સુપરસ્ટાર અક્ષય કુમારે ઘણી બધી સિદ્ધિઓ પોતાના નામે કરી છે ત્યારે વધુ એક ઉપલબ્ધી તેમણે પોતાના નામે કરી લીધી છે. ફોર્બ્સની 2020ની યાદીમાં અક્ષય કુમાર એકમાત્ર ભારતીય સેલિબ્રીટી છે જેમને સ્થાન આપવામાં આવ્યું છે. ગયા વર્ષે અક્ષય કુમારે ઘણી બધી ધમાકેદાર ફિલ્મો આપી હતી જે બાદ આ યાદીમાં સુપરસ્ટાર બ્રેડ પીટ અને ટોમ ક્રૂઝ પણ તેમનાથી પાછળ છે.
અક્ષયની ફિલ્મોએ બોક્સઓફીસ પર ધૂમ મચાવી
કુલ આવક 362 કરોડ રૂપિયા બતાવવામાં આવી
આવનાર સમયમા લક્ષ્મી બોમ અને સૂર્યવંશી જેવી ફિલ્મો આવશે
અક્ષય ફિલ્મોએ કર્યો કમાલ
અક્ષય કુમાર બોલિવૂડના એવા સુપરસ્ટાર છે જે દરવર્ષે 4થી 5 ફિલ્મો કરે છે અને આ બધી જ ફિલ્મો બોક્સ ઓફીસ પર ધમાલ મચાવી દે છે. અક્ષય કુમારે ગયા વર્ષે કેસરી, મિશન મંગલ, હાઉસફૂલ અને ગૂડ ન્યૂઝ જેવી ધમાકેદાર ફિલ્મો આપી અને બોક્સ ઓફીસ પર આ ફિલ્મોએ કમાલ કર્યો.
બ્રેડ પીટ અને ટોમ ક્રૂઝ પણ તેમનાથી પાછળ છે
ફોર્બ્સે વર્ષ 2020ની લીસ્ટ બહાર પાડી છે જેમાં અક્ષય કુમાર એકમાત્ર ભારતીય સેલિબ્રીટી છે જેમને આ યાદીમાં સામેલ કરવામાં આવ્યા છે. આ યાદીમાં અક્ષય કુમાર 52માં સ્થાન પર છે અને ટેક્સને અવગણીએ તો તેમની કુલ આવક 362 કરોડ રૂપિયા બતાવવામાં આવી છે. નોંધનીય છે કે આ યાદીમાં સુપરસ્ટાર બ્રેડ પીટ અને ટોમ ક્રૂઝ પણ તેમનાથી પાછળ છે.
અક્ષય કુમારે આપ્યું નિવેદન
યાદીમાં નામ આવ્યા બાદ અક્ષય કુમારે કહ્યું 'હું તો માત્ર એક જ કરોડ રૂપિયા કમાવવા માંગતો હતો પરંતુ હું માણસ જ છું અને મેં જ્યારે એક કરોડ રૂપિયાની કમાણી કરી તો મેં વિચાર્યું 100 કરોડ રૂપિયા પણ કમાઈ શકું છું. મેં ક્યારેય રોકાઈ જવા વિશે નથી વિચાર્યું.'
અક્ષય કુમાર પાસે ખૂબ મજબૂત લાઈનઅપ
નોંધનીય છે કે અન્ય નાગરિકોની જેમ અક્ષય કુમારે લોકડાઉનમાં પરિવાર સાથે જ સમય વિતાવ્યો હતો અને અનલોક-1 થતાની સાથે જ તેમણે એક સરકારી વિજ્ઞાપનમાં કામ પણ કર્યું. આગામી સમયમાં અક્ષય કુમારની સૂર્યવંશી, બોલ બચ્ચન, પૃથ્વીરાજ ચૌહાણ અને લક્ષ્મી બોમ જેવી ફિલ્મો આવવાની છે આમ જોવા જઈએ તો હાલમાં પણ અક્ષય કુમાર પાસે ખૂબ મજબૂત લાઈનઅપ છે.