કોરોનાને કારણે સમગ્ર દેશમાં લોકડાઉન છે જેના કારણે ટીવી અને બોલિવૂડ ઈન્ડસ્ટ્રી પણ ઠપ થઈ ગઈ છે. કોરોનાને કારણે ઘણી ફિલ્મોની રિલીઝ પોસ્ટપોન કરી દેવામાં આવી છે તો કેટલીક ફિલ્મોનું શૂટિંગ અધવચ્ચે રોકાઈ ગયું છે. જોકે, ઘણાં ફિલ્મમેકર્સ તેમની ફિલ્મો ઓટીટી પ્લેટફોર્મ પર રિલીઝ કરવા પણ તૈયાર થઈ રહ્યાં છે. તો હવે અક્ષય કુમાર અને કિયારા અડવાણીની ફિલ્મ 'લક્ષ્મી બોમ્બ' પણ ઓટીટી પ્લેટફોર્મ પર રિલીઝ કરવામાં આવશે એવા સમાચાર મળી રહ્યાં છે.
લોકડાઉનને કારણે ઘણાં ફિલ્મમેકર્સ તેમની ફિલ્મો ઓટીટી પ્લેટફોર્મ પર રિલીઝ કરવા તૈયાર
હવે અક્ષય કુમારની ફિલ્મ 'લક્ષ્મી બોમ્બ' પણ ઓટીટી પર થશે રિલીઝ
હકીકતમાં આ ફિલ્મ 22 મેના રોજ સિનેમાઘરોમાં રિલીઝ થવાની હતી, પણ લોકડાઉન અને કોરોનાને કારણે ફિલ્મ થિયેટરમાં તો રિલીઝ ન થઈ શકી પરંતુ હવે તેને ઓટીટી પ્લેટફોર્મ પર ઓનલાઈન રિલીઝ કરવામાં આવશે. સૂત્રો પ્રમાણે ફિલ્મના એક્સક્લુઝિવ પ્રીમિયર રાઈટ્સ હોટસ્ટાર OTT પ્લેટફોર્મ દ્વારા ખરીદી લેવામાં આવ્યાં છે અને ફિલ્મનું પ્રીમિયર હોટસ્ટાર પર રિલીઝ થશે. જોકે, શરૂઆતમાં ફિલ્મમેકર અને ઓટીટી પ્લેટફોર્મ વચ્ચે કેટલીક વાતોને કારણે નિર્ણય અટકેલો હતો પણ હવે બધું સ્પષ્ટ થઈ ગયું છે અને ફિલ્મ ટૂંક સમયમાં રિલીઝ કરવામાં આવશે.
ફિલ્મ લક્ષ્મી બોમ્બના ઓટીટી પ્લેટફોર્મ પર રિલીઝની ઓફિશિયલ ઘોષણા કેમ કરવામાં નથી આવી રહી, તે અંગે વાત કરતાં સૂત્રએ જણાવ્યું કે, મેકર્સને પ્રોજેક્ટ તૈયાર કરવામાં એક મહિનાનો સમય લાગશે. ફિલ્મના પોસ્ટ પ્રોડક્શનનું કામ બાકી છે. જેથી લોકડાઉન ખતમ થયાના એક મહિના સુધી ફિલ્મનું પ્રીમિયર રિલીઝ નહીં કરી શકાય, જેથી ફિલ્મની તારીખ પણ નક્કી નથી.
જ્યારે ફિલ્મના રાઈટ્સ 125 કરોડ રૂપિયામાં વેચાયા છે. જો ફિલ્મ બોક્સ ઓફિસ પર રિલીઝ થઈ હોત તો ફિલ્મ 200 કરોડ રૂપિયાની કમાણી કરવાનો અનુમાન લગાવવામાં આવ્યો હતો. તમને જણાવી દઈએ કે, લક્ષ્મી બોમ્બ પહેલાં અમિતાભ બચ્ચન અને આયુષ્માન ખુરાનાની ગુલાબો સિતાબો અને વિદ્યા બાલનની શકુંતલા દેવી જેવી મોટી ફિલ્મો ઓટીટી પ્લેટફોર્મ પર રિલીઝ થવાની છે.