતી મોકલી. મળીને તારી ખબર લઈશ.
'ધ કપિલ શર્મા શો'ના કલાકારોએ 7 ઓગસ્ટ શનિવારથી શૂટિંગ શરૂ કરી દીધું છે અને અર્ચના પૂરન સિંહે એક વીડિયો દ્વારા આ વિશે જાણકારી આપી છે. અર્ચના પૂરણ સિંહે સોશિયલ મીડિયા પર લગભગ દોઢ મિનિટનો વીડિયો પોસ્ટ કર્યો છે અને શોને લગતી અપડેટ્સ આપી છે. કોરોના વાયરસના કારણે શોનું શૂટિંગ અટકી ગયું હતું. આ સિવાય કપિલ શર્મા પણ તેના પરિવાર અને બંને બાળકો સાથે સમય પસાર કરવા માંગતો હતો.