ફિલ્મ પ્રોડ્યુસર્સ માટે બોક્સ ઑફિસ પર સુરક્ષિત રીતે નફો કરાવવાની ગેરેન્ટી આપતા અક્ષય કુમારને પોતાની આગામી ફિલ્મ માટે 120 કરોડ રૂપિયા મળશે કે નહી, તે પછીની વાત છે પરંતુ તે જે ફિલ્મ માટે તેણે મળવાની વાત ચાલી રહી છે તેની સત્તાવાર રીતે જાહેરાત થઇ ગઇ છે.
છેલ્લા કેટલાય દિવસોથી આનંદ એલ. રાય સાથે અક્ષય કુમારની અપકમિંગ ફિલ્મ ખૂબ ચર્ચાઈ રહી છે. તેનું ટાઇટલ હવે મેકર્સે જાહેર કરી દીધું છે. ફિલ્મનું નામ ‘અતરંગી રે’ છે. અક્ષય સિવાય તેમાં સારા અલી ખાન અને ધનુષ પણ છે. ફિલ્મનું મ્યુઝિક એ. આર. રહેમાન આપશે. આ ફિલ્મને આનંદ એલ. રાયના જૂના જોડીદાર હિમાંશુ શર્માએ લખી છે.
આનંદ એલ. રાયે સ્ટારકાસ્ટને લઈને કહ્યું કે, ‘ધનુષ અને સારા પહેલીવાર સાથે દેખાશે અને આ જોડી ઓનસ્ક્રીન એકદમ ફ્રેશ લાગશે. અક્ષયે પણ કહ્યું, ‘આનંદ જે રીતે સ્ટોરી કહે છે હું તેનો ફેન બની રહ્યો છું. તેની સાથે જોડાઈને હું ખૂબ રોમાન્ચિત અનુભવ કરી રહ્યો છું. તેમણે જ્યારે મને સ્ટોરી નરેટ કરી તો મેં 10 મિનિટમાં જ ફિલ્મ કરવાની હા પાડી દીધી હતી. એટલું ચોક્કસ છે કે તેને શૂટ કરવામાં હું એટલા દિવસ તો નહીં લઉં જેટલા હું અન્ય ફિલ્મો કરવા માટે લઉં છું. આ રોલ એટલો ખાસ છે કે હું તેને ના ન કહી શક્યો. આ રોલ અને તેની સ્ટોરી કંઈક એવી છે કે જે હું આખી જિંદગી યાદ રાખવાનો છું. આ ફિલ્મનું ટાઇટલ પણ એકદમ સચોટ છે. તેમાં હું ધનુષ અને સારા સાથે છું. આ એક અતરંગી કાસ્ટ છે. મને ખબર છે આનંદ જે સરળ રીતે સ્ટોરીટેલિંગ કરે છે તેનાથી ફિલ્મ પોતાનામાં જ ખાસ બની જાય છે.’
જોકે, સ્ટોરીમાં લવ ટ્રાએન્ગલ હશે અથવા કંઈક જુદુ બતાવવામાં આવશે તેના પર મેકર્સે અત્યારે મૌન ધારણ કર્યુ છે. આ ફિલ્મ આવતા વર્ષે 14 ફેબ્રુઆરીના રોજ વેલેન્ટાઈન ડે પર રિલીઝ થશે.